Levitikus

14 Jehova okwa twikila okupopya naMoses, ta ti: 2 “Ei omhango i na sha nomunashilundu mefiku olo a lombwelwa kutya okwa koshoka, eshi a twalwa komupristeri. 3 Omupristeri ota ka ya kondje yonhanda noku mu konakona. Ngeenge omunashilundu okwa veluka koudu woshilundu, 4 omupristeri ote ke mu lombwela a ete oudila vavali ve na omwenyo va koshoka, oshitai shomuti womusederi, oshiyata shitilyana nosho yo oshixwa shaisopi yoku mu koshola. 5 Opo nee omupristeri ote ke mu lombwela kutya okadila kamwe naka dipaelwe moshiyuma shedu mu na omeva mawa. 6 Ashike oku na okukufa okadila oko ke na omwenyo, pamwe noshitai shomuti womusederi, oshiyata shitilyana, oshixwa shaisopi, ndele te i yaveke oshita mohonde yokadila oko ka dipaelwa momeva mawa. 7 Ota ka shamina ohonde luheyali komunhu oo ta kosholwa koudu woshilundu, nota ka popya kutya okwa koshoka, nota ka efa okadila oko ke na omwenyo ka ye moixwa.

8 “Omunhu oo ta kosholwa oku na okukosha oikutu yaye nokukulula ko eexwiki daye adishe nokulikosha nomeva, nota kala a koshoka. Konima yaasho, ota dulu okuya monhanda, ashike ota kala ta di kondje yetwali laye oule womafiku aheyali. 9 Mefiku etiheyali, oku na okukulula ko eexwiki adishe komutwe waye, neendjedi koshedi shaye neefeleisho daye. Konima eshi e di kulula ko adishe, oku na okukosha oikutu yaye nokulikosha nomeva, nota kala a koshoka.

10 “Mefiku etihetatu, ota ka kufa eedjona mbali deendume da koshoka, odjona yonghadi ya koshoka yomudo umwe, oitimulongo itatu yoefa* youfila wa nakwa nawa wa pilulilwa omaadi, i li eendjayambo noshiyelekifo shimwe sholog* shomaadi. 11 Omupristeri oo a popya kutya okwa koshoka ota ka twala omunhu oo a kosholwa pamwe nomayambo koshipala shaJehova, poshivelo shetwali lokwoongalela. 12 Omupristeri ota ka kufa odjona imwe yondume noku i yamba i li elivelombediyambo pamwe noshiyelekifo sholog shomaadi, note ke i dungadungifa i li edungadungifwayambo koshipala shaJehova. 13 Ponhele opo hapa dipaelwa shito oshinamwenyo shetimbayambo noshinamwenyo shexwikiloyambo, opo ta ka dipaela odjona yondume monhele iyapuki, molwaashi elivelombediyambo olomupristeri, ngaashi ashike etimbayambo. Oli li oshinima shiyapuki elela.

14 “Omupristeri ota ka kufa ohonde imwe yelivelombediyambo, noku i tula kokutwi kwokolulyo kwomunhu oo a kosholwa nosho yo komunwe wa kula wokeke laye lokolulyo nokomunwe wa kula wokomhadi yaye yokolulyo. 15 Ota ka kufa yo oshiyelekifo shimwe sholog shomaadi noku a tila peke laye mwene lokolumosho. 16 Omupristeri ota ka yava omunwe waye weke lokolulyo momaadi, oo e li peke laye lokolumosho nota ka shamina omaadi amwe nomunwe waye luheyali koshipala shaJehova. 17 Opo nee omupristeri ota ka tula omaadi amwe oo a xupa po peke laye kokutwi kwokolulyo kwomunhu oo a kosholwa nosho yo komunwe wa kula wokeke laye lokolulyo nokomunwe wa kula wokomhadi yaye yokolulyo, kombada yohonde yelivelombediyambo. 18 Omupristeri ota ka tula omaadi oo a xupa peke laye momutwe womunhu oo te likoshola, nomupristeri ote ke mu koshola koshipala shaJehova.

19 “Omupristeri ota ka yamba etimbayambo nota ka koshola omunhu oo te likoshola, nokonima ota ka dipaa oshinamwenyo shexwikiloyambo. 20 Omupristeri ota ka yamba exwikiloyambo neendjayambo koaltari, note ke mu koshola, nota kala a koshoka.

21 “Ashike ngeenge ohepele, noke na oiniwe ya wana, oku na okukufa odjona yondume imwe i li elivelombediyambo yedungadungifwayambo, opo e likoshole pamwe noshitimulongo shoefa* youfila wa nakwa nawa wa pilulilwa omaadi, u li eendjayambo, oshiyelekifo sholog shomaadi, 22 neenghuti mbali domatende, ile eenghutyona mbali dopovanhu, she likolelela koiniwe yaye. Imwe oyetimbayambo, naikwao oyexwikiloyambo. 23 Mefiku etihetatu, ote ke i eta, opo a kosholwe komupristeri poshivelo shetwali lokwoongalela koshipala shaJehova.

