Hosea
9 “Ino hafa, akutu, Israel,
Ino nyakukwa ngaashi oiwana.
Osheshi omolwoumbwada,* owa efa po Kalunga koye.
Owa hokwa ondjabi youmbwada poshipale keshe shoilya.
2 Ashike oshipale nosho yo oshikolelo shomaviinyu itai ke va palula,
Noita ka mona omaviinyu mape.
3 Itava ka twikila okukala medu laJehova;
Ponhele yaasho, Efraim ota ka shuna kuEgipiti,
Notava ka lya osho inashi koshoka muAssiria.
4 Itava ka tililashi vali Jehova omaviinyu oikunwayambo.
Omayambo avo itae ke mu hafifa.
Okwa fa omungome woluhodi;
Aveshe ovo tave u li otave ke linyateka vo vene.
Osheshi omungome wavo owavo ashike ovo aveke;*
Itau uya mo meumbo laJehova.
5 Otamu ka ninga po shike mefiku lokwoongala;*
Mefiku loshivilo shaJehova?
6 Osheshi tala! ove na okuya onhapo omolwehanauno.
Egipiti ote ke va ongela, na Memfis ote ke va paka.
Omakiya otaa ka kala opo pe na oinima yavo yondilo yoshisilveri,
Nomano otaa ka kala momatwali avo.
7 Omafiku etokolo otae uya,
Omafiku ehandukilo otae uya,
Na Israel ote ke shi shiiva.
Omuprofeti wavo ota ka ninga elai, nomulumenhu oo ha ti okwa pewa ounongo kuKalunga ota ka ya eenghwengu;
Osheshi omanyono oye omahapu, naavo ve ku tonde ovahapu.”
8 Omunangeli waEfraim okwa li naKalunga kange,
Ashike paife eendjila adishe dovaprofeti vaye oda fa eemwiyo domuteli woudila;
Omu na outondwe meumbo laKalunga kaye.
9 Ova ningina mo unene menyonauko, ngaashi pefimbo laGibea.
Ota ka dimbuluka epuko lavo noku va handukila omolwomanyono avo.
10 “Onda hanga Israel e li ngaashi omandjebele e li mombuwa.
Onda mona ooxokulululwa ngaashi eenghwiyu, odo hadi pi tete, di li komukwiyu.
Ashike ova ya kuBaal wokuPeor;
Ove liyapulila oshinima shififohoni*
Nova ninga oshinima shitondifa, ngaashi oshinima osho ve hole.
11 Efimano laEfraim otali tuka po ngaashi okadila;
Kape na okudala, okufimbapala nosho yo okuninga eteelelo.
12 Nokuli nonande ova tekule ounona,
Ohandi ke va nyikifa oluhodi fiyo osheshi inapa fyaala omunhu;
Heeno, woo kuvo, ngeenge onda di po puvo!
13 Efraim, oo a twikwa moulifilo muwa, kwaame okwa li a fa Tirus;
Paife, Efraim oku na okweeta ovanamati vaye komudipai.”
14 Akutu, Jehova, yandja kuvo osho u na oku va pa;
Oshidalelo osho ihashi humbata sha nomavele ehe na sha.*
15 “Oilonga yavo aishe ii oya li muGilgal, osheshi oko oko nde va tondela.
Ohandi va taataa mo meumbo lange, omolwoilonga yavo ii.
Itandi ka kala vali ndi va hole;
Omalenga avo aeshe oku na omanganga.
16 Efraim otashi ka kewa po.
Omidi davo otadi ka kukuta, noitava ka imika vali oiimati.
Nokuli nonande ova dale, ohandi ka dipaa oludalo lavo olo liholike.”
17 Kalunga kange ote ke ve liteeka po,
Osheshi inava pwilikina kuye,
Notava ka ninga eenhauki mokati koiwana.