Exodus
7 Jehova okwa tya kuMoses: “Tala, onde ku ninga u kale ngaashi Kalunga* kuFarao, nomumwanyoko Aron ota ningi omuprofeti woye. 2 Oto ka lombwela omumwanyoko Aron ashishe osho nde ku lombwela, nota ka popya naFarao, opo a lekele mo Ovaisrael moshilongo shaye. 3 Ame ohandi ka efa Farao a kukutike omutima waye, nohandi ka hapupalifa omadidiliko noikumwifilonga yange medu laEgipiti. 4 Ashike Farao ite ke mu pwilikina, nohandi ka ulikila Egipiti eenghono deke lange,* ndele handi kufa medu laEgipiti eengudu* dovanhu vange, Ovaisrael, nomahandukilo madjuu. 5 Ovaegipiti otava ka shiiva filufilu kutya aame Jehova, eshi handi ka denga Egipiti neke lange, nokukufa mo Ovaisrael mokati kavo.” 6 Moses naAron ova ninga osho Jehova e va lombwela. Osho naanaa va ninga. 7 Moses okwa li e na eedula 80, na Aron okwa li e na eedula 83, eshi va popya naFarao.
8 Jehova okwa lombwela Moses naAron, a ti: 9 “Ngeenge Farao okwa ti kunye, ‘Longeni oshikumwifilonga,’ ou na okulombwela Aron to ti: ‘Kufa odibo yoye, ndele to i ekele pedu moipafi yaFarao.’ Otai ka shituka eyoka la kula.” 10 Onghee Moses naAron ova ya kuFarao, nova ninga naanaa ngaashi Jehova e va lombwela. Aron okwa ekela odibo yaye pedu moipafi yaFarao noyovapiya vaye, ndele tai shituka eyoka la kula. 11 Opo nee Farao okwa ongela ovalumenhu ovanaendunge, eendudu novapristeri veemhule vomuEgipiti, ndele navo tava ningi sha faafana noupule wavo. 12 Aveshe ova ekela eedibo davo pedu, ndele tadi shituka omayoka makula, ashike odibo yaAron oya pona po eedibo davo. 13 Natango, Farao okwa li a kukutika omutima waye, noka li e va pwilikina, ngaashi ashike Jehova a popya.
14 Jehova okwa tya vali kuMoses: “Farao okwa kukutika omutima waye. Okwa anya okulekela ovanhu. 15 Onghee mongula ongula ninga ngaha: Eshi Farao ta i komulonga waNil, ou na okuhangwa we mu teelela u li ofika pomunghulo womulonga waNil, nou na okuya nodibo meke loye, oyo ya li ya shituka eyoka. 16 Ou na oku mu lombwela kutya, ‘Jehova, Kalunga kOvaheberi, okwa tuma nge kwoove, a ti: “Lekela oshiwana shange, opo shi ka longele nge mombuwa,” ashike ove ino dulika fiyo opaife. 17 Jehova okwa tya: “Oto ka shiiva kutya aame Jehova okupitila mwaasho handi ka ninga. Ohandi denge omeva, oo e li momulonga waNil, nodibo ei i li meke lange, notaa ka shituka ohonde. 18 Eeshi odo di li momulonga waNil otadi ka fya; omulonga waNil otau ka kala tau nyika, nOvaegipiti itava ka dula okunwa omeva omomulonga waNil.”’”
19 Opo nee Jehova okwa lombwela Moses, a ti: “Lombwela Aron kutya, ‘Kufa odibo yoye meke loye, ndele to denge kombada yomeva aeshe Omuegipiti, kombada yomilonga, opo hapa kunguluka omeva,* kombada yomadiva, naapeshe opo hapa talama omeva, opo a shituke ohonde.’ Medu alishe laEgipiti otamu ka kala ohonde, kutya nee omoikwatelwa yedu, ile oyomamanya.” 20 Moses naAron ova ninga diva ngaashi Jehova e va lombwela. Okwa yelula odibo yaye, ndele ta denge omeva, oo a li momulonga waNil, moipafi yaFarao noyovapiya vaye, nomeva aeshe oo a li momulonga okwa li a shituka ohonde. 21 Eeshi odo da li momulonga waNil oda li da fya; omulonga waNil owa li wa hovela okunyika, nOvaegipiti kava li tava dulu okunwa omeva omomulonga waNil. Medu alishe laEgipiti omwa li ohonde.
22 Natango, ovapristeri veemhule vomuEgipiti ova ninga oshinima sha faafana noupule wavo. Onghee Farao okwa twikila okukukutika omutima waye, noka li e va pwilikina, ngaashi ashike Jehova a popya. 23 Opo nee Farao okwa shuna keumbo laye, naasho kasha li sha kuma omutima waye. 24 Onghee Ovaegipiti aveshe ova li tava fe va dingilila omulonga aushe waNil, opo va mone omeva okunwa, molwaashi kava li tava dulu okunwa omeva omomulonga waNil. 25 Opa li pa pita omafiku aheyali, okudja eshi Jehova a denga omulonga waNil.