24 “Omupristeri ota ka kufa odjona yondume yelivelombediyambo noshiyelekifo sholog shomaadi, note ke i dungadungifa i li edungadungifwayambo koshipala shaJehova. 25 Opo nee ota ka dipaa odjona yondume yelivelombediyambo, nomupristeri ota ka kufa ohonde imwe yelivelombediyambo noku i tula kokutwi kwokolulyo kwomunhu oo a kosholwa nosho yo komunwe wa kula wokeke laye lokolulyo nokomunwe wa kula wokomhadi yaye yokolulyo. 26 Omupristeri ota ka tila omaadi amwe peke laye lokolumosho, 27 opo nee ota ka shamina omaadi amwe oo e li peke laye lokolumosho nomunwe waye weke lokolulyo luheyali koshipala shaJehova. 28 Omupristeri ota ka tula omaadi amwe oo e li peke laye kokutwi kwokolulyo kwomunhu oo te likoshola nosho yo komunwe wa kula wokeke laye lokolulyo nokomunwe wa kula wokomhadi yaye yokolulyo ngaashi a li a ninga shi na sha nohonde yelivelombediyambo. 29 Omupristeri ota ka tula omaadi oo a xupa peke laye momutwe womunhu oo te likoshola, opo e mu koshole koshipala shaJehova.

30 “Ota ka yandja onghuti yetende, ile onghutyona imwe yopovanhu, she likolelela koiniwe yaye, 31 oyo ta dulu okuyandja, i li etimbayambo naimwe oyexwikiloyambo pamwe neendjayambo, nomupristeri ota ka koshola omunhu oo te likoshola koshipala shaJehova.

32 “Oyo omhango i na sha naao a li e na oudu woshilundu, ashike ka li e na oiniwe ya wana okuyandja, eshi a li ta kosholwa.”

33 Opo nee Jehova okwa lombwela Moses naAron, ta ti: 34 “Ngeenge mwe uya medu laKaanan, olo handi mu pe li li emona, ndele handi tumine oudu woshilundu meumbo li li medu leni, 35 mwene weumbo oku na okuuya nokulombwela omupristeri kutya, ‘Meumbo lange omwe uya oudu wonhumba.’ 36 Omupristeri ota ka yandja omalombwelo e na sha nokuwapaleka eumbo ofimbo ine uya okukonakona oudu, opo aha popye kutya keshe osho shi li meumbo inashi koshoka, nokonima ote ke uya a konakone eumbo olo. 37 Ota ka konakona ombinga oyo ya kumwa, nongeenge ekuma leumbo ola ninga omavala mashunga, ile matilyana notaa hoko ekuma, 38 omupristeri ota ka dja mo meumbo ta pitile poshivelo sheumbo, ndele ta pate eumbo oule womafiku aheyali.

39 “Opo nee omupristeri ota ka aluka mefiku etiheyali nokuninga omakonakono. Ngeenge omukifi owe lihanena mekuma leumbo, 40 omupristeri ota ka yandja omalombwelo, nomamanya oo a kwatwa koudu otaa ka ngumaunwa po nokukupulwa shi kondje yoshilando, konhele oyo inai koshoka. 41 Meni leumbo omu na okukweywa nawanawa, nomunoko oo wa kolonga ekuma leumbo ou na oku ka tilwashi kondje yoshilando, konhele oyo inai koshoka. 42 Ponhele opo pa dja omamanya otava ka tula po omamanya amwe, nove na okulongifa omunoko umwe, ndele tava kolonga ekuma leumbo.

43 “Ashike ngeenge omukifi owa aluka, ndele tau i meumbo konima eshi omamanya a ngumaunwa po naashi eumbo la kweywa nola kolongululwa, 44 omupristeri ota ka ya mo noku li konakona. Ngeenge oudu owe lihanena meumbo, meumbo omu na oshilundu sha nyika oshiponga. Eumbo inali koshoka. 45 Opo nee ota ka hanauna po eumbo, omamanya alo, oiti yalo, nomunoko aushe oo wa tungifwa naao wa kolongifwa eumbo, notai ka twalwa kondje yoshilando, konhele oyo inai koshoka. 46 Ashike keshe oo ta i meumbo olo mulimwe lomomafiku oo la patwa, ota kala ina koshoka fiyo okonguloshi; 47 nakeshe oo ta nangala meumbo olo oku na okukosha oikutu yaye, nakeshe oo ta lile meumbo olo oku na okukosha oikutu yaye.

48 “Ashike ngeenge omupristeri okwe uya, ndele ta mono kutya oudu oo inau lihanena meumbo konima eshi ekuma leumbo la kolongululwa, omupristeri ota ka popya kutya eumbo ola koshoka, molwaashi oudu owa dja mo. 49 Opo a koshole eumbo olo la kala inali koshoka,* oku na okukufa oudila vavali, oshitai shomuti womusederi, oshiyata shitilyana noshixwa shaisopi. 50 Opo nee oku na okudipaela okadila kamwe moshiyuma shedu mu na omeva mawa. 51 Opo nee ota ka kufa oshitai shomuti womusederi, oshixwa shaisopi, oshiyata shitilyana nokadila oko ke na omwenyo, ndele te i yaveke mohonde yokadila oko ka li ka dipaelwa momeva mawa, noku na oku i shamina keumbo olo luheyali. 52 Ota ka koshola eumbo olo inali koshoka* nohonde yokadila, omeva mawa, okadila oko ke na omwenyo, oshitai shomuti womusederi, oshixwa shaisopi noshiyata shitilyana. 53 Opo nee ota ka efa okadila oko ke na omwenyo ka dje mo moshilando ka ye moixwa, nota ka koshola eumbo olo, notali ka kala la koshoka.

54 “Oyo omhango i na sha noudu woshilundu oo wa kwata oshipa shomomutwe, ile eendjedi, 55 oshilundu shomoshikutu, ile shomeumbo, 56 nosho yo i na sha needindo, oipute nomavangwa, 57 opo ku tokolwe kutya oshinima inashi koshoka, ile osha koshoka. Oyo omhango i na sha noshilundu.”