Samuel wotete
20 David okwa faduka po a dja kuNajot, muRama. Opo nee okwe uya kuJonatan, ndele ta ti: “Onda ninga shike? Onda nyona shike, naxo onde mu ninga shike, opo a kale a hala okudipaa nge?” 2 Opo nee Jonatan okwa tya kuye: “Itashi shiiva; ito fi. Tala, tate ita ningi sha kutya nee osha kwata moiti, ile inashi kwata moiti, ina lombwela nge. Omolwashike tate e na okuholeka nge oshinima osho? Osho itashi ningwa.” 3 Ndele David okwa twikila okwaana ta ti: “Xo oku shi shii kutya ou hole nge, nota ka tya, ‘Jonatan ina pumbwa okushiiva oshinima osho, molwaashi ota kala a handuke.’ Ohandi ane kuJehova Kalunga omunamwenyo kutya, ofimbo u na omwenyo, ame ondi li pokufya.”
4 Opo nee Jonatan okwa tya kuDavid: “Keshe osho to lombwele nge,* ohandi shi ku ningile.” 5 David okwa tya kuJonatan: “Mongula oshivilo shomwedi mupe, nonda teelela nodjuulufi oku ka lya pamwe nohamba. Ou na okulekela nge, nohandi ka hondama kondje yoshilando fiyo okonguloshi yefiku etitatu. 6 Ngeenge xo okwa pula nge, mu lombwela kutya, ‘David okwa pula nge epitikilo, opo a ye divadiva koshilando shavo Betlehem, molwaashi otava ka yandja omayambo okomudo pamwe noukwaneumbo wavo aushe.’ 7 Ngeenge okwa nyamukula kutya, ‘Oshi li nawa,’ osha hala okutya omupiya woye ita ka tila sha. Ashike ngeenge okwa handuka, kala u shi shii kutya okwa tokola okuningila nge owii. 8 Ulikila omupiya woye ohole i na oudiinini, molwaashi owa ninga ehangano nomupiya woye koshipala shaJehova. Ashike ngeenge ondi na ondjo, dipae nge. Omolwashike u na okuyandja nge kuxo?”
9 Opo nee Jonatan okwa tya: “Kashi li pandunge ndi ku diladilile oshinima sha tya ngaho. Ngeenge onda mono kutya tate okwa hala oku ku ningila owii, mbela itandi ku lombwele?” 10 David okwa tya kuJonatan: “Olyelye ta ka lombwela nge, ngeenge xo okwe ku nyamukula nai?” 11 Jonatan okwa tya kuDavid: “Ila tu ye kondje yoshilando.” Opo nee ova ya kondje yoshilando. 12 Onghee Jonatan okwa tya kuDavid: “Jehova Kalunga kaIsrael na ninge ondombwedi kutya ohandi ka popya natate mongula ngaalo, ile mefiku etitatu. Ngeenge okwe ku hokwa, mbela itandi ku tumine etumwalaka ndi ku lombwele? 13 Ndele ngeenge tate okwa diladila oku ku ningila owii, Jehova na katukile nge onghatu, ngeenge inandi ku lombwela, ndele handi ku lekele u ye nombili. Jehova na kale pamwe naave, ngaashi ashike a kala pamwe natate. 14 Mbela ito ulikile nge ohole yaJehova i na oudiinini, ofimbo ndi na omwenyo nongeenge onda fi? 15 Twikila okuulikila oukwaneumbo wange ohole i na oudiinini, nonande Jehova okwa hanauna po ovatondi aveshe vaDavid kombada yedu.” 16 Onghee Jonatan okwa ninga ehangano neumbo laDavid, a ti: “Jehova ita kala ina handukila ovatondi vaDavid.” 17 Jonatan okwa anifa vali David shi na sha noukaume wavo, molwaashi okwa li e mu hole ngaashi e lihole ye mwene.*
18 Jonatan okwa tya kuye: “Mongula oshivilo shomwedi mupe. Otave ke ku yongola, molwaashi poshipundi shoye itapa ka kala omunhu. 19 Mefiku etitatu, otave ke ku lipula unene. Ou na okuya konhele oko wa li wa hondama efiku linya,* ndele to kala popepi nemanya eli. 20 Opo nee ohandi ka umba oikuti itatu kombinga imwe yalo, nda fa handi umbu sha. 21 Eshi handi ka tuma omupiya, ohandi ke mu lombwela kutya, ‘Inda u ka konge oikuti.’ Ngeenge onda lombwele omupiya kutya, ‘Tala, oikuti oya wila popepi naave, i toola po,’ opo nee oto dulu okwaaluka. Ohandi ane medina laJehova Kalunga omunamwenyo kutya, aishe oi li nawa, nokape na oupyakadi. 22 Ashike ngeenge onda ti kuye, ‘Tala, oikuti oi li komesho yoye,’ ou na okuya, molwaashi Jehova okwa hala u ye. 23 Jehova na kale ondombwedi fiyo alushe pokati ketu naave omolweudaneko olo twa ninga.”
