Samuel wotete
31 Ovafilisti ova li tava lwifa Ovaisrael, nOvaisrael ova li va faduka po Ovafilisti, navahapu vomuvo ova fila pomhunda yaGilboa. 2 Ovafilisti ova kala tava taataa Saul novanamati vaye, ve va li popepi elela, nova dipaa ovanamati vaSaul, Jonatan, Abinadab naMalkisua. 3 Ova li tava lwifa Saul olwoodi la kwata moiti, nove mu hanga, ndele tave mu yashe nai noikuti. 4 Opo nee Saul okwa lombwela omuhumbati woilwifo yaye ta ti: “Pweya mo eongamukonda loye, ndele to li twifa nge, opo ovalumenhu ovo inava pita etanda vehe uye va twe nge, ndele tava hepeke nge nonyanya.” Ashike omuhumbati woilwifo yaye ka li a hala, molwaashi okwa li a tila unene. Onghee Saul okwa kufa eongamukonda, ndele ta wile kulo. 5 Eshi omuhumbati woilwifo yaye a mona kutya okwa fya, naye okwa wila keongamukonda laye, ndele naye ta fi. 6 Saul, ovanamati vaye vatatu, omuhumbati woilwifo yaye novakwaita vaye aveshe ova fya mefiku olo. 7 Eshi Ovaisrael, ovo va li moshitukulwa osho sha li mefilu naavo va li muJordan, va mona kutya Ovaisrael ova faduka po, nonokutya Saul novanamati vaye ova fya, ova dja mo moilando, ndele tava faduka po. Opo nee Ovafilisti ove uya, ndele tava nangala oilando oyo.
8 Efiku la shikula ko, eshi Ovafilisti va li ve uya okukufa ko oinima yaavo va fya, ova hanga omudimba waSaul nomidimba dovanamati vaye vatatu da nangala komhunda yaGilboa. 9 Opo nee ova teta ko omutwe waye, nova kufa po oinima yaye yokuliamena, ndele tava tumine etumwalaka moshilongo ashishe shOvafilisti ve li andjakaneke meetembeli doihongwafano yavo nomokati kovanhu. 10 Ova tula oinima yaye yokuliamena motembeli yoihongwafano yaAstoret, nova mangela oshimhu shaye kekuma laBet-san. 11 Eshi ovakalimo vomuJabes-gilead va uda osho Ovafilisti va ningila Saul, 12 ovakwaita aveshe ova fikama, nova ya oufiku, ndele tava kufa ko oshimhu shaSaul noimhu yovanamati vaye kekuma laBet-san. Opo nee ova shuna kuJabes, ndele tave di xwikile oko. 13 Nokudja opo, ova kufa omakipa avo, ndele tave a fudike momuti womutamarisk muJabes, nove lidilika oule womafiku aheyali.