Eehamba eenhivali

6 Ovanamati vovaprofeti ova lombwela Elisa, tava ti: “Tala, ponhele apa tu li opa finana unene nafye. 2 Alikana, natu ye komulonga waJordan. Atushe natu ka keni omiti oko, opo tu liningile ko onhele opo hatu dulu okukala.” Elisa okwa ti: “Indeni.” 3 Umwe womuvo okwa pula a ti: “Oto ka ya ngoo pamwe novapiya voye?” Opo nee okwa tya: “Ohandi ka ya.” 4 Onghee okwa ya pamwe navo, ndele tava i pomulonga waJordan nova hovela okuka omiti. 5 Eshi umwe womuvo a li ta ke omuti, ekuva ola wa ko komupini, ndele tali wile momeva, nokwa ingida a ti: “Akutu, omwene wange, ola ehelwa.” 6 Omupiya waKalunga kashili okwe mu pula, a ti: “Ola wila peni?” Onghee okwe mu ulikila apa la wila. Elisa okwa ka oshiti, ndele te shi kupula opo la wila, nekuva ola kaama. 7 Elisa okwa tya: “Li kufa mo.” Onghee okwa lovelela neke laye, ndele te li kufa mo.

8 Ohamba yaSiria oya ya i ka lwife Israel. Oya popya novapiya vayo, noye va lombwela ya ti: “Ohandi ka onga onhanda pamwe nanye konhele oyo.” 9 Opo nee omupiya waKalunga kashili okwa tuma ondjovo kohamba yaIsrael, tai ti: “Lungama uha pite ponhele ei, molwaashi opo tave uya ve ku ponokelele.” 10 Ohamba yaIsrael oya tuma elondwelo kovanhu, ovo ve li koshitukulwa oko omupiya waKalunga kashili e mu londwela aha ye. Okwa kala te i londwele, noya kala kokule nonhele oyo lwoikando.*

11 Osho osha li sha handukifa ohamba* yaSiria, onghee oya ongela ovapiya vayo, ndele tai ti kuvo: “Lombwelei nge. Olyelye mokati ketu a ama kombinga yohamba yaIsrael?” 12 Umwe womovapiya vayo okwa tya: “Kape na sha, omwene wange ohamba. Elisa, omuprofeti womuIsrael, oye a lombwela ohamba yaIsrael oinima oyo wa popya monduda yoye yokunangala.” 13 Ohamba oya tya: “Indeni mu ka konge kutya oku li peni, opo ndi dule okutuma ovalumenhu ve ke mu kwate po.” Lwanima, ohamba oya li ya lombwelwa kutya: “Oku li muDotan.” 14 Okwa tumina ko diva eenghambe nomatemba oita nosho yo etangakwaita la kula; ove uya oufiku, ndele tava dingilile oshilando.

15 Eshi omuyakuli* womupiya waKalunga kashili a penduka ongula inene, ndele ta i pondje, okwa mona kutya oshilando osha dingililwa ketangakwaita li na eenghambe nosho yo omatemba oita. Opo nee omuyakuli okwa tya kuye: “Akutu, omwene wange, ohatu ningi ngahelipi?” 16 Ashike okwa tya: “Ino kala wa tila. Molwaashi pufye ope na vahapu ve dule ovo ve li pamwe navo.” 17 Opo nee Elisa okwa hovela okwiilikana ta ti: “Alikana, Jehova, pashula omesho aye a dule okumona ko.” Diva Jehova okwa pashula omesho omuyakuli, ndele tala, okwa mona koshitukulwa shokeemhunda ku yadi eenghambe nomatemba oita e na omundilo, a dingilila Elisa.

18 Eshi Ovasiria ve uya kuye, Elisa okwa ilikana kuJehova, ta ti: “Alikana, pofipaleka oshiwana eshi.” Onghee okwe shi pofipaleka, ngaashi Elisa a pula. 19 Elisa okwe va lombwela, a ti: “Ei hayo ondjila, naashi hasho oshilando. Shikulei nge ndi mu twale komulumenhu, oo tamu kongo.” Ashike okwe va twala kuSamaria.

20 Eshi va fika muSamaria, Elisa okwa ti: “Alikana, Jehova, pashula omesho avo, opo va dule okumona ko.” Onghee Jehova okwa pashula omesho avo, nova li va mona kutya ove li mokati kaSamaria. 21 Eshi ohamba yaIsrael ye va mona, oya pula Elisa, ya ti: “Omwene wange, nandi va dipae, nandi va dipae?” 22 Ashike Elisa okwa ti: “Ino va dipaa. Mbela oho dipaa neongamukonda loye nosho yo nouta woye ovo wa twala moukwatwa? Va pa omungome nomeva, opo va lye nova nwe, ndele tava shuna komwene wavo.” 23 Onghee okwe va ningila oshivilo shinene, nova lya nokunwa, nokonima yaasho, okwe va lekela va shune komwene wavo. Okudja opo, etangakwaita laSiria inali uya mo vali medu laIsrael.

24 Mokweendela ko kwefimbo, Benhadad, ohamba yaSiria, okwa ongela etangakwaita* laye alishe, nova ya, ndele tava dingilile Samaria. 25 Onghee muSamaria omwa li ondjala inene, nova kala ve shi kondeka, fiyo osheshi omutwe wondongi wa li u na ondado yoisilveri 80, noshitine shoshiyelekifo sho-cab* shomatudi eenghuti sha ka kala shi na ondado yoisilveri 5. 26 Eshi ohamba yaIsrael ya li tai ende pekuma, omukainhu umwe okwe i ingida, ta ti: “Alikana, omwene wange ohamba, tu kwafela.” 27 Opo nee ohamba oya tya: “Ngeenge Jehova ine ku kwafela, openi handi dulu okuhanga ekwafo ndi ku kwafele? Mbela oposhipale, omoshikolelo shomaviinyu, ile opopo hapa hengelwa omaadi?” 28 Ohamba oya pula omukainhu oo, ya ti: “Ou na oupyakadi washike?” Omukainhu oo okwa nyamukula a ti: “Omukainhu ou okwa lombwela nge, a ti, ‘Eta omonamati woye, tu mu lye po nena, nomongula ohatu ka lya po omonamati wange.’ 29 Onghee otwa fulukifa omonamati wange, ndele hatu mu li po. Mefiku la shikula ko, onde mu lombwela nda ti, ‘Eta omonamati woye, opo tu mu lye po.’ Ashike okwa holeka omonamati waye.”

30 Diva eshi ohamba ya uda eendjovo domukainhu oo, oya pombaula oikutu yayo. Eshi ya pita pekuma, ovanhu ova mona kutya oya djala oshako koshi yoikutu yayo. 31 Ohamba oya tya: “Kalunga na handukile nge unene, ngeenge omutwe waElisa, omonamati waShafat, owa kala inau tetwa ko nena.”

32 Elisa okwa li e li omutumba meumbo laye, novakulunhu ova li ve li omutumba puye. Ohamba oya tuma omulumenhu e i tetekele, ashike ofimbo omutumwa oo ina fika, Elisa okwa lombwela ovakulunhu, a ti: “Mbela omwa mona tuu nghee omonamati womudipai a tuma omutwe wange u tetwe ko? Kaleni tamu tale, eshi omutumwa te uya, idileni omuvelo, nokukala mu u kwetele po. Hamba omalinyengo eenghaku oo kae fi omwene waye e mu li konima?” 33 Ofimbo a li ta popi navo, omutumwa okwe uya puye, nohamba oya tya: “Oudjuu ou owa dja kuJehova. Omolwashike vali ndi na okuteelela kuJehova?”