Samuel wotete
13 Saul okwa ninga ohamba eshi a li e na eedula . . .,* nokwa pangela muIsrael ashishe oule weedula mbali. 2 Saul okwa hoolola ovalumenhu 3 000 muIsrael. Ovalumenhu 2 000 vomuvo ova li naSaul kuMikmas nokoshitukulwa shokeemhunda shaBetel. Novalumenhu vakwao 1 000 ova li pamwe naJonatan puGibea shaBenjamin. Okwa lekela ovanhu aveshe va ye, nakeshe umwe okwa ya ketwali laye. 3 Opo nee Jonatan okwa dipaa ongudu yovakwaita Ovafilisti, ovo va li muGeba, nOvafilisti ove shi uda. Saul okwa yandja elombwelo, opo ovanhu va shike enghuma moshitukulwa ashishe, tava ti: “Ovaheberi nave shi ude!” 4 Ovaisrael aveshe ova li va uda onghundana oyo kutya, “Saul okwa dipaa ongudu yovakwaita Ovafilisti, nOvafilisti ova tonda Ovaisrael.” Onghee ovanhu ova li va lombwelwa va shikule Saul kuGilgal.
5 Ovafilisti navo ova li va ongala va lwife Ovaisrael, ve na omatemba oita 30 000, ovalondinghambe 6 000 nomatangakwaita mahapu ngaashi ehekedu lopomunghulo wefuta. Ova ya, ndele tava ongo onhanda muMikmas, koushilo waBet-aven. 6 Ovalumenhu Ovaisrael ova mona kutya ove li moupyakadi, molwaashi ova li tava fininikwa neenghono. Onghee ovanhu ova hondama momakololo, momambulukwena, momifya domamanya, komikwena* nosho yo meendungu. 7 Nokuli nOvaheberi vamwe ova tauluka omulonga waJordan, ndele tava i kedu laGad nolaGilead. Ashike Saul okwa li natango muGilgal, novanhu aveshe, ovo va li ve mu shikula, ova li tava kakama, molwaashi ova li va tila. 8 Okwa kala a teelela oule womafiku aheyali, fiyo efimbo* olo Samuel a popya la fika, ashike Samuel ine uya kuGilgal, novanhu ovo va li pamwe naSaul ove mu fiya po. 9 Xuuninwa, Saul okwa tya: “Etelei nge omaxwikiloyambo nomayambo oukumwe.” Opo nee okwa yamba omaxwikiloyambo.
10 Diva eshi Saul a mana okuyamba omaxwikiloyambo, Samuel okwa fika. Onghee Saul okwa ya e ke mu shakeneke, ndele ta nangeke noupuna Samuel. 11 Opo nee Samuel okwa pula a ti: “Owa ninga ngahelipi ngaho?” Saul okwa nyamukula a ti: “Onda mona kutya ovanhu ova li tava fiye nge po, naave ino uya pefimbo olo wa popya. Ovafilisti ova li va ongala muMikmas. 12 Onghee onde lipopila nda ti: ‘Paife Ovafilisti otave uya va lwife nge puGilgal, noinandi pula ekwafo kuJehova.’ Onda li ndi udite kutya ondi na okuyamba exwikiloyambo.”
13 Samuel okwa lombwela Saul a ti: “Ino katuka pandunge. Ino dulika koshipango osho Jehova Kalunga koye e ku pa. Ngeno owa dulikile, ngeno Jehova okwa ningifa ouhamba woye u kalelele muIsrael. 14 Ashike paife ouhamba woye itau kalelele. Jehova ota ka hoolola omulumenhu oo ha hafifa omutima waye, na Jehova ote ke mu nangeka po e li omuwiliki woshiwana shaye, molwaashi ino dulika kwaasho Jehova e ku lombwela.”
15 Opo nee Samuel okwa fikama a dja muGilgal, ndele ta i kuGibea shomuBenjamin, na Saul okwa valula ovanhu, naavo va li natango pamwe naye ova li ovalumenhu 600. 16 Saul, omonamati waye Jonatan, nosho yo ovanhu, ovo va li pamwe navo, ova li hava di muGeba shomuBenjamin, nOvafilisti ova li va onga onhanda muMikmas. 17 Eengudu nhatu dovakwaita oda li hadi di mo monhanda yOvafilisti. Ongudu imwe ohai i nondjila oyo ya finda kuOfra kedu laShual. 18 Ongudu ikwao ohai i nondjila oyo ya finda kuBet-horon, nongudu onhinhatu ohai i nondjila oyo ya finda keengaba, odo di li popepi nefilu laSeboim, kombinga yokombuwa.
19 MuIsrael ashishe kamwa li omunhu ha hambula oivela, molwaashi Ovafilisti ova hangwa va popya kutya: “Inatu hala Ovaheberi va hambule eongamukonda, ile eonga.” 20 Ovaisrael aveshe ova li hava i kOvafilisti ve ke va upikile omatemo oipululo, eembike, omakuva, ile oikashulifo yavo. 21 Ngeenge tava ka upikilwa omatemo oipululo, eembike, omafoloko, omakuva nongeenge tava pangelelwa oixwango yeengobe ova li hava futu oisilveri i fike peegrama hetatu. 22 Natango mefiku lolwoodi, kape na eongamukonda, ile eonga tali hangwa momake ovanhu ovo va li pamwe naSaul nosho yo Jonatan. Saul nomonamati waye Jonatan ovo ashike va li ve na oilwifo.
23 Ongudu yovakwaita Ovafilisti oya ya pomataulukilo olufilu laMikmas.