Omayeletumbulo
28 Ovakolokoshi ohava i onhapo, nonande kape na oo te va taataa,
Ndele ovayuki ove na ouladi ngaashi onghoshi.*
2 Ngeenge ovanhu moshilongo ihava dulika komhango,* omalenga ohaa pingenwa po luhapu,
Ndele kekwafo laao e na eendunge dokuyoolola nosho yo eshiivo, elenga otali kala po fiyo alushe.
3 Omukwanaluhepo oo ta kengelele omudinwa
Oku li ngaashi odula, oyo tai kombolola po oikulya aishe.
4 Ovo ihava dulika komhango ohava tange ovakolokoshi,
Ndele ovo hava dulika komhango ohava kala ve va handukila.
5 Ovakolokoshi kave udite ko osho sha yuka,
Ndele ovo hava kongo Jehova otava dulu okuuda ko oinima aishe.
6 Ohepele oyo hai kanyatele oudiinini wayo oi li xwepo
I dulife oshipuna osho shi na eendjila da ngolyauka.
7 Omonamati oo e na eudeko oha diinine omhango,
Ndele oo ha endafana novafukenhu ota fifa xe ohoni.
8 Ou ta hapupalifa emona laye mokupula oishoshela nokulondeka ondado shihe li pauyuki,
Emona laye otali ka ninga laao ha file onghenda eehepele.
9 Ou ta anye okudulika komhango,
Nokuli nomailikano aye omatondifa kuKalunga.
10 Ou ta pukifa omuyuki a longe owii ota ka wila melambo laye mwene,
Ndele ovo vehe na ondjo otava ka fyuulula oinima iwa.
11 Oshipuna oshi na eendunge momesho asho vene,
Ndele ohepele oyo i na eendunge dokuyoolola otai ka mona kutya osha tya ngahelipi lela.
12 Ngeenge ovayuki ova pondola, ohapa kala efimano linene,
Ndele ngeenge ovakolokoshi ova ningi eenghono, ovanhu ohava hondama.
13 Ou ta holeke omanyono aye ita ka pondola,
Ndele ou te a hepaulula noku a efa po ota ka filwa onghenda.
14 Omunhu oo te lipashukile alushe* ota kala a hafa,
Ndele keshe oo ta kukutike omutima waye ota ka wila moupyakadi.
15 Ngaashi onghoshi tai kumbu nosho yo emwangha la handuka tali endelele okuponokela oshihakanwa,
Omupangeli omukolokoshi, oo ta pangele ovanhu ovo itava dulu oku mu kondjifa, naye osho e li.
16 Omupangeli oo ehe na eendunge dokuyoolola oha longifa nai eenghonopangelo daye,
Ndele oo e tonde eliko loipupulu ota lelepeke okukalamwenyo kwaye.
17 Omunhu oo a dipaa umwe* ota kala alushe ta i onhapo fiyo omombila.*
Hamunhu e mu yambidida.
18 Oo ehe na ondjo mokweenda kwaye ota ka xupifwa,
Ndele oo e na eendjila da ngolyauka ota ka punduka ombadilila.
19 Ou ta limi epya laye ota ka kala e na oikulya ihapu,
Ndele ou ta lalakanene oinima yongaho ota ka fya ondjala.
20 Omunhu omudiinini ota ka mona omanangeko noupuna mahapu,
Ndele ou ha endelele okupunapala ota ka kala e na ondjo.
21 Kashiwa okukala nokatongo;
Ndele omunhu otashi dulika a longe owii omolwokapambu komungome.
22 Omunhu oo e na olwisho oha kala a halelela oupuna,
Ndele ke shi shii kutya ota ka hangwa koluhepo.
23 Keshe oo ta pukulula umwe ota ka kala a fimanekwa neenghono
Shi dulife oo e na okambweenga.
24 Keshe oo ta nyeke xe naina, ndele ta ti: “Inashi puka,”
Oku li kaume kaao ta etifa ehanauno.
25 Omunhu oo e na olwisho* ota etifa okuhaudafana,
Ndele keshe oo e lineekela Jehova ota ka punapala.*
26 Keshe oo e lineekela momutima waye mwene elai,
Ndele ou e na ounongo ota ka xupifwa.
27 Ou ta yandje kohepele ita ka hepa sha,
Ndele oo ite i kwafele ota ka mona omafingo mahapu.
28 Ngeenge ovakolokoshi ova kala ve na eenghono, omunhu ota hondama,
Ndele ngeenge ova xulu po, ovayuki otava hapupala.