Daniel
1 Modula onhinhatu yepangelo lohamba Jehoiakim yaJuda, ohamba Nebukadnesar yaBabilon oye uya kuJerusalem noku shi kondeka. 2 Lwanima, Jehova okwa ka yandja ohamba Jehoiakim yaJuda meke layo pamwe noilongifo imwe yomeumbo* laKalunga kashili, nokwe i eta kedu laSinar* keumbo* lakalunga kaye. Okwa tula oilongifo meemhungulilo dakalunga kaye.
3 Opo nee ohamba oya lombwela Aspenas, elenga layo ekulunhu lomombala, a ete Ovaisrael* vamwe, mwa kwatelwa ovo vomoludalo leehamba nolaavo va fimanekwa unene. 4 Ova li ve na okukala ovanyasha* vehe na oshipo, ve na eholokepo liwa, ve yadi ounongo, eshiivo nove na eendunge dokuyoolola, notava dulu okulonga mombala yohamba. Okwa li e na oku va honga okushanga nokulesha nosho yo elaka lOvakaldea. 5 Shikwao vali, ohamba oya li ya yandja elombwelo kutya efiku keshe nava kale tava pewa oikulya tai di meendja dohamba nosho yo momaviinyu, oo hai nu. Ova li ve na okudeulwa* oule weedula nhatu, nopexulilo lefimbo olo, ova li ve na okuhovela oilonga yohamba.
6 Ndele mokati kavo omwa li vamwe va dja mepata* laJuda: Daniel,* Hanania,* Mishael* naAsaria.* 7 Nelenga ekulunhu lomombala ole va luka omadina;* ola luka Daniel edina Beltesasar, Hanania okwa lukwa Sadrak, Mishael okwa lukwa Mesak, na Asaria okwa lukwa Abednego.
8 Ashike Daniel okwa li a tokola momutima waye kutya ite linyateke neendja dohamba, ile nomaviinyu oo hai nu. Onghee okwa pula elenga ekulunhu lomombala epitikilo ehe linyateke monghedi oyo. 9 Na Kalunga kashili okwa ningifa elenga ekulunhu lomombala li file Daniel onghenda* noku mu ulikila olukeno. 10 Opo nee elenga ekulunhu lomombala ola lombwela Daniel la ti: “Onda tila omwene wange ohamba, oo e mu pa oikulya noikunwa. Ongahelipi ngeenge okwa mono kutya ito monika nawa kolutu wa fa ovanyasha* vakweni vepupi loye? Oto ka ningifa nge* ndi kale ndi na ondjo koshipala shohamba.” 11 Opo nee Daniel okwa lombwela omupashukili, oo a nangekwa po kelenga ekulunhu lomombala, a pashukile Daniel, Hanania, Mishael naAsaria, a ti: 12 “Alikana, yeleka ovapiya voye oule womafiku omulongo; natu pewe oikwambidi yonhumba, tu lye, nomeva, tu nwe; 13 opo nee yelekanifa eholokepo letu neholokepo lovanyasha,* ovo hava li eendja dohamba, ndele to ungaunga novapiya voye she likolelela kwaasho to ka mona.”
14 Onghee okwa dimina eetepo lavo nokwe va yeleka oule womafiku omulongo. 15 Pexulilo lomafiku omulongo, ova li ve na eholokepo liwa nove na oukolele* ve dulife ovanyasha* aveshe, ovo hava li eendja dohamba. 16 Onghee omupashukili okwa kala ha kufa po eendja davo nomaviinyu avo, nokwa kala he va pe oikwambidi. 17 Na Kalunga kashili okwa li a pa ovanyasha* ovo vane eshiivo nosho yo eendunge dokunongonona oinima aishe oyo ya shangwa nosho yo ounongo; na Daniel okwa li a pewa eudeko moinima aishe i na sha nomamoniko nosho yo neendjodi.
18 Pexulilo lefimbo, olo ohamba ya yandja va etwe mo, elenga ekulunhu lomombala ola li le va eta koshipala shaNebukadnesar. 19 Eshi ohamba ya popya navo, kapa li umwe mongudu aishe a li a fa Daniel, Hanania, Mishael naAsaria; nova twikila okuyakula koshipala shohamba. 20 Moshinima keshe tashi pula ounongo nosho yo eudeko, osho ohamba ya li tai va pula kombinga yasho, oya mona kutya ove dule lwoikando omulongo ovapristeri veemhule nosho yo ovanyanekeli aveshe mouhamba wayo aushe. 21 Na Daniel okwa kala oko fiyo omodula yotete yohamba Kores.