Numeri

32 Ovanamati vaRuben novanamati vaGad ova li ve na oimuna ihapu neenghono, nova li va mona kutya edu laJaser nolaGilead oku li oshitukulwa shiwa koimuna. 2 Ovanamati vaGad novanamati vaRuben ova ya kuMoses, komupristeri Eliaser nokomalenga ongudu, tava ti: 3 “Atarot, Dibon, Jaser, Nimra, Hesbon, Eleale, Sebam, Nebo naBehon, 4 edu olo Jehova a nyeka ko moipafi yongudu yOvaisrael, edu liwa noimuna, novapiya voye ove na oimuna ihapu.” 5 Ova twikila ko tava ti: “Ngeenge otwa filwa onghenda koshipala shoye, edu eli nali pewe ovapiya voye li li emona. Ino tu taulukifa omulonga waJordan.”

6 Opo nee Moses okwa tya kovanamati vaGad nokovanamati vaRuben: “Ovamwaxo otava i moita ofimbo nye tamu fyaala apa? 7 Omolwashike tamu shololifa Ovaisrael vaha ye medu olo Jehova te ke va pa shili? 8 Osho osho ooxo va ninga, eshi nde va tuma va dja muKades-barnea va ka tale edu. 9 Eshi va ya kEfilu laEskol nova mona edu, ova shololifa Ovaisrael vaha ye kedu olo Jehova a li poku va pa. 10 Jehova okwa li a handuka neenghono mefiku olo nokwaana ta ti: 11 ‘Ovalumenhu ovo va dja muEgipiti, okudja peedula 20 okuyuka pombada, itava ka ya mo medu olo nda li nda ana okuyandja kuAbraham, Isak naJakob, molwaashi inava dulika kwaame nomutima aushe, 12 kakele kuKaleb, omonamati waJefunne, Omukenas, naJosua, omonamati waNun, molwaashi ova dulika kuJehova nomutima aushe.’ 13 Onghee Jehova okwa li a handukila neenghono Ovaisrael, ndele te va ningifa va kale tava endaenda mombuwa oule weedula 40 lwaapo, fiyo epupi alishe, olo la li tali longo oukolokoshi momesho aJehova, la xula po. 14 Nye ovalumenhu ovakolokoshi otamu ningi naanaa ngaashi ooxo va ninga, eshi va hapupalifa ehandu laJehova shi na sha nOvaisrael. 15 Ngeenge omwa efa oku mu shikula, ote ke va efela natango filufilu mombuwa, notamu ka hanaunifa po ovanhu aveshe ava.”

16 Lwanima, ova ya kuye, ndele tava ti: “Tu tungeni oku oyuunda yomamanya yeedi detu noilando yovana vetu. 17 Ndele ohatu twikile okukala twe lilongekidila olwoodi nohatu ka tetekela Ovaisrael, fiyo osheshi twe va twala monhele yavo, ofimbo ovana vetu tava ka kala moilando oyo ya dingililwa komakuma a pama, va amenwa, opo vaha ningilwe owii kovakalimo vomedu olo. 18 Itatu shuna komaumbo etu, fiyo osheshi Omuisrael keshe a mona edu laye li li efyuululo. 19 Osheshi itatu ka mona efyuululo pamwe navo kouninginino womulonga waJordan nokombinga aishe oyo ya ama oko, molwaashi otwa mona nale efyuululo letu kombinga yokoushilo womulonga waJordan.”

20 Moses okwe va nyamukula, a ti: “Ngeenge osho tamu ningi ngaho: Kufeni oilwifo moipafi yaJehova mu ka lwe. 21 Ngeenge keshe umwe okwa kufa oilwifo, ndele ta tauluka omulonga waJordan moipafi yaJehova, eshi ta taataa ovatondi vaye moipafi yaye, 22 fiyo osheshi mwa kufa ko edu olo moipafi yaJehova. Konima yaasho, otamu dulu okushuna notamu kala mwa manguluka ko ketimba moipafi yaJehova noyOvaisrael. Opo nee edu eli otali ka ninga emona leni koshipala shaJehova. 23 Ndele ngeenge itamu ningi ngaho, otamu ka nyona kuJehova. Moshinima osho, shiiveni kutya otamu ka handukilwa omolwenyono leni. 24 Onghee otamu dulu okutunga oilando yovana veni noyuunda yeedi deni, ashike omu na okuninga osho mwa udaneka.”

25 Ovanamati vaGad novanamati vaRuben ova tya kuMoses: “Ovapiya voye otava ningi naanaa ngaashi omwene wange ta popi. 26 Ovana vetu, ovakulukadi vetu, oimuna yetu noinamwenyo yetu aishe yopovanhu otai kala moilando yaGilead, 27 ndele ovapiya voye otava ka dja mo, nakeshe omulumenhu a homata e lilongekida oku ka lwa moita moipafi yaJehova, ngaashi ashike omwene wange ta popi.”

28 Onghee Moses okwa yandja elombwelo li na sha navo komupristeri Eliaser, kuJosua, omonamati waNun, nokomitwe domaukwaneumbo omapata Ovaisrael. 29 Moses okwa tya kuvo: “Ngeenge ovanamati vaGad novanamati vaRuben ova tauluka omulonga waJordan pamwe nanye, keshe umwe oo a homata e lilongekidila oita moipafi yaJehova, nongeenge edu ola kwatwa ko moipafi yeni, omu na oku va pa edu laGilead li li emona. 30 Ashike ngeenge inava kufa oilwifo nokuya pamwe nanye, otava ka kala mokati keni medu laKaanan.”

31 Opo nee ovanamati vaGad novanamati vaRuben ova nyamukula tava ti: “Osho Jehova a lombwela ovapiya voye osho hatu ka ninga. 32 Ohatu ka kufa oilwifo nokutauluka tu ye kedu laKaanan moipafi yaJehova, ashike emona olo hatu ka fyuulula otali ka kala kombinga ei yomulonga waJordan.” 33 Moses okwa yandja ouhamba waSihon, ohamba yOvaamori, nouhamba waOg, ohamba yaBasan, edu alishe, oilando nomikunda domedu olo kovanamati vaGad, kovanamati vaRuben nosho yo ketata lepata laManasse, omonamati waJosef.

34 Ovanamati vaGad ova tunga* Dibon, Atarot, Aroer, 35 Aterot-sofan, Jaser, Jogbeha, 36 Bet-nimra naBet-haran, oilando ya dingililwa komakuma a pama, nova tunga nomamanya oyuunda yeedi. 37 Ovanamati vaRuben ova tunga Hesbon, Eleale, Kiriataim, 38 Nebo naBaal-meon (omadina ayo okwa lunduluka) naSibma. Opo nee ova hovela okulukulula oilando oyo va tungulula.

39 Ovanamati vaMakir, omonamati waManasse, ova dingilila Gilead nove shi kwata ko, ndele tava taataa mo Ovaamori ovo va li mo. 40 Onghee Moses okwa yandja Gilead kuMakir, omonamati waManasse, nokwa kala ha di omo. 41 Jair, omonamati waManasse, okwa dingilila Ovaamori nokwa kwata ko oumukunda vavo vanini, ndele ta hovele oku va ifana Havvot-jair.* 42 Noba okwe shi dingilila nokwa kwata ko Kenat needoolopa dasho,* ndele ta hovele oku shi ifana nedina laye Noba.