24 Onghee David okwa hondama kondje yoshilando. Eshi oshivilo shomwedi mupe sha fika, ohamba oya kala omutumba i lye. 25 Ohamba oya li i li omutumba poshipundi shayo opo hai kala shito pekuma. Jonatan okwa li e i taalela, na Abner okwa li e li omutumba popepi nayo, ashike ponhele yaDavid kapa li omunhu. 26 Saul ina popya sha mefiku olo, ashike okwe lipopila ta ti: ‘Opa ningwa sha osho she mu ningifa a kale ina koshoka. Oku na okukala ina koshoka.’ 27 Mefiku etivali olo la shikula oshivilo shomwedi mupe, ponhele yaDavid inapa kala natango pe na omunhu. Saul okwa pula omonamati waye, Jonatan, a ti: “Omolwashike omonamati waIsai ine uya okulya onghela nonena?” 28 Jonatan okwa nyamukula Saul a ti: “David okwa pula nge epitikilo a ye kuBetlehem. 29 Okwa ti: ‘Kwafele nge ndi ye, molwaashi oukwaneumbo wetu otau ka yamba omayambo koshilando, nomumwamememati okwa ifana nge. Ngeenge owa hokwa nge, alikana, pitike nge ndi ye ndi ka mone ovamwameme.’ Osho osho ine uyila koshitaafula shohamba.” 30 Opo nee Saul okwa li a handukila Jonatan, ndele ta ti kuye: “Omonamati womukainhu omukolokoshi ove, oto ti nghi shi shii kutya owa hoolola okulimanga kumwe nomonamati waIsai, osho tashi ku fifa ohoni nosho yo nyoko?* 31 Ofimbo omonamati waIsai e na omwenyo, ove nouhamba woye itau ka kalelela. Onghee tuma umwe paife e ke mu tale e uye kwaame, molwaashi okwa wana okufya.”*
32 Opo nee Jonatan okwa pula xe, Saul, a ti: “Omolwashike e na okudipawa? Okwa ninga shike?” 33 Onghee Saul okwe mu umba neonga, opo e mu dipae, na Jonatan okwa li a mona kutya xe okwa tokola okudipaa David. 34 Diva Jonatan okwa fikama po poshitaafula a handuka, noina lya sha nande mefiku etivali loshivilo shomwedi mupe, molwaashi okwa li a handuka omolwaDavid, na xe okwa fifa ohoni David.
35 Jonatan okwa ya ongula kondje yoshilando omolweudafano olo va ninga naDavid, nokwa ya pamwe nomupiya waye omunyasha. 36 Jonatan okwa lombwela omupiya waye a ti: “Alikana, tondoka u ka tale oikuti oyo nda umba.” Omupiya okwa tondoka, na Jonatan okwa umba oikuti komesho yomupiya waye. 37 Eshi omupiya a fika konhele oko Jonatan a umbila oshikuti, Jonatan okwa ingida omupiya a ti: “Oshikuti hashosho shi li komesho yoye?” 38 Jonatan okwa ingida omupiya a ti: “Endelela, inda diva! Ino ongaonga!” Omupiya waJonatan okwa toola po oikuti, ndele ta alukile komwene waye. 39 Omupiya ka li e na eshi e shii kombinga yoshinima osho. Jonatan naDavid ovo ashike va li ve shii kombinga yasho. 40 Opo nee Jonatan okwa yandja oilwifo yaye komupiya waye, ndele te mu lombwele ta ti: “I twala koshilando.”
41 Eshi omupiya a ya, David okwa dja po ponhele opo a li a hondama. David okwe linyongamena oshipala sha twa pedu, nokwa twa eengolo lutatu, nova xupitafana, ndele tava lili, ashike David okwa lila neenghono. 42 Jonatan okwa tya kuDavid: “Inda nombili, molwaashi atushe otwa ana medina laJehova, twa ti, ‘Jehova na ninge ondombwedi pokati ketu naave, nopokati koludalo loye noludalo lange fiyo alushe.’”
Opo nee David okwa fikama, ndele ta i, na Jonatan okwa shuna koshilando.