Hosea
8 “Tula enghuma komulungu woye!
Umwe ote uya ngaashi onhwa ta ponokele eumbo laJehova,
Osheshi ova nyona ehangano lange, nova tauluka omhango yange.
2 Ohava ingida nge tava ti, ‘Kalunga kange, fye, Israel, otu ku shii!’
3 Israel okwa efa po osho shiwa.
Omutondi ne mu taatae.
4 Ova nangeka po eehamba, ndele hakupitila mwaame.
Ova nangeka po omalenga, ashike kandi a shii.
Ova ninga oihongwafano noshisilveri shavo nosho yo noshingoli shavo,
Fiyo va hanauka po.
5 Onhana yoye oye liteekwa po, akutu, Samaria.
Ehandu lange ole va xwamena.
Fiyo onaini tava kala ve na ondjo?*
6 Osheshi eshi osha dja muIsrael.
Omuhambwidi okwe shi ninga, ndele sho kashi fi Kalunga;
Onhana yaSamaria otai ka nyanyaulwa moinhimbu.
7 Osheshi ohava kunu omhepo,
Notava ka teya oshikungulu shomhepo.
Kape na oshihati hashi dala omutwe woshilya wa pya;*
Keshe osho tashi twiyuka itashi ka dja oufila.
Nongeenge osha dala, ovanailongo* otave ke shi pona po.
8 Israel ota ka ponwa po.
Paife otava ka kala mokati koiwana,
Ngaashi oshikwatelwa osho inashi halika.
9 Osheshi ova ya kuAssiria, ngaashi ondongi yoshondolo oyo aike.
Efraim okwe likutila ovaholike noimaliwa.
10 Nonande ove va kuta okudja moiwana,
Paife ohandi ke va ongela;
Otava ka hovela okumona oixuna omolwomutengi, oo va twikwa kohamba nokomalenga.
11 Osheshi Efraim okwa hapupalifa eealtari, a nyone.
Oda ninga eealtari daye dokunyonena.
12 Onda li nde mu shangela oinima ihapu i na sha nomhango* yange,
Ndele oya li ya talika ko i li oshinima shihe shiivike.
13 Ohava yambele nge eeshaliyambo, ndele ohava li po ombelela,
Ashike Jehova ine va hokwa.
Paife ota ka dimbuluka epuko lavo note ke va handukila omolwomanyono avo.
Ova alukila* kuEgipiti.
14 Israel okwa dimbwa Omumi waye, nokwa tunga eetembeli,
Na Juda okwa hapupalifa oilando yomakuma a pama.
Ashike ohandi ka tuma omundilo moilando yaye,
Notau ka lungwinifa po eeshungongulu dakeshe umwe.”