Exodus
14 Jehova okwa tya kuMoses: 2 “Lombwela Ovaisrael kutya nava aluke va ka onge onhanda popepi naPihahirot, pokati kaMigdol nefuta, va taalela kuBaal-sefon. Omu na okwoonga onhanda popepi nasho, kombinga imwe yefuta. 3 Opo nee Farao ota ka diladila shi na sha nOvaisrael kutya, ‘Moshilongo ove li mo va ngwangwana. Kave na nghee tava dulu okudja mo mombuwa.’ 4 Ohandi ka efa Farao a kukutike omutima waye, note ke va shikula. Opo nee ohandi ke litumbalekifa okupitila muFarao nometangakwaita laye alishe, nOvaegipiti otava ka shiiva filufilu kutya aame Jehova.” Ovaisrael osho va ninga.
5 Lwanima, ohamba yaEgipiti oya ka lombwelwa kutya ovanhu ova faduka po. Diva, Farao novapiya vaye ova li tave lipe oushima, eshi va lekela ovanhu, tava ti: “Omolwashike twa ningila ngaha, eshi twa lekela Ovaisrael va dje mo moupika wetu?” 6 Onghee Farao okwa longekida omatemba aye oita, ndele ta i pamwe novanhu vaye. 7 Okwa kufa omatemba 600 a denga mbada, namakwao aeshe omuEgipiti, nometemba keshe omwa li ovakwaita. 8 Kungaho, Jehova okwa li a efa Farao, ohamba yaEgipiti, a kukutike omutima waye, nokwa shikula Ovaisrael, eshi va li tava di muEgipiti ve na omukumo.* 9 Ovaegipiti ova li va shikula Ovaisrael. Omatemba aFarao aeshe taa nanwa keenghambe, ovalondinghambe vaye nomatangakwaita aye okwa li pokuhanga Ovaisrael, ovo va li va onga onhanda pefuta, popepi naPihahirot, va taalela kuBaal-sefon.
10 Eshi Farao a ehena popepi, Ovaisrael ova yelula omesho avo nova mona Ovaegipiti tave va shikula. Opo nee Ovaisrael ova kwatwa koumbada nova hovela okukuwa kuJehova. 11 Ova tya kuMoses: “Osheshi nee muEgipiti muhe na eenhele dokupaka, eshi we tu eta oku tu file mombuwa? Owe tu ninga ngahelipi ngaha, eshi we tu kufa mo muEgipiti? 12 Mbela eshi hasho twe ku lombwela muEgipiti, eshi twa ti, ‘Tu efa tu longele Ovaegipiti’? Osheshi oshi li xwepo okulongela Ovaegipiti shi dulife okufila mombuwa.” 13 Opo nee Moses okwa lombwela ovanhu, a ti: “Inamu kala mwa tila. Kaleni mwa pama nokutala nghee Jehova te mu xupifa, eshi ta ka longa oilonganghono nena. Ovaegipiti ovo mu wete nena eli, itamu ke va mona vali nandenande. 14 Jehova ota ka lwa ponhele yeni, ashike nye otamu ka kala mwa mwena.”
15 Jehova okwa tya kuMoses: “Omolwashike to twikile okupula nge ekwafo? Lombwela Ovaisrael va twikile nolweendo lavo. 16 Ove yelula odibo yoye, ndele to nane eke loye kombada yefuta u li tukule pokati, opo Ovaisrael va dule okweenda mokati kefuta poukukutu. 17 Ame ohandi ka efa Ovaegipiti va kukutike omitima davo, opo va shikule Ovaisrael mefuta. Kungaho, ohandi ke litumbalekifa okupitila muFarao netangakwaita laye alishe, momatemba aye oita nosho yo movalondinghambe vaye. 18 Ovaegipiti otava ka shiiva shili kutya aame Jehova, eshi handi ke litumbalekifa okupitila muFarao, momatemba aye oita nosho yo movalondinghambe vaye.”
19 Omweengeli waKalunga kashili, oo a li e kwetele komesho osheendo shOvaisrael, okwa dja ko komesho yavo, ndele ta i konima yavo, noluudi loshilemo olo la li komesho yavo ola ya konima yavo nola kanghama. 20 Opo nee oluudi loshilemo ole uya pokati kosheendo shOvaegipiti noshOvaisrael. Kombinga imwe ola li la eta omilaulu, nokombinga ikwao ola li tali minikile oufiku. Onghee osheendo shimwe kasha li she uya popepi nashikwao oufiku aushe.
21 Moses okwa yelula eke laye kombada yefuta, na Jehova okwa pepifa omhepo idjuu yokoushilo oufiku aushe, ndele ta tukula omeva efuta. Opo nee apa pa li omeva opa kukuta, nomeva okwa li e lili kokule. 22 Onghee Ovaisrael ova enda mokati kefuta poukukutu, eshi omeva a li a ninga ekuma kolulyo nokolumosho lavo. 23 Ovaegipiti ova li ve va shikula, neenghambe adishe daFarao, omatemba aye oita novalondinghambe vaye ova twikila oku va shikula mokati kefuta. 24 Jehova okwa li a tala osheendo shOvaegipiti okupitila moluudi lomundilo nomoluudi loshilemo ongula inene,* ndele ta ngwangwaneke osheendo osho shOvaegipiti. 25 Okwa kala ta wifa ko omalola omatemba avo, opo ve a shinge noudjuu, nOvaegipiti ova li tava ti: “Inatu ehena popepi nOvaisrael, molwaashi Jehova ote tu lwifa ponhele yavo.”
26 Opo nee Jehova okwa lombwela Moses, a ti: “Yelula eke loye kombada yefuta, opo omeva a alukile kOvaegipiti, komatemba avo oita nokovalondinghambe vavo.” 27 Onghee Moses okwa yelula diva eke laye kombada yefuta, naashi taku ende taku shi, efuta ola shuna kumwe ngaashi la kala. Eshi Ovaegipiti va li tava faduka po, Jehova okwe va undulila mokati kefuta. 28 Omeva oo a shuna kumwe okwa tuvikila omatemba oita, ovalondinghambe netangakwaita alishe laFarao, olo la li mefuta la shikula Ovaisrael. Kape na nande oumwe womuvo a efiwa a xupe.
29 Ashike Ovaisrael ova enda poukukutu mokati kefuta, nomeva okwa li a ninga ekuma kolulyo nokolumosho lavo. 30 Kungaho, Jehova okwa xupifa Ovaisrael momake Ovaegipiti mefiku olo, nOvaisrael ova mona Ovaegipiti komunghulo wefuta va fya. 31 Ovaisrael ova mona eenghono dinene* odo Jehova a ulika mokulwifa Ovaegipiti, novanhu ova hovela okutila Jehova nokukala ve na eitavelo muJehova nomomupiya waye, Moses.