Ovatokolipangeli
7 Jerubbaal, sha hala okutya Gideon, novanhu aveshe ovo va li pamwe naye ova penduka ongula inene, ndele tava ka onga onhanda pofifiya yaHarod, nonhanda yOvamidian oya li kolundume lonhanda yaGideon, mefilu, popepi noshikulundudu shaMore. 2 Opo nee Jehova okwa lombwela Gideon, a ti: “Itandi dulu okuyandja Ovamidian momake ovanhu, ovo u li pamwe navo, molwaashi ovahapu unene. Osheshi otashi dulika Ovaisrael ovo ve ke litangele nge, tava ti, ‘Eke lange mwene la xupifa nge.’ 3 Alikana, shiivifila ovanhu to ti: ‘Keshe oo a tila nota kakama, na shune keumbo.’” Onghee Gideon okwe va yeleka. Konima yaasho, ovanhu 22 000 ova shuna komaumbo, ndele tapa xupu ovanhu 10 000.
4 Jehova okwa tya vali kuGideon: “Natango ovanhu ovahapu unene. Va twala konhele oko ku na omeva, opo ndi va yelekele oko ponhele yoye. Ngeenge onde ku lombwele kutya, ‘Ou ota i pamwe naave,’ ye na ye naave, ashike ngeenge onde ku lombwele kutya, ‘Ou ita i pamwe naave,’ ye ina ya pamwe naave.” 5 Onghee okwa twala ovanhu konhele oko ku na omeva.
Opo nee Jehova okwa lombwela Gideon, a ti: “Yoolola mo keshe umwe oo ta shakumwine omeva nelaka laye, ngaashi ashike ombwa tai shakumwine, mwaavo tava nu va twa eengolo.” 6 Omuvalu waavo va shakumwina omeva pomake avo owa li ovalumenhu 300. Aveshe ovo va xupa po ova nwa tava kotamene va twa eengolo.
7 Jehova okwa lombwela vali Gideon, a ti: “Ohandi ke ku xupifa pamwe novalumenhu 300, ovo va shakumwina omeva, nohandi ka yandja Ovamidian momake oye. Ashike ovanhu vakwao aveshe nava shune komaumbo.” 8 Konima eshi ovalumenhu ovo va kufa oikulya nomanghuma kovakwaita vakwao, Gideon okwa lekela ovalumenhu aveshe vomuIsrael va shune komaumbo, ndele ta kala po ashike novalumenhu 300. Onhanda yOvamidian oya li mefilu pedu laayo yaGideon.
9 Oufiku oo, Jehova okwa lombwela Gideon, ta ti: “Fikama, ponokela onhanda, osheshi onde i yandja momake oye. 10 Ashike ngeenge owa tila oku i ponokela, inda konhanda pamwe naPura omupiya woye. 11 Pwilikina kwaasho tava popi, nokonima yaasho, oto ka kala u na ouladi* wokuponokela onhanda oyo.” Okudja opo, Gideon naPura, omupiya waye, ova ya popepi nonhanda yovatondi vavo.
12 Ovamidian, Ovaamalek novanhu aveshe vokoushilo ova li ve lihanena mefilu ngaashi oshihomo shoshipaxu, neengamelo davo oda li dihapu neenghono, ngaashi ehekedu lopomunghulo wefuta. 13 Opo nee Gideon okwe uya, nopa li omulumenhu ta hepaululile mukwao ondjodi yaye, ta ti: “Onda twa ondjodi ei: Opa li omungome wo-barley u li ongonga tau ngongola wa finda monhanda yOvamidian. Owa ngongola fiyo ometwali, nowe li denga unene, ndele tali u po. Owe li wifa po ongali, ndele tali yalalala.” 14 Mukwao okwa nyamukula, a ti: “Osho oshi na ashike okukala eongamukonda laGideon, omonamati waJoas, omulumenhu Omuisrael. Kalunga okwa yandja Ovamidian nonhanda aishe momake aye.”
15 Diva eshi Gideon a uda omulumenhu oo ta hepaulula ondjodi yaye nefatululo layo, okwe linyongamena kuKalunga. Konima yaasho, okwa shuna konhanda yOvaisrael, ndele ta ti: “Fikameni, osheshi Jehova okwa yandja onhanda yOvamidian momake eni.” 16 Opo nee okwa tukula ovalumenhu ovo 300 meengudu nhatu, ndele aveshe te va pe omanghuma noitoo ya kula mu na eenyika. 17 Okwe va lombwela, ta ti: “Talei nge, ndele tamu ningi naanaa ngaashi handi ningi. Ngeenge onda i popepi nonhanda, omu na okuninga naanaa ngaashi handi ningi. 18 Ngeenge ame naaveshe ovo ve li pwaame otwa shiki omanghuma, nanye omu na yo okushika omanghuma, mwa dingilila onhanda aishe nokwiingida tamu ti, ‘OlaJehova naGideon!’”
19 Gideon novalumenhu 100, ovo va li pamwe naye, ova ya popepi nonhanda, eshi ashike olufo lovanangeli vomokati koufiku* la hovela. Ova shika omanghuma, ndele tava tataula po oitoo ya kula yomeva oyo ya li momake avo. 20 Onghee eengudu odo nhatu oda shika omanghuma, noda tataula po oitoo ya kula. Ova li ve kwete eenyika momake avo okolumosho nova shika omanghuma oo a li momake avo okolulyo, ndele tava ingida tava ti: “Eongamukonda olaJehova naGideon!” 21 Efimbo alishe olo ovakwaita aveshe ova kala va fikama peenhele davo va dingilila onhanda aishe, naaveshe ovo va li monhanda ova faduka po tava ingida, eshi tava tondoka. 22 Ovalumenhu ovo 300 ova twikila okushika omanghuma, na Jehova okwa ningifa aveshe ovo ve li monhanda ve lipilukile po nomaongamukonda, naaveshe ovo va li monhanda ova faduka po fiyo okuBet-sitta, kuSerera nokomikunda adishe daAbel-mehola, osho shi li popepi naTabbat.
23 Okwa li a ongela ovakwaita Ovaisrael va dja mepata laNaftali, laAsser nomepata alishe laManasse, nova li va taataa Ovamidian. 24 Gideon okwa tuma ovatumwa koshitukulwa ashishe shokeemhunda shaEfraim, a ti: “Indeni mu ka ponokele Ovamidian, ndele tamu tula ovalumenhu pomataulukilo omeva fiyo okuBet-bara nokomulonga waJordan.” Onghee ovalumenhu aveshe vomepata laEfraim ova li va ongala, ndele tave va nangele pomataulukilo omeva fiyo okuBet-bara nokomulonga waJordan. 25 Ova li yo va kwata ko omalenga avali Ovamidian, Oreb naSeeb. Ova li va dipaela Oreb kemanya laOreb nova li va dipaela Seeb poshikolelo shomaviinyu shaSeeb. Ova twikila okutaataa Ovamidian, nova li va twala omutwe waOreb nowaSeeb kuGideon, koshitukulwa osho shi li popepi nomulonga waJordan.