Omafimbo otete
15 David okwa twikila nokulitungila omaumbo mOshilando shaDavid, nokwa longekidila Oshikefa shaKalunga kashili onhele, ndele te shi dikile etwali. 2 Okudja opo, David okwa tya: “Kape na oo e na okuhumbata Oshikefa shaKalunga kashili, kakele kOvalevi, molwaashi Jehova okwe va hoolola va humbate Oshikefa shaJehova, nove mu yakule alushe.” 3 Opo nee David okwa ongela Ovaisrael aveshe muJerusalem, va twale Oshikefa shaJehova konhele oyo e shi longekidila.
4 David okwa ongela oludalo laAron nOvalevi: 5 mOvakohat, elenga Uriel novamwaina 120; 6 mOvamerari, elenga Asaia novamwaina 220; 7 mOvagersom, elenga Joel novamwaina 130; 8 moludalo laElisafan, elenga Shemaia novamwaina 200; 9 moludalo laHebron, elenga Eliel novamwaina 80; 10 moludalo laUsiel, elenga Aminadab novamwaina 112. 11 Natango, David okwa ifana ovapristeri Sadok naAbjatar nosho yo Ovalevi, Uriel, Asaia, Joel, Shemaia, Eliel naAminadab, 12 ndele te va lombwele, ta ti: “Nye omitwe domaukwaneumbo omapata Ovalevi. Liyapuleni, nye nosho yo ovamwanyoko, ndele tamu eta Oshikefa shaJehova, Kalunga kaIsrael, konhele oyo nde shi longekidila. 13 Molwaashi kamwa li mwe shi humbata oshikando shotete, Jehova, Kalunga ketu, okwa li e tu handukila, osheshi inatu landula ewiliko laye.” 14 Onghee ovapristeri nOvalevi ove liyapula, opo va ka tale ko Oshikefa shaJehova, Kalunga kaIsrael.
15 Opo nee Ovalevi ova humbata Oshikefa shaKalunga kashili komapepe avo, shi li keepala, ngaashi ashike Moses a popya palombwelo laJehova. 16 Okudja opo, David okwa lombwela omalenga Ovalevi a nangeke po ovamwaina ovaimbi, va imbe omaimbilo nehafo, pamwe noishikomwa: oishikomwa yeengodi, ouxumbafeta nomayaxa.
17 Onghee Ovalevi ova nangeka po Heman, omonamati waJoel; movamwaina oAsaf, omonamati waBerekia, nomovamwaina Ovamerari oEtan, omonamati waKusaja. 18 Ovamwaina vomongudu onhivali, ovo a li pamwe navo ovo: Sakaria, Ben, Jaasiel, Semiramot, Jehiel, Unni, Eliab, Benaia, Maasea, Matitia, Elifeleu naMikneia nosho yo Obed-edom naJeiel, ovapashukili vopoivelo. 19 Ovaimbi Heman, Asaf naEtan ova li ve na okushika omayaxa ongopolo; 20 Sakaria, Jaasiel, Semiramot, Jehiel, Unni, Eliab, Maasea naBenaia, ova li tava shiki oishikomwa yeengodi yoAlamot;* 21 Matitia, Elifeleu, Mikneia, Obed-edom, Jeiel naAsasia, ova li tava shiki ouxumbafeta voSheminit,* tava wilike olwiimbo. 22 Kenania, elenga lOvalevi, okwa li ta pashukile okuhumbatwa kwOshikefa, molwaashi okwa li e na owino, 23 na Berekia naElkana ova li tava pashukile Oshikefa. 24 Ovapristeri Sebania, Josafat, Netanel, Amasai, Sakaria, Benaia naElieser ova li tava shiki omanghuma mokule, ve li popepi nOshikefa shaKalunga kashili, na Obed-edom naJehia navo ova li tava pashukile Oshikefa.
25 David, ovakulunhu vaIsrael nomalenga omayovi ova li va hafa, eshi va li tava i va ka tale oshikefa shehangano laJehova, okudja keumbo laObed-edom. 26 Eshi Kalunga kashili a kwafela Ovalevi, ovo va li va humbata oshikefa shehangano laJehova, ova yamba eendumetana heyali needi heyali deendume. 27 David okwa li a djala okandjafa kehe na omaoko koliina iwa, ngaashi Ovalevi aveshe, ovo va li va humbata Oshikefa, ovaimbi nelenga Kenania, olo la li tali pashukile ovo va humbata Oshikefa nosho yo ovaimbi; David okwa li yo a djala okatetahema koliina. 28 Ovaisrael aveshe ova li va hafa neenghono, eshi va li tava eta oshikefa shehangano laJehova, nova li tava shiki mokule omanghuma a yoolokafana, omayaxa, oishikomwa yeengodi nouxumbafeta.
29 Ndele eshi oshikefa shehangano laJehova she uya mOshilando shaDavid, Mikal, omonakadona waSaul, okwa talela mekende, nokwa mona ohamba David tai nhuka noya hafa, nokwa hovela oku i dina momutima waye.