Omafimbo omativali
33 Manasse okwa ninga ohamba, eshi a li e na eedula 12, nokwa pangela muJerusalem oule weedula 55.
2 Okwa longa osho shii momesho aJehova, ta shikula oilonga itondifa, oyo ya longwa koiwana, oyo Jehova a taataa mo moipafi yOvaisrael. 3 Okwa tungulula eenhele dokoikulundudu, odo xe, Hiskia, a hanauna po, a ningila ooBaal eealtari nokwa ninga eepala diyapuki,* nokwe linyongamena etangakwaita alishe lokeulu noku li longela. 4 Okwa tunga yo eealtari meumbo laJehova, olo Jehova a popya kombinga yalo, a ti: “MuJerusalem, edina lange otali ka kala mo fiyo alushe.” 5 Okwa tungila etangakwaita alishe lokeulu eealtari moihale ivali yomeumbo laJehova. 6 Okwa endifa ovanamati vaye momundilo mEfilu lOmonamati waHinnom; okwa li omhule, ha nyanekele, omulodi, nokwe likongela ovo hava kwatafana neemhepo nosho yo ovaxunganeki vonakwiiwa. Okwa longa osho shii unene momesho aJehova, opo e mu nyemateke.
7 Okwa li a tula oshihongwafano, osho a honga, meumbo laKalunga kashili, olo Kalunga a lombwela David nosho yo omonamati waye, Salomo, kombinga yalo, a ti: “Meumbo eli nomuJerusalem, oo nda hoolola momapata aeshe aIsrael, ohandi ka tula mo edina lange li kale mo fiyo alushe. 8 Itandi ka taataa vali Ovaisrael medu olo nda pa ooxekulululwa, ngeenge otava dulika filufilu kwaashishe osho nde va lombwela, kOmhango aishe, komaufomhango nokomatokolo, oo a yandjwa okupitila muMoses.” 9 Manasse okwa kala ta pukifa Juda nosho yo ovakalimo vomuJerusalem, e va ningifa va longe osho shii neenghono ve dule oiwana oyo Jehova a hanauna po moipafi yOvaisrael.
10 Jehova okwa kala ta popi naManasse nosho yo oshiwana shaye, ndele inava pwilikina. 11 Onghee Jehova okwe va tumina eendjai detangakwaita lohamba yaAssiria, di va lwife, noda kwata Manasse neengona* noku mu manga nomalyenge avali ongopolo, ndele tadi mu twala kuBabilon. 12 Eshi a li moudjuu, okwa indila Jehova, Kalunga kaye, e mu file onghenda,* nokwa twikila okulininipika unene koshipala shaKalunga kooxekulululwa. 13 Okwa kala ta ilikana kuKalunga, na Kalunga okwa li e linyengifwa keindilo laye nokwe mu uda, eshi te mu pula e mu file onghenda. Onghee Kalunga okwa li e mu shunifa mouhamba waye kuJerusalem. Okudja opo, Manasse okwa li a shiiva kutya Jehova oye Kalunga kashili.
14 Konima yaasho, okwa tunga ekuma kondje yOshilando shaDavid mefilu, kouninginino waGihon, nola ya fiyo okOshivelo shEeshi. Okwa twikila oku li tunga, la dingilila Ofel, nokwe li tunga la ya pombada. Shikwao vali, okwa nangeka po eendjai detangakwaita moilando aishe ya dingililwa komakuma a pama muJuda. 15 Opo nee okwa kufa mo ookalunga vokoilongo nosho yo oihongwafano meumbo laJehova, nokwa hanauna po eealtari adishe, odo a li a tunga komhunda, oko kwa li ku na eumbo laJehova, nosho yo muJerusalem, nokwe di ekela kondje yoshilando. 16 Okwa li yo a longekida oaltari yaJehova, ndele ta hovele okuyambela ko omayambo oukumwe nosho yo omapanduloyambo, nokwa li a lombwela Ovajuda va longele Jehova, Kalunga kaIsrael. 17 Nonande ovanhu ova li ashike tava yambele Jehova, Kalunga kavo, omayambo, natango ova li tava yambele keenhele dokoikulundudu.
18 Ondjokonona aishe yaManasse, eilikano laye kuKalunga kaye nosho yo eendjovo dovamonikokule, ovo va popya naye medina laJehova, Kalunga kaIsrael, oya shangwa mondjokonona yeehamba daIsrael. 19 Natango, eilikano laye nanghee eindilo laye la nyamukulwa, omatimba aye aeshe nosho yo okuhenoudiinini kwaye, eenhele opo a li a tunga eenhele dokoikulundudu nokwa dika po eepala diyapuki,* noihongwafano oyo a tula po, ofimbo ine lininipika, oya shangwa meendjovo dovamonikokule vaye. 20 Opo nee Manasse okwa nangekwa pooxekulululwa, nove mu paka peumbo laye; omonamati waye, Amon, okwa ninga ohamba ponhele yaye.
21 Amon okwa ninga ohamba, eshi a li e na eedula 22, nokwa pangela muJerusalem oule weedula mbali. 22 Okwa twikila okulonga osho shii momesho aJehova, ngaashi ashike xe, Manasse, a li a ninga. Amon okwa yambela oihongwafano aishe, oyo ya hongwa kuxe, Manasse, nokwa kala te i longele. 23 Amon ka li e lininipika koshipala shaJehova, ngaashi xe, Manasse, a li e lininipika; ponhele yaasho, okwa twikila okulonga osho shii. 24 Xuuninwa, ovapiya vaye ove mu pangelela omhangela, nova li ve mu dipaela meumbo laye. 25 Ashike ovanhu vomoshilongo ova li va dipaa aveshe ovo va li va pangelela ohamba Amon omhangela, nova li va ninga omonamati waye, Josia, ohamba ponhele yaye.