Omayeletumbulo
12 Ou e hole outekuduliko oku hole eshiivo,
Ndele ou e tonde epukululo ke na eendunge.
2 Omunhu oo ha longo ouwa ota kala a hokiwa kuJehova,
Ashike Ye oku tonde omunhu, oo e na eemhangela dii.
3 Kape na omunhu ta ka amenwa mokulonga oukolokoshi,
Ndele ovayuki otava ka kala alushe meameno.
4 Omukulukadi muwa oku li oshikoroni komushamane waye,
Ndele omukulukadi oo he lihumbata monghedi ififa ohoni oku li ngaashi omukifi tau oleke omakipa omushamane waye.
5 Omadiladilo omuyuki okwa yuka,
Ndele ewiliko lomukolokoshi otali pukifa.
6 Eendjovo dovakolokoshi odo omwiyo wa nyika oshiponga,*
Ndele okanya kovayuki otake va xupifa.
7 Ngeenge ovakolokoshi ova hanaunwa po, itava kala po vali,
Ndele eumbo lomuyuki otali kala po fiyo alushe.
8 Omunhu ota fimanekwa omolwokulungamena okanya kaye,
Ndele ou e na omutima u na omakoto ota ka ungaungiwa naye nodino.
9 Oshixwepo okukala ino fimana unene nou na omupiya,
Shi dulife okulitumbaleka, ndele ku na oikulya.
10 Omuyuki ota file oshisho oinamwenyo yaye yopeumbo,*
Ndele onghenda yovakolokoshi oyo owii.
11 Ou ta limi epya laye ota ka kutifwa noikulya,
Ndele ou ta lalakanene oinima yongaho ke na eendunge.
12 Omukolokoshi oha twile ondubo osho ovanawii vakwao va likola,
Ndele omuyuki oku li ngaashi omuti u na omidi da ya moule, oo hau ima oiimati.
13 Eendjovo doulunde domunawii odi li omwiyo kuye,
Ndele omuyuki oha henuka oupyakadi.
14 Omunhu ota ka mona ouwa omolwoshiimati sheendjovo* daye,
Noilonga yomake aye otai ke mu etela ondjabi.
15 Ondjila yelai oya yuka momesho alo vene,
Ndele omuyuki oha tambula ko omayele.*
17 Ondombwedi i shii okulineekelwa ohai popi oshili,*
Ndele ondombwedi yoipupulu ohai popi oinima tai pukifa.
18 Eendjovo inadi diladilwa nawa oda fa eongamukonda tali tu,
Ndele elaka lomunaendunge ohali velula.
19 Omilungu odo hadi popi oshili otadi kala po fiyo alushe,
Ndele okanya oko haka popi oipupulu otaka kala po ashike okafimbo kaxupi.
20 Omapukifo oku li momitima daavo hava lalakanene okulonga owii,
Ndele ovo hava xumifa komesho* ombili ova hafa.
21 Omuyuki ita ka hangwa koudjuu,
Ndele ovakolokoshi otava ka hangwa komaupyakadi mahapu.
22 Omilungu di na oipupulu odi li oshinima shitondifa kuJehova,
Ndele ovo hava katuka paushili, ohave mu hafifa.
23 Omunhu omunaendunge ta holeke osho e shii,
Ndele elai otali pitifa mo oulai momutima walo.
24 Omake aavo hava longo noudiinini otaa ka pangela,
Ndele omake ovakwandede otaa ka fininikilwa oilonga idjuu.
25 Oshisho ohashi ningifa omunhu a kale e udite a wililwa po,*
Ndele ondjovo iwa ohai hafifa omutima.
26 Omuyuki oha kongo oulifilo muwa,
Ndele elihumbato lovakolokoshi otali va ningifa va twalwatwalwe.
27 Omukwandede iha taataa oshifitukuti e shi kwate,
Ndele okulonga noudiinini oko emona li na ondilo.
28 Ondjila youyuki otai twala komwenyo;
Naau ta ende muyo ita ka hangwa kefyo.