Samuel omutivali
1 Konima yefyo laSaul, David okwa aluka, eshi a finda Ovaamalek, ndele ta kala kuSiklag oule womafiku avali. 2 Mefiku etitatu, monhanda yaSaul omwa dja omulumenhu a djala oikutu ya pombauka noku na edu momutwe waye. Eshi e uya puDavid, okwe linyongamena pedu, ndele ta nangala eombe.
3 David okwe mu pula a ti: “Oto di peni?” Okwa nyamukula a ti: “Onde livaka monhanda yaIsrael.” 4 David okwe mu pula a ti: “Oshike sha ningwa po? Alikana, lombwele nge.” Opo nee okwa tya: “Ovanhu ova faduka po olwoodi, navahapu ova fya. Saul nomonamati waye Jonatan, navo ova fya.” 5 Opo nee David okwa pula omulumenhu oo omunyasha a ti: “Ou shi shii ngahelipi kutya Saul nomonamati waye Jonatan ova fya?” 6 Omulumenhu omunyasha okwa nyamukula a ti: “Onda hangwa komhunda yaGilboa, na Saul oko a li oko, e likolelela keonga laye, nokwa hangwa kovakwaita Ovafilisti va londa momatemba avo oita nokeenghambe. 7 Eshi a keuka, okwa mona nge, nokwa ifana nge, ndele handi ti: ‘Aame ou!’ 8 Okwa pula nge a ti: ‘Oove lyelye?’ Onda nyamukula nda ti: ‘Ame Omuamalek.’ 9 Onghee okwa tya: ‘Alikana, ila, ndele to dipaa nge, osheshi ohandi ehama neenghono, ndele natango ondi na omwenyo.’ 10 Onghee onda ya, ndele handi mu dipaa, molwaashi onda li ndi shii kutya ita kala nomwenyo, ngeenge e lidenge po, shaashi okwa ehamekwa. Onghee onda kufa oshishani, osho sha li komutwe waye, noshivela osho a li a djala kokwooko kwaye, ndele handi i eta oku komwene wange.”
11 David okwa kwata oshikutu shaye, ndele te shi pombaula, novalumenhu aveshe ovo va li pamwe naye, navo osho va ninga. 12 Opo nee ova lila unene, ndele tave lidilike oufiku aushe, molwaashi Saul, omonamati waye Jonatan, ovapiya vaJehova nosho yo eumbo laIsrael ova dipawa neongamukonda.
13 David okwa pula omulumenhu omunyasha a ti: “Owa dja peni?” Okwa nyamukula a ti: “Ame omonamati womunailongo, Omuamalek.” 14 David okwa tya kuye: “Omolwashike wa li ino tila okuyelula eke loye u dipae omuvaekwa waJehova?” 15 Opo nee David okwa ifana umwe womovalumenhu ovanyasha, ndele ta ti: “Inda puye, ndele to mu dipaa.” Onghee okwe mu twa, ndele ta fi. 16 David okwa li e mu lombwela a ti: “Etimba lefyo loye oli li momake oye mwene, molwaashi oove mwene wa popya kutya: ‘Aame nda dipaa omuvaekwa waJehova.’”
17 David okwa tota eimbilo* omolwaSaul nomonamati waye Jonatan, 18 ndele ta yandje elombwelo, opo Ovajuda va hongwe eimbilo hali ifanwa “Outa,” olo la shangwa membo laJashar, tali ti:
19 “Israel, ovanhu ovo va tumbala ova fila koikulundudu yoye iyapuki.
Omukwaita omunaenghono okwa fya!
20 Ino shi popya muGat;
Ino shi shiivifa momapandavanda aAskelon,
Molwaashi ovanakadona vOvafilisti otava ka nyakukwa,
Ovanakadona vovalumenhu, ovo inava pita etanda, otava ka hafