Job
23 Job okwa nyamukula, a ti:
2 “Nonena ohandi ka popya nomanganga;*
Kandi na vali eenghono omolwokutwa omadima.
3 Ngeno okwa li ndi shii opo handi hange Kalunga,
Ngeno ohandi i konhele yaye yokukala.
4 Ohandi ka hokolola oupyakadi wange koshipala shaye,
Nokuyadifa okanya kange nomatomhafano;
5 Ohandi ka koneka nghee ta ka nyamukula nge,
Nohandi ka didilika osho ta ka lombwela nge.
6 Mbela ota ka longifa eenghono daye dinene, opo a lwe naame?
Ahawe, ota ka pwilikina kwaame filufilu.
7 Oko oko omuyuki ta ka yukifa oinima pokati kavo naye,
Nohandi ka kala nda manguluka ko fiyo alushe kOmutokoli wange.
8 Ngeenge onda i koushilo, ke ko;
Nongeenge onda aluka, ihandi mu mono.
9 Ngeenge ta longo a ama kolumosho, ihandi dulu oku mu tala;
Opo nee oha tanaukile kolulyo, ashike natango ihandi mu mono.
10 Ashike oku shii ondjila, oyo nda enda.
Konima eshi a yeleka nge, ohandi ka dja mo ngaashi oshingoli elela.
11 Eemhadi dange oda shikula filufilu eenghatu daye;
Onda kala ndi li mondjila yaye nopehe na okukanduka mo.
12 Onda diinina oshipango, osho a popya nomilungu daye.
Onda lenga omalombwelo aye shi dulife nokuli pwaasho nda li nda teelelwa ndi ninge.*
13 Ngeenge a tokola, olyelye ta dulu oku mu kelela?
Ngeenge a* hala okuninga sha, ohe shi ningi.
14 Osheshi ota ka wanifa po filufilu osho sha tokolelwa* nge,
Nokwa tuvikila oinima ihapu ngaashi oyo.
15 Nomolwaasho ndi na oshisho omolwaye;
Ngeenge handi mu diladila, ohandi kala nda tila unene.
16 Kalunga okwa tilifa nge,
NOmunaenghono adishe okwa mbadapalifa nge.
17 Ashike natango inandi mwenekwa komulaulu,
Ile komulaulu fokofoko, oo wa uvika oshipala shange.