Exodus
26 “Ou na okutunga etwalihangano nomalapi omulongo oku li uvika, a longwa meengodi diwa doliina da hodilwa, meengodi dimbulau, molududi leedi lipeepela nomoshiyata shitilyana. Ou na oku a hondja e na omafano ovakerubi. 2 Elapi keshe oli na okukala li na oule womukokomoko womaludimbo* 28, nounene womaludimbo 4. Omalapi aeshe oku na okukala e fike pamwe. 3 Omalapi atano oku na okuhondjelwa kumwe a ninge elapi limwe, nomalapi makwao atano oku na okuhondjelwa kumwe a ninge elapi limwe. 4 Ou na okuhondjela ko oukongo vongodi imbulau komingenge delapi olo la shiya pomashakeneno omalapi makwao, nou na okuninga sha faafana nelapi olo li li komungenge womalapi makwao opo taa ka shakena namakwao atano. 5 Ou na okuninga oukongo 50 kelapi limwe, noukongo 50 komungenge welapi likwao, opo va dule okutaalelafana, eshi tava ka patelwa kumwe. 6 Ou na okuninga ouhakifo 50 voshingoli, nokutula kumwe omalapi nouhakifo ovo, netwalihangano otali ka ninga oshitukulwa shimwe.
7 “Ou na yo okuninga omalapi okombada yetwalihangano molududi loikombo. Ou na okuninga omalapi 11. 8 Elapi keshe oli na okukala li na oule womukokomoko womaludimbo 30 nounene womaludimbo 4. Omalapi aeshe 11 oku na okukala e fike pamwe. 9 Ou na okuhondjela kumwe omalapi atano nokuhondjela kumwe makwao ahamano, nou na okutonya elapi etihamano, olo li li komesho yetwalihangano. 10 Ou na okuninga eembululu 50 komungenge welapi limwe, olo li li pomashakeneno omalapi oo a hondjelwa kumwe, nou na yo okuninga eembululu 50 komungenge welapi likwao, olo li li komunghulo, opo taa shakene. 11 Ou na okuninga ouhakifo 50 vongopolo, nokutula ouhakifo ovo moukongo, ndele to tula kumwe omalapi oo, notaa ka ninga oshitukulwa shimwe. 12 Oshitukulwa shikwao shelapi osho sha xupa ko oshi na okukala sha endjelela. Oshitukulwa shikwao shelapi osho sha xupa ko otashi ka kala sha endjelela konima yetwalihangano. 13 Oshitukulwa shikwao shelapi osho sha xupa ko otashi ka endjelela ketwalihangano, kombinga keshe oludimbo limwe, opo shi uvike etwalihangano.
14 “Ou na yo okuninga ofaila yokuuvika etwalihangano ya longwa moipa yeedi deendume, ya fumikwa moluvala litilyana, nokombada yayo ou na okuuvika ko ofaila ya longwa moipa yeembwa domomeva.
15 “Ou na okuningila etwalihangano eelama da yukilila da longwa moiti yomwoonde. 16 Olama keshe oi na okukala i na oule wopombada womaludimbo omulongo nounene woludimbo limwe netata. 17 Olama keshe oi na okukala i na oupilangi* vavali koshi va shaama. Eelama adishe detwalihangano osho u na oku di ninga ngaho. 18 Ou na okuninga eelama 20 kombinga yokolukadi yetwalihangano, da taalela kolukadi.
19 “Ou na okuninga oikwatelwamhadi 40 yoisilveri koshi yeelama 20: koshi yolama imwe oku na okukala oikwatelwamhadi ivali yokutula oupilangi vayo vavali, nokoshi yolama ya shikula ko oikwatelwamhadi ivali yokutula oupilangi vayo vavali. 20 Kombinga ikwao yetwalihangano, kombinga yokolundume, ou na okuningila ko eelama 20 21 noikwatelwamhandi 40 yoshisilveri, oikwatelwamhadi ivali okoshi yolama imwe, nokoshi yolama keshe ya shikula ko oikwatelwamhadi ivali. 22 Koshitukulwa osho shi li konima yetwalihangano kouninginino, ou na okutula ko eelama hamano. 23 Ou na okuninga eelama mbali di kale onga eengudi domeehuke mbali dokonima yetwalihangano. 24 Odi na okuningwa moitukulwa ivali ya faafana, ya tulwa kumwe okudja pedu fiyo opombada, da twa moshikongo shotete. Adishe osho di na okuningwa ngaho, notadi ka ninga eengudi mbali domeehuke. 25 Onghee kombinga oko otaku ka kala eelama hetatu pamwe noikwatelwamhadi yado 16 yoshisilveri, koshi yolama keshe oikwatelwamhadi ivali nokoshi yolama keshe ya shikula ko oikwatelwamhadi ivali.
26 “Ou na okuninga eenghambo moiti yomwoonde, nhano odeelama dokombinga imwe yetwalihangano, 27 neenghambo dikwao nhano odeelama, odo di li kombinga ikwao yetwalihangano, neenghambo dikwao nhano odeelama, odo di li kouninginino wetwalihangano, koshitukulwa shokonima. 28 Onghambo oyo ya enda pokati keelama, oi na okudja kohuke imwe fiyo okohuke ikwao.
29 “Eelama ou na oku di vaeka noshingoli, nou na oku di ningila oikongo yoshingoli, i li oikwatifo yeenghambo, neenghambo ou na oku di vaeka noshingoli. 30 Ou na okutunga etwalihangano she likolelela komudutilo oo wa li wa ulikilwa komhunda.
31 “Ou na okuninga etukulifolapi la longwa meengodi dimbulau, molududi leedi lipeepela, moshiyata shitilyana nosho yo meengodi diwa doliina da hodilwa. Ou na oku li hondja li na omafano ovakerubi. 32 Ou na oku li tulika keengudi nhee domwoonde da vaekwa noshingoli. Oulekifo vado ove na okukala voshingoli. Eengudi odi na okutulwa moikwatelwamhadi ine yoshisilveri. 33 Ou na okutulika etukulifolapi kouhakifo nokweeta oshikefa shOipelende yOumbangi konima yetukulifolapi. Etukulifolapi otali ka tongola pokati kOuyapuki nOuyapuki elela. 34 Ou na okutula ko oshituviko koshikefa shOipelende yOumbangi osho shi li mOuyapuki elela.
35 “Ou na okutula oshitaafula pondje yetukulifolapi noshikwatelwalamba kolukadi letwalihangano, sha taalela oshitaafula, noshitaafula ou na oku shi tula kolundume. 36 Ou na okuninga oshiidilifoyata* shoposhivelo shetwalihangano sha tungwa meengodi dimbulau, molududi leedi lipeepela, moshiyata shitilyana nomeengodi diwa doliina da hodilwa, ya hondjelwa kumwe. 37 Oshiidilifoyata* ou na oku shi ningila eengudi nhano domwoonde noku di vaeka noshingoli. Oulekifo vado ove na okukala voshingoli, nou na oku di ningila oikwatelwamhadi itano yongopolo.