Eehamba eenhivali
25 Mefiku etimulongo lomwedi omutimulongo, momudo omutimuwoi wepangelo laSedekia, Nebukadnesar, ohamba yaBabilon, okwe uya pamwe netangakwaita laye alishe a lwife Jerusalem. Okwa onga onhanda e shi lwife, nokwa tunga ekuma le shi dingilila, 2 noshilando osha kala sha dingililwa fiyo omomudo omuti-11 wepangelo lohamba Sedekia. 3 Mefiku etimuwoi lomwedi omutine, ondjala oya li ya kwata moiti moshilando, novanhu moshilongo kava li ve na oikulya. 4 Ovakaldea ova li va panuna ekuma loshilando, novakwaita aveshe ova faduka po oufiku, va pita moshivelo osho shi li pokati komakuma avali, popepi noshikunino shohamba, ofimbo Ovakaldea va li va dingilila oshilando; ohamba oya ya nondjila oyo ya finda kuAraba. 5 Ashike etangakwaita lOvakaldea ola shikula ohamba, ndele tali i pitilile momaluhaela aJeriko, netangakwaita layo alishe ole lihana. 6 Opo nee ova kwata po ohamba, ndele tave i twala kohamba yaBabilon puRibla, noku i tokola. 7 Ova dipaa ovanamati vaSedekia moipafi yaye. Opo nee Nebukadnesar okwa twiyula Sedekia omesho, ndele te mu mange nomalyenge ongopolo, noku mu twala kuBabilon.
8 Mefiku etiheyali lomwedi omutitano, sha hala okutya, momudo omuti-19 wepangelo laNebukadnesar, ohamba yaBabilon, Nebusaradan, elenga lovanangeli, omupiya wohamba yaBabilon, okwe uya kuJerusalem. 9 Okwa xwika po eumbo laJehova, eumbo* lohamba nosho yo omaumbo aeshe omuJerusalem; okwa xwika po yo omaumbo ovalumenhu aveshe va tumbala. 10 Omakuma, oo a li a dingilila Jerusalem, okwa mbonyaunwa po ketangakwaita alishe lOvakaldea, olo la li pamwe nelenga lovanangeli. 11 Nebusaradan, elenga lovanangeli, okwa twala moukwatwa ovanhu aveshe ovo va fyaala moshilando, naavo va ya kohamba yaBabilon nosho yo ovanhu aveshe. 12 Ashike elenga lovanangeli ola fiya mo ovakalimo vamwe moshilongo, ovo va hepa neenghono, opo va kale tava longo moikunino yomandjebele nomomapya. 13 Ovakaldea ova teyaula eengudi dongopolo deumbo laJehova moipambu, outemba nosho yo etemba longopolo, olo la li motembeli yaJehova, ndele tava twala ongopolo kuBabilon. 14 Ova kufa yo oikwatelwa, oixupulo, oidimifo yomundilo, oukopi nosho yo oilongifo aishe yongopolo, oyo hai longifwa moilonga yomotembeli. 15 Elenga lovanangeli ola kufa oikwatelwa yomundilo nosho yo ouyaxa va longwa moshingoli elela nomoshisilveri. 16 Ondjudo yongopolo, oyo ya longifwa mokuninga eengudi mbali, etemba nosho yo outemba, ovo va ningwa kuSalomo vomeumbo laJehova, kaya li tai dulu okuvalulwa. 17 Ongudi keshe oya li i na oule wopombada womaludimbo* 18, nomutwe, oo wa li koxulo yongudi, owa longwa mongopolo; omutwe umwe ou na oule wopombada womaludimbo atatu nosho yo okanete noinima yokufeweka ya fa oiimati yomuti wogranati, oyo ya dingilila omutwe wongudi, aishe oya li ya longwa mongopolo. Ongudi onhivali nosho yo okanete kayo oya li ya ningwa ya faafana naikwao.
18 Elenga lovanangeli ola kufa yo Seraja, omupristeri omukulunhu, Sefania, omupristeri omutivali, nosho yo ovapashukili vopoivelo vatatu. 19 Ola kufa moshilando elenga lomombala, olo la li tali pashukile ovakwaita, ovalumenhu vatano, ovo va li popepi nohamba, ovo va hangika moshilando, nosho yo hamushanga wondjai yetangakwaita, oo a li ha ongele ovanhu moshilongo, nosho yo ovalumenhu 60, va dja movanhu vongaho vomoshilongo, ovo va hangika moshilando. 20 Nebusaradan, elenga lovanangeli, okwe va kufa, ndele te va twala kohamba yaBabilon, puRibla. 21 Ohamba yaBabilon oye va dipaela puRibla, moshilongo shaHamat. Ovajuda osho va ya moukwatwa ngaho, va dja mo moshilongo shavo.
22 Nebukadnesar, ohamba yaBabilon, okwa hoolola Gedalia, omonamati waAhikam, omonamati waSafan, a pashukile ovanhu ovo a fiya muJuda. 23 Eshi eendjai domatangakwaita aeshe nosho yo ovakwaita vado va uda kutya ohamba yaBabilon oya hoolola Gedalia, oda ya diva kuGedalia, puMispa. Eendjai odo oda li Ismael, omonamati waNetania, Johanan, omonamati waKarea, Seraja, omonamati waTanhumet, Omunetofa, nosho yo Jaasania, omonamati wOmumaakati, pamwe novakwaita vado. 24 Gedalia okwe va anena nosho yo ovakwaita vavo, ndele ta ti kuvo: “Inamu tila okukala ovapiya vOvakaldea. Kaleni moshilongo nokulongela ohamba yaBabilon, notashi ke mu endela nawa.”
25 Momwedi omutiheyali, Ismael, omonamati waNetania, omonamati waElisama, oo a li momusholondodo waavo tava ka ninga eehamba,* okwe uya pamwe novakwaita vakwao omulongo, ndele tava denge Gedalia noku mu dipaa, pamwe nOvajuda nosho yo Ovakaldea, ovo va li pamwe naye muMispa. 26 Konima yaasho, ovanhu aveshe, okudja kwaao munini fiyo okomukulunhu, mwa kwatelwa eendjai detangakwaita, ova fikama, ndele tava i kuEgipiti, molwaashi ova li va tila Ovakaldea.
27 Momudo omo Evil-merodak, ohamba yaBabilon, a ninga ohamba, okwa mangulula mo* Jehoiakin, ohamba yaJuda, modolongo. Osha li omomafiku 27 omwedi 12, momudo omuti-37 woukwatwa waJehoiakin. 28 Okwa popya naye nonghenda, ndele olukalwapangelo laye te li ningi linene li dule omalukalwapangelo eehamba dikwao, odo da li pamwe naye muBabilon. 29 Onghee Jehoiakin okwa dula mo oikutu yaye yomodolongo, nokwa kala alushe ha li pamwe naye onghalamwenyo yaye aishe. 30 Okwa kala alushe ha pewa oikulya tai di kohamba efiku keshe, onghalamwenyo yaye aishe.