Josua
23 Konima yefimbo lile, eshi Jehova a pa Ovaisrael etulumuko moku va amena kovatondi vavo aveshe ovo ve va dingilila, na Josua okwa li a kulupa noku li pokufya, 2 Josua okwa ifana Ovaisrael aveshe, ovakulunhu vavo, omitwe davo, ovatokoli vavo, novaleli vavo, ndele ta ti kuvo: “Onda kulupa nondi li pokufya. 3 Omwa mona nye vene ashishe osho Jehova, Kalunga keni, a ningila oiwana aishe oyo ponhele yeni, molwaashi Jehova, Kalunga keni, oye a li ta lu ponhele yeni. 4 Taleni, onde mu pa pashihoololifo edu loiwana olo tali kala efyuululo lomapata eni nosho yo edu loiwana aishe oyo nda hanauna po, okudja komulonga waJordan fiyo okEfuta Linene* kouninginino.* 5 Jehova, Kalunga keni, oye a kala te va taataa moipafi yeni, noye e va ta mo* ponhele yeni, nomwa nangala edu lavo ngaashi ashike Jehova, Kalunga keni, e mu udanekela.
6 “Paife omu na okukala filufilu ovaladi, opo mu diinine nomu wanife po ashishe osho sha shangwa membo lOmhango yaMoses mokuhayapuka mo nandenande mu ye kolulyo, ile kolumosho, 7 mokuhaendafana* nandenande noiwana oyo i li punye. Inamu tumbula nokuli omadina ookalunga kayo noinamu ana kuvo, inamu va longela nandenande noinamu linyongamena kuvo. 8 Ashike omu na okukala ovadiinini kuJehova, Kalunga keni, ngaashi ashike mwa kala tamu shi ningi fiyo okunena. 9 Jehova ota ka taataa po oiwana inene noinaenghono moipafi yeni, osheshi kape na nande omunhu a dula oku mu finda fiyo okunena. 10 Omulumenhu umwe womunye ota ka taataa eyovi, molwaashi Jehova, Kalunga keni, ota ka lwa ponhele yeni, ngaashi ashike e mu udanekela. 11 Onghee kaleni mwa lungama alushe* mokukala mu hole Jehova, Kalunga keni.
12 “Ashike ngeenge omwa amuka ko filufilu kuye, ndele tamu pange oukaume noiwana, oyo ya xupa po i li punye, nomwa ningi eudafanotwokumwe ovanhu veni va hombolafane navo, ndele tamu endafana navo, navo tava endafana nanye, 13 shiiveni filufilu kutya Jehova, Kalunga keni, ita ka twikila okutaataa mo* oiwana oyo ponhele yeni. Otai ka ninga omwiyo, elulo nongola keembuda deni nosho yo omakiya momesho eni, fiyo osheshi mwa xula po medu liwa olo Jehova, Kalunga keni, e mu pa.
14 “Taleni, ondi li pokufya,* nomu shi shii filufilu* kutya kape na ondjovo imwe, yomomaudaneko aeshe mawa, oyo Jehova, Kalunga keni, e mu lombwela inai wanifwa. Adishe ode mu wanifilwa. Kape na nande ondjovo imwe yomudo inai wanifwa. 15 Ndele ngaashi ashike omaudaneko mawa aeshe oo Jehova, Kalunga keni, e mu lombwela e mu wanifilwa, Jehova ote ke mu etela oudjuu aushe oo a popya,* note ke mu komba mo medu liwa olo Jehova, Kalunga keni, e mu pa. 16 Ngeenge omwa nyono ehangano laJehova, Kalunga keni, olo e mu lombwela mu diinine, nongeenge omwa i nokulongela ookalunga vamwe, ndele tamu linyongamene kuvo, Jehova ote ke mu handukila neenghono notamu ka kombwa mo diva medu liwa olo e mu pa.”