Omafimbo omativali
36 Opo nee ovanhu vomoshilongo ova kufa Joahas, omonamati waJosia, nove mu ninga ohamba yaJerusalem ponhele yaxe. 2 Joahas okwa ninga ohamba, eshi a li e na eedula 23, nokwa pangela muJerusalem oule weemwedi nhatu. 3 Ashike ohamba yaEgipiti oye mu kufa mo muJerusalem noya futifa ovakalimo vomoshilongo oitalenti* yoisilveri 100 nosho yo oshitalenti shoshingoli. 4 Shikwao vali, ohamba yaEgipiti oya ninga omumwaina waJoahas, Eliakim, ohamba yaJuda noyaJerusalem noye mu lukulula, ndele ta ningi Jehoiakim. Ashike Neko okwa kufa omumwaina Joahas, ndele te mu twala kuEgipiti.
5 Jehoiakim okwa ninga ohamba, eshi a li e na eedula 25, nokwa pangela muJerusalem oule weedula 11. Okwa twikila okulonga osho shii momesho aJehova, Kalunga kaye. 6 Nebukadnesar, ohamba yaBabilon, okwe uya oku mu lwifa nokwe mu manga nomalyenge avali ongopolo, ndele te mu twala kuBabilon. 7 Nebukadnesar okwa kufa oilongifo imwe yomeumbo laJehova, ndele te i twala kombala yaye kuBabilon. 8 Ondjokonona aishe yaJehoiakim, oinima ii noitondifa oyo a ninga, oya shangwa mEmbo lEehamba daIsrael nodaJuda. Omonamati waye, Jehoiakin, okwa ninga ohamba ponhele yaye.
9 Jehoiakin okwa ninga ohamba, eshi a li e na eedula 18, nokwa pangela muJerusalem oule weemwedi nhatu nomafiku omulongo. Okwa twikila okulonga osho shii momesho aJehova. 10 Pehovelo lodula,* ohamba Nebukadnesar oye mu tuma a etwe kuBabilon, pamwe noinima yongushu yomeumbo laJehova. Opo nee okwa ninga omumwaina waxe yaJehoiakin, Sedekia, ohamba yaJuda naJerusalem.
11 Sedekia okwa ninga ohamba, eshi a li e na eedula 21, nokwa pangela muJerusalem oule weedula 11. 12 Okwa twikila okulonga osho shii momesho aJehova, Kalunga kaye. Ine lininipika koshipala shomuprofeti Jeremia, oo a popya naye palombwelo laJehova. 13 Okwa tukululila yo oshibofa ohamba Nebukadnesar, oyo ye mu anifa koshipala shaKalunga. Okwa kala omutangalali,* a kukutika omutima waye nokwaanya okwaalukila kuJehova, Kalunga kaIsrael. 14 Ovapashukili aveshe vovapristeri nosho yo ovanhu kava li ovadiinini nandenande. Ova longa oilonga aishe itondifa, oyo hai longwa koiwana, nova nyateka eumbo laJehova, olo a yapula muJerusalem.
15 Jehova, Kalunga kooxekulululwa, okwa kala te va londwele okupitila movatumwa vaye. Okwa kala te va londwele lwoikando, molwaashi okwa li e uditile olukeno oshiwana shaye nosho yo onhele yaye yokukala. 16 Ashike ova kala tava sheke ovatumwa vaKalunga kashili, va dina eendjovo daye nova sheka ovaprofeti vaye, na Jehova okwa li a handukila neenghono oshiwana shaye, fiyo osheshi itashi dulu vali okuxupifwa.
17 Onghee okwe va tumina ohamba yOvakaldea i va lwife, oyo ya dipaela motembeli ovalumenhu vavo ovanyasha neongamukonda. Inai kenukila ovalumenhu ovanyasha, ile oukadona elela, ovanamido, ile ovo va nghundipala. Kalunga okwa yandja oinima aishe meke layo. 18 Oilongifo aishe yomeumbo laKalunga kashili, ya kula nainini, nosho yo omamona omeumbo laJehova, omamona ohamba noomalenga ayo, aishe okwe i twala kuBabilon. 19 Okwa xwika po eumbo laKalunga kashili, a hanauna po ekuma laJerusalem, a xwika po nomundilo eeshungongulu dasho adishe da pama nokwa hanauna po oinima aishe i na ongushu. 20 Ovo inava fya keongamukonda, okwe va twala moukwatwa kuBabilon, nova ninga ovapiya vaye novovanamati vaye, fiyo osheshi ouhamba waPersia wa hovela okupangela, 21 opo eendjovo daJehova, odo a popya okupitila muJeremia di wanifwe po, fiyo osheshi edu la futila po omashabata alo. Edu ola kala la tulumukwa, fiyo osheshi eedula 70 da wanifwa.
22 Opo eendjovo daJehova, odo a popya okupitila muJeremia, di wanifwe po, Jehova okwe linyengifa* Kores, ohamba yaPersia, modula yaye yotete a shiivife mouhamba waye aushe etumwalaka tali shikula, olo a li yo a shangifa, a ti: 23 “Eshi osho Kores, ohamba yaPersia, ta ti, ‘Jehova, Kalunga komeulu, okwa pa nge omauhamba aeshe okombada yedu, nokwa lombwela nge ndi mu tungile eumbo muJerusalem, osho shi li muJuda. Keshe oo e li mokati keni womoshiwana shaye, Jehova, Kalunga kaye, na kale pamwe naye, nokuya kuJerusalem.’”