Samuel wotete
15 Samuel okwa lombwela Saul a ti: “Jehova okwa tuma nge ndi ku vaeke u ninge ohamba yoshiwana shaye Israel. Paife pwilikina kwaasho Jehova ta ti. 2 Jehova womatangakwaita ota ti ngaha: ‘Ohandi ka handukila Ovaamalek omolwoshinima osho va ningila Ovaisrael, eshi va li tave va lwifa mondjila yavo okudja kuEgipiti. 3 Paife inda, ndele to ponokele Ovaamalek noku va hanauna po filufilu noinima yavo aishe oyo ve na. Ino xupifa* po nande oumwe. Ou na oku va dipaa, ovalumenhu novakainhu, ounona nouhanana, eengobe needi, eengamelo nosho yo eendongi.’” 4 Saul okwa ongela ovanhu, ndele te va valulile muTelaim. Ovakwaita vokolupadi ova li 200 000 nosho yo ovalumenhu Ovajuda 10 000.
5 Opo nee Saul okwa ya fiyo okoshilando shOvaamalek, ndele te va nangele mefilu. 6 Okwa lombwela Ovakeni, a ti: “Indeni, djeni mo mokati kOvaamalek, opo ndihe mu hanaune po pamwe navo. Osheshi nye omwa ulikila Ovaisrael aveshe ohole i na oudiinini pefimbo opo va li tava di muEgipiti.” Onghee Ovakeni ova dja mo mokati kOvaamalek. 7 Konima yaasho, Saul okwa ponokela Ovaamalek okudja kuHavila fiyo okuSur, osho shi li popepi naEgipiti. 8 Okwa kwata po nomwenyo Agag, ohamba yOvaamalek, ashike ovanhu vakwao aveshe okwe va hanauna po neongamukonda. 9 Ndele Saul novanhu ovo va li pamwe naye ova li va xupifa* Agag nosho yo oimuna aishe oyo ya denga mbada, eengobe, oimuna oyo ya ondoka, eedi deendume noinima aishe oyo ya li iwa. Kava li va hala oku i hanauna po. Ashike oinima aishe, oyo ya li ihe na oshilonga noinai pumbiwa, ove i hanauna po filufilu.
10 Jehova okwa lombwela Samuel, a ti: 11 “Onda nyemata,* eshi nda ninga Saul ohamba, osheshi okwa efa po okushikula nge noina wanifa po eendjovo dange.” Samuel okwa li a handuka unene nokwa twikila okupula ekwafo kuJehova oufiku aushe. 12 Eshi Samuel a penduka ongula inene a ka shakeneke Saul, Samuel okwa lombwelwa kutya: “Saul okwa ya kuKarmel, nokwe lidikila ongudimanya oko. Opo nee okwa tanauka, ndele ta i kuGilgal.” 13 Eshi Samuel a fika puye, Saul okwe mu lombwela a ti: “Jehova ne ku nangeke noupuna. Ame onda wanifa po ondjovo yaJehova.” 14 Ndele Samuel okwa tya: “Eengobe needi odo ndi udite tadi kwena oda dja peni?” 15 Saul okwa tya: “Oda dja kOvaamalek, osheshi ovanhu ova xupifa* eedi neengobe odo diwa, opo di yambelwe Jehova Kalunga koye. Ashike oinima aishe oyo ya xupa po otwe i hanauna po filufilu.” 16 Opo nee Samuel okwa lombwela Saul a ti: “Kanghama, ndi ku lombwele osho Jehova a lombwela nge onguloshi.” Onghee okwa tya: “Popya!”
17 Samuel okwa twikila ta ti: “Kwa li we litala ko ino wana, eshi wa li wa ningwa omutwe womapata Ovaisrael naashi Jehova e ku vaeka u ninge ohamba yOvaisrael? 18 Lwanima, Jehova okwa li e ku tuma a ti: ‘Inda u ka hanaune po filufilu Ovaamalek ovakolokoshi. Va lwifa, fiyo osheshi we va hanauna po.’ 19 Omolwashike ino dulika kondaka yaJehova? Ponhele yaasho, owa kwatwa kolwisho, ndele to endelele u kufe oixuulwa* nowa ninga osho shii momesho aJehova.”
20 Ndele Saul okwa tya kuSamuel: “Ashike onda dulika kondaka yaJehova. Onda ya oko Jehova a tuma nge, nonda etelela ko Agag, ohamba yOvaamalek, ndele handi hanauna po filufilu Ovaamalek. 21 Ndele ovanhu ova kufa eedi neengobe moixuulwa, oinima iwa oyo ya li i na okuhanaunwa po, ve i yambele Jehova Kalunga koye muGilgal.”
22 Opo nee Samuel okwa tya: “Mbela Jehova oha hokwa omaxwikiloyambo nomayambo shi dulife okudulika kondaka yaJehova? Tala, okudulika oku dule omayambo, nokupwilikina oku dule eedi da ondoka, 23 osheshi ounashibofa owa faafana nokunyanekela, nokukukutika omutwe okwa faafana nokulongifa eenghono doumhulile nosho yo oihongwafano.* Molwaashi ino hala okudulika koshipango shaJehova, naye ina hala vali u twikile u li ohamba.”
24 Saul okwa lombwela Samuel a ti: “Onda nyona, osheshi inandi dulika kelombwelo laJehova nokeendjovo doye, molwaashi onda li nda tila ovanhu nonda pwilikina kwaasho va popya. 25 Paife dimine nge po omolwenyono lange, alikana, ndele to shuna naame, opo ndi ke linyongamene Jehova.” 26 Ashike Samuel okwa lombwela Saul a ti: “Itandi shuna naave, osheshi ino dulika kondjovo yaJehova, na Jehova ina hala vali u twikile u li ohamba yOvaisrael.” 27 Eshi Samuel a tanauka a ye, Saul okwe mu kwata mokandjafa kaye, oko kehe na omaoko, ndele taka pomboka. 28 Opo nee Samuel okwa tya kuye: “Okudja nena eli, Jehova ote ku kufa ouhamba waIsrael, ndele te u pe umwe, oo e ku dule. 29 Omunefimano alishe muIsrael ita kala ine shi ninga, ile ita ka lundulula omadiladilo aye,* osheshi ye ina fa ovanhu ovo hava lundulula omadiladilo avo.”*
30 Opo nee okwa tya: “Onda nyona. Ashike fimaneke nge, alikana, moipafi yovakulunhu voshiwana shetu nomoipafi yOvaisrael. Shuna pamwe naame, nohandi ke linyongamena Jehova Kalunga koye.” 31 Onghee Samuel okwa shuna a shikula Saul, na Saul okwe linyongamena kuJehova. 32 Samuel okwa tya: “Eta Agag, ohamba yOvaamalek, popepi naame.” Opo nee Agag okwa ya kuye ta ongaonga,* osheshi Agag okwa li te lipopile ta ti: ‘Inandi tila vali okufya.’* 33 Ashike Samuel okwa tya: “Ngaashi ashike eongamukonda loye la nyikifa oluhodi ovakainhu omolwovana vavo, na nyoko ota ka nyika oluhodi unene mokati kovakainhu vakwao.” Opo nee Samuel okwa teta Agag moinhimbu koshipala shaJehova, muGilgal.
34 Samuel okwa ya kuRama, na Saul okwa ya keumbo laye kuGibea shaSaul. 35 Samuel ina mona vali Saul, fiyo efiku olo a fya, na Samuel okwa lila omolwaSaul. Jehova okwa li a nyemata, eshi a ninga Saul ohamba yOvaisrael.