Omafimbo otete
28 Opo nee David okwa ongela omalenga aeshe aIsrael muJerusalem: omalenga omapata, omalenga oo taa yakula ohamba paengudu, omalenga taa pashukile omayovi nomalenga taa pashukile omafele, omalenga omamona aeshe noimuna aishe yohamba noyovanamati vayo, pamwe nomalenga omombala novalumenhu aveshe ovanaenghono novadiinini. 2 Opo nee David okwa fikama, ndele ta ti:
“Udei nge, ovamwatate noshiwana shange. Onda li nda halelela okutunga eumbo, li li onhele yokukala oshikefa shehangano laJehova noshilyatelo sheemhadi daKalunga ketu. Onda ninga omalongekido oku li tunga. 3 Ndele Kalunga kashili okwa lombwela nge, a ti, ‘Ove ito ka tunga eumbo lokufimanekifila edina lange, molwaashi owa lwa oita inene, nowa tilashi ohonde.’ 4 Ashike Jehova, Kalunga kaIsrael, okwa hoolola nge movaneumbo aveshe vatate ndi ninge ohamba yaIsrael fiyo alushe, molwaashi okwa hoolola Juda, e li omuwiliki, nomepata laJuda okwa hoolola eumbo latate, nomovanamati vatate aame nda hoololwa ndi ninge ohamba yaIsrael ashishe. 5 Movanamati vange aveshe, molwaashi Jehova okwa pa nge ovanamati vahapu, okwa hoolola mo omonamati wange, Salomo, oye a kale omutumba kolukalwapangelo louhamba waJehova, a pangele Israel ashishe.
6 “Okwa lombwela nge, a ti, ‘Omonamati woye, Salomo, oye ta ka tunga eumbo lange noihale yange, molwaashi onde mu hoolola e li omonamati wange, naame ohandi ka ninga xe. 7 Ohandi ka pameka ouhamba waye fiyo alushe, ngeenge okwa diinine filufilu oipango yange nomatokolo ange, ngaashi ta ningi paife.’ 8 Onghee ohandi popi moipafi yOvaisrael aveshe, eongalo alishe laJehova nomomatwi aKalunga ketu, kutya: Diinineni filufilu nokulihonga oipango aishe yaJehova, Kalunga keni, opo mu nangale edu liwa noku li yandja kovanamati veni, ovo tave mu shikula, li li efyuululo laalushe.
9 “Ndele ove, Salomo, omonamati wange, shiiva Kalunga kaxo, noku mu longela nomutima aushe* nomwenyo* u na ehafo,* molwaashi Jehova oha konakona omitima adishe noha panaapana eamo lomadiladilo keshe. Ngeenge owe mu kongo, ota ka efa u mu mone, ndele ngeenge owe mu efa, ote ke ku liteeka po fiyo alushe. 10 Tala, paife Jehova okwe ku hoolola u tunge eumbo li li onhele iyapuki. Kala u na ouladi, ndele to ka longa.”
11 Opo nee David okwa yandja komonamati waye, Salomo, ondungefaneko yokalupale kokufikila, eenduda dayo, eemhungulilo dayo, eenduda dayo dopombada, eenduda dayo domeni nonduda yokukwatakanifa.* 12 Okwe mu pa ondungefaneko yoinima aishe, oyo a hololelwa komhepo yaKalunga,* i na sha noihale yeumbo laJehova neenduda adishe odo de i dingilila, i na sha neemhungulilo deumbo laKalunga kashili neemhungulilo doinima oyo ya ningwa iyapuki;* 13 nosho yo i na sha neengudu dovapristeri nodOvalevi, i na sha noinakuwanifwa aishe yoilonga yeumbo laJehova noilongifo aishe, oyo i na okulongifwa meumbo laJehova; 14 nosho yo i na sha nondjudo yoshingoli, oshingoli shoilongifo aishe yoilonga i lili noku lili, ondjudo yoilongifo aishe yoshisilveri noyoilongifo aishe yoilonga ya yoolokafana; 15 nosho yo nondjudo yoikwatelwalamba yoshingoli neelamba dayo doshingoli, ondjudo yoikwatelwalamba i lili noku lili neelamba dayo, ondjudo yoikwatelwalamba yoshisilveri, noshikwatelwalamba keshe neelamba dasho, she likolelela kokulongifwa kwasho; 16 nosho yo ondjudo yoshingoli shoitaafula yomingome dokutalika, moshitaafula keshe, nosho yo oshisilveri shoitaafula yoshisilveri, 17 yeefoloko, youyaxa, yomakopi oshingoli elela, nondjudo youyaxa voshingoli vanini, yokayaxa keshe kanini, nondjudo youyaxa voshisilveri vanini, mokayaxa keshe kanini. 18 Okwa yandja yo ondjudo yoshingoli elela shoaltari yomatwimino, naayo i lile po etemba, ovakerubi voshingoli va xwaananeka omavava avo nova tuvikila oshikefa shehangano shaJehova. 19 David okwa ti: “Eke laJehova ola li pamwe naame, nokwa pa nge eendunge ndi shange omauyelele aeshe e na sha nondungefaneko.”
20 Opo nee David okwa lombwela omonamati waye, Salomo, a ti: “Kala u na ouladi nowa pama, ndele to ka longa. Ino kala wa tila, ile u mbadapale, molwaashi Jehova Kalunga, Kalunga kange, oku li pamwe naave. Ite ku efa noite ku fiye po, ashike ota ka kala pamwe naave, fiyo osheshi oilonga yomeumbo laJehova ya pwa. 21 Apa ope na eengudu dovapristeri nodOvalevi, ovo tava ka longa oilonga aishe yomeumbo laKalunga kashili. Ou na ovalongi ve na ehalo liwa nounghulungu wokulonga oilonga yoludi keshe nosho yo omalenga. Ovanhu aveshe otava ka dulika komalombwelo oye aeshe.”