Numeri

31 Jehova okwa lombwela Moses, a ti: 2 “Handukila Ovamidian omolwOvaisrael. Lwanima, oto ka pakwa povakweni.”*

3 Opo nee Moses okwa lombwela ovanhu, ta ti: “Longekideni ovalumenhu tava di mokati keni va ka lwife* Ovamidian, nokuwanifa po elombwelo laJehova mokuhandukila Ovamidian. 4 Ou na okutuma ovanhu 1 000 mepata keshe lomomapata aeshe aIsrael va ye metangakwaita.” 5 Ovanhu omayovi ovo va dja muIsrael, mepata keshe omwa dja 1 000, novanhu 12 000 ova longekidilwa okuya molwoodi.*

6 Onghee Moses okwa tuma metangakwaita ovalumenhu 1 000 va dja mepata keshe, pamwe naPinehas, omonamati womupristeri Eliaser, oo a li e na oilongifo iyapuki nosho yo enghuma loita meke laye. 7 Ova lwifa Ovamidian, ngaashi naanaa Jehova a lombwela Moses, nova dipaa ovalumenhu aveshe. 8 Ova dipaa yo eehamba dOvamidian, Evi, Rekem, Sur, Hur naReba, eehamba nhano daMidian pamwe naavo va dipawa. Ova dipaa yo Bileam, omonamati waBeor, neongamukonda. 9 Ndele Ovaisrael ova kwata ko ovakainhu nounona Ovamidian ve va ninge eenghwate. Ova nyeka ko yo oinamwenyo yavo aishe yopovanhu, oimuna yavo aishe noiniwe yavo aishe. 10 Oilando yavo aishe omo va li hava di neenhanda davo adishe* ove di xwika po nomundilo. 11 Ova kufa oixuulwa* aishe, oinima aishe oyo va nyeka ko, ovanhu noinamwenyo. 12 Ova eta eenghwate, oinima oyo va nyeka ko noixuulwa kuMoses, komupristeri Eliaser nokongudu aishe yOvaisrael, konhanda oyo ya li momaluhaela aMoab, popepi naJordan puJeriko.

13 Opo nee Moses, omupristeri Eliaser nomalenga aeshe ongudu okwa dja mo e ke va shakeneke kondje yonhanda. 14 Ndele Moses okwa li a handukila ovalumenhu ovo va nangekwa po, ovo va li metangakwaita, omalenga oo taa pashukile omayovi, omalenga oo taa pashukile omafele, oo a li tae uya mo taa di kolwoodi. 15 Moses okwa tya kuvo: “Omolwashike mwa efa ovakainhu aveshe va kale nomwenyo? 16 Tala, ovo ovo va pukifa Ovaisrael vaha kale ovadiinini kuJehova moshinima shi na sha naPeor, palombwelo laBileam, naasho osha etifa ehandukilo mongudu yaJehova. 17 Paife ou na okudipaa okaana keshe kokamati nou na okudipaa omukainhu keshe oo a ya momilele nomulumenhu. 18 Ndele ou na okweefa oukadona aveshe ovo inava ya momilele nomulumenhu va kale nomwenyo. 19 Omu na okukala hamu di kondje yonhanda omafiku aheyali. Keshe umwe womunye oo a dipaa omunhu,* nakeshe umwe womunye oo a kuma omunhu a dipawa oku na okulikoshola ye mwene mefiku etitatu, nomefiku etiheyali, onye neenghwate deni. 20 Oshikutu keshe, oshinima keshe sha longwa moshipa, oshinima keshe sha longwa molududi loikombo noshinima keshe sha longwa moshiti, omu na oku shi koshola komatimba.”

21 Opo nee omupristeri Eliaser okwa lombwela ovalumenhu vometangakwaita, ovo va ile kolwoodi, ta ti: “Ei omhango* oyo Jehova a yandja kuMoses; 22 ‘Oivela, ngaashi oshingoli, oshisilveri, ongopolo, oshivela shilaula, oipapa noholo, 23 oyo ashike mu na okweendifa momundilo, keshe osho ihashi lungwina po komundilo, opo nee otashi kala sha koshoka. Kakele kaasho, oshi na yo okukoshwa nomeva okukoshola. Keshe osho itashi dulu okweenda momundilo, omu na oku shi endifa momeva. 24 Omu na okukosha oikutu yeni mefiku etiheyali, notamu kala mwa koshoka, opo nee otamu dulu okuuya monhanda.’”

25 Jehova okwa tya kuMoses: 26 “Valuleni oinima oyo ya kwatwa ko, ovanhu ovo ve li eenghwate nosho yo oimuna; osho shi ningeni nomupristeri Eliaser nosho yo nomitwe domaukwaneumbo omapata ongudu. 27 Tukuleni oinima oyo ya kwatwa ko moitukulwa ivali, opo i tukulilwe ovo ve li metangakwaita, ovo va li va ya kolwoodi nosho yo ongudu aishe. 28 Shi na sha noifendela yaJehova, omu na okukufa omwenyo* umwe womovakwaita keshe 500, ovo va ile kolwoodi, movanhu, meengobe, meendongi nomeedi. 29 Omu na oku i kufa moipambuliko yavo, ndele tamu i yandje komupristeri Eliaser i li omayambidido aJehova. 30 Moipambuliko oyo ya yandjwa kOvaisrael, omu na okukufa mo shimwe shomoipambuliko 50, movanhu, meengobe, meendongi, meedi nomoinamwenyo yopovanhu yoludi keshe, ndele tamu shi yandje kOvalevi ovo tava wanifa po oinakuwanifwa i na sha netwalihangano laJehova.”

31 Onghee Moses nomupristeri Eliaser ova ninga naanaa ngaashi Jehova a lombwela Moses. 32 Oixuulwa, oinima aishe oyo ovakwaita va kufa ko oya li eedi 675 000, 33 eengobe 72 000 34 neendongi 61 000. 35 Ovakainhu ovo inava ya momilele nomulumenhu ova li ovakainhu* 32 000. 36 Oshixupe osho sha li oshipambuliko shaavo va ile molwoodi osha li eedi 337 500. 37 Oifendela yaJehova, oyo ya dja meedi odo, oi li 675. 38 Meengobe 36 000 omwa dja oifendela yaJehova 72. 39 Meendongi 30 500 omwa dja oifendela yaJehova 61. 40 Movanhu* 16 000 omwa dja oifendela yaJehova, ovanhu* 32. 41 Opo nee Moses okwa yandja komupristeri Eliaser oifendela i li omayambidido aJehova, ngaashi naanaa Jehova a lombwela Moses.

42 Oipambuliko yOvaisrael, oyo Moses a tukula, ya dja moipambuliko yovalumenhu ovo va ile kolwoodi, 43 oya li eedi 337 500, 44 eengobe 36 000, 45 eendongi 30 500, 46 novanhu* 16 000. 47 Opo nee Moses okwa kufa shimwe shomoipambuliko 50 yOvaisrael movanhu nomoimuna, ndele te i pe Ovalevi, ovo va li tava wanifa po oinakuwanifwa yometwalihangano laJehova, ngaashi ashike Jehova a lombwela Moses.

48 Opo nee ovalumenhu omayovi ovo va nangekwa po metangakwaita, omalenga taa pashukile omayovi, omalenga taa pashukile omafele, ova ya kuMoses, 49 ndele tava ti kuye: “Ovapiya voye ova valula ovalumenhu ovakwaita ovo ve li koshi yepashukilo letu, ndele inapa lopotwa nande oumwe a kana po pufye. 50 Onghee keshe umwe womufye na yandje kuJehova osho a mona shi li eyambo, oshingoli, oivela yopeemhando, oivela yokoikesho, eelinga doihako, outenda vomomatwi, noikwaivela imwe, opo tu likoshole* koshipala shaJehova.”

51 Moses nomupristeri Eliaser ova tambula ko kuvo oshingoli noikwaivela aishe. 52 Oshingoli ashishe osho va yandja kuJehova oshi fike peesekeli* 16 750, sha dja komalenga oo taa pashukile omayovi nokomalenga oo taa pashukile omafele. 53 Omulumenhu keshe wometangakwaita okwe likufila ye mwene oinima oyo ya kwatwa ko. 54 Moses nomupristeri Eliaser ova tambula ko oshingoli osho sha dja komalenga oo taa pashukile omayovi nokomalenga oo taa pashukile omafele, nove shi twala metwali lokwoongalela shi li edimbulukifo lOvaisrael koshipala shaJehova.