Daniel
7 Modula yotete yohamba Belsassar yaBabilon, Daniel okwa twa ondjodi nokwa mona omamoniko omomutwe waye, eshi a nangala kombete yaye. Opo nee okwa shanga ondjodi oyo; okwa shanga ehokololo alishe li na sha noinima oyo. 2 Daniel okwa ti:
“Onda li handi tale momamoniko ange oufiku, ndele tala! eemhepo nhee deulu oda pindjaleka efuta linene. 3 Noilyani ine inene oya dja mefuta keshe shimwe sha yooloka ko kuikwao.
4 “Shotete osha li sha fa onghoshi nosha li shi na omavava onhwa. Onda tala fiyo osheshi omavava asho a dudwa mo, nosha li sha yelulwa ko kedu, nosha kalekwa ofika keemhadi mbali ngaashi omunhu, nosha pewa omutima womunhu.
5 “Ndele tala! ope uya oshilyani shikwao, oshitivali, sha fa emwangha. Osha li sha yelulwa po kombinga imwe, nosha li shi na eemhati nhatu mokanya kasho, pokati komayoo asho; nosha li sha lombwelwa taku ti, ‘Fikama, lya ombelela ihapu.’
6 “Konima yaasho, onda kala handi tale, ndele tala! ope uya oshilyani shikwao sha fa ongwe, ashike kombuda yasho osha li shi na omavava ane, ngaashi oo odila. Noshilyani osho osha li shi na omitwe nhee, nosha li sha pewa eenghonopangelo shi pangele.
7 “Konima yaasho, onda kala handi tale momamoniko oufiku, nonda mona oshilyani oshitine shitilifi, notashi difa omaxwilili, nosha li shi na eenghono dikumwifi, nosha li shi na omayoo manene oshivela shilaula. Osha li tashi xwake nokunyanyaula, naasho sha fyaala po, oshe shi lyataulila pedu nomakasha asho. Osha li sha yooloka ko koilyani ikwao aishe, oyo ye shi tetekela, nosha li shi na eembinga omulongo. 8 Ofimbo handi konenene eembinga odo, tala! oluvinga likwao linini ola mena pokati kado, neembinga nhatu dotete oda li da dudwa mo moipafi yalo. Ndele tala! oluvinga eli ola li li na omesho a fa omunhu, nopa li okanya taka popi nounhwa.*
9 “Onda kala handi tale, fiyo osheshi omalukalwapangelo a tulwa peenhele, nOmuxungu wOmafiku Mahapu okwa kala omutumba. Oikutu yaye oya li itoka ngaashi olumi,* neexwiki dokomutwe waye oda li ngaashi olududi leedi li yela. Olukalwapangelo laye ola li omalaka omundilo; omalola alo okwa li omundilo wa tema. 10 Omakungulukilo omundilo okwa li taa kunguluka, notaa di oko. Eyovi lwomayovi ova kala tave mu longele, nomayovi omulongo a hapupalifwa lwomayovi omulongo ova fikama koshipala shaye. Omhangu oya kala omutumba, nomambo okwa li a nyanunwa.
11 “Onda kala handi tale pefimbo opo, omolwondaka yeendjovo dounhwa* odo oluvinga la li tali popi; onda kala handi tale, fiyo osheshi oshilyani sha dipawa, nolutu lasho ola hanaunwa po, nola yandjwa li xwikwe po momundilo. 12 Ashike shi na sha noilyani aishe, oya li ya kufwa eenghonopangelo dayo, nokukalamwenyo kwayo okwa li kwa lelepekwa oule weetundi nowefimbomudo.
13 “Onda kala handi tale momamoniko oufiku, ndele tala! umwe oo a fa omona womunhu okwa li te uya e li moilemo yokeulu; nokwa li a pitikwa a ye kOmuxungu wOmafiku Mahapu, nove mu eta popepi koshipala shaYe. 14 Nokwa pewa eenghonopangelo, efimano nouhamba, opo ovanhu, oiwana neengudu domalaka adishe di mu longele. Epangelo laye olo epangelo laalushe olo itali xulu po, nouhamba waye itau ka hanaunwa po.
15 “Ashike ame, Daniel, omhepo yange oya li ya nyika oluhodi mwaame omolwomamoniko omomutwe wange oo a tilifa nge. 16 Onda ehena popepi naumwe womwaavo va li va fikama, opo ndi mu pule kutya eshi osha hala lela okutya shike. Opo nee okwa nyamukula nokwa shiivifila nge efatululo loinima ei.
17 “‘Oilyani oyo ya kula i li ine oyo eehamba nhee, odo tadi ka holoka kombada yedu. 18 Ashike ovayapuki vOmupangeli Munenenene otava ka pewa ouhamba, notava ka fyuulula ouhamba fiyo alushe, heeno, alushe fiyo alushe.’
19 “Opo nee onda li nda hala okushiiva shihapu kombinga yoshilyani oshitine, osho sha li sha yooloka ko kuikwao aishe; osha li shitilifi neenghono shi na omayoo oshivela shilaula nomakasha ongopolo, nosha li tashi xwake nokunyanyaula, nokulyataulila pedu nomakasha asho osho sha fyaala po; 20 nosho yo shi na sha neembinga omulongo odo di li komutwe washo, noluvinga likwao, olo la djuuka, olo enya atatu a wa po moipafi yalo, oluvinga olo la li li na omesho nokanya ta ka popi nounhwa,* olo la li tali monika linene li dule makwao.
21 “Onda kala handi tale, eshi oluvinga olo la li tali lwifa ovayapuki, nola li tali va findi, 22 fiyo osheshi Omuxungu wOmafiku Mahapu e uya, netokolo ola ningwa omolwouwa wovayapuki vOmupangeli Munenenene, nefimbo olo la tulwa po ola fika, opo ovayapuki va nangale ouhamba.
23 “Okwa ti ngaha: ‘Shi na sha noshilyani oshitine, ope na ouhamba omutine, oo tau ke uya okukala kombada yedu. Otau ka kala wa yooloka ko komauhamba aeshe makwao, notau ka xwaka po edu alishe, noku li lyataula noku li nyanyaula. 24 Shi na sha neembinga omulongo, otape ke uya eehamba omulongo okudja mouhamba oo; ndele natango, otapa ka holoka ikwao konima yado, oyo tai ka kala ya yooloka ko kwaado dotete, notai ka fifa ohoni eehamba nhatu. 25 Otai ka popya eendjovo di li omhinge nOmukombadambada, notai ka twikila okuhepeka ovayapuki vOmupangeli Munenenene. Otai ka kendabala okulundulula omafimbo nomhango, notava ka yandjwa meke layo oule wefimbo, omafimbo, netatafimbo.* 26 Ashike Omhangu oya kala omutumba, nova kufa ko epangelo layo, opo ve i xulife po noku i hanauna po filufilu.
27 “‘Nouhamba nepangelo neenghonopangelo domauhamba koshi yeulu alishe oda li da pewa ovanhu ovayapuki vOmupangeli Munenenene. Ouhamba wavo oo ouhamba tau kalelele, nomapangelo aeshe otae ke va longela nokudulika kuvo.’
28 “Eli olo exulilo londjodi. Ashike ame, Daniel, omadiladilo ange okwa tilifa nge neenghono; opo nee olutu lange ola pemba.* Ashike onda kaleka oshinima osho momutima wange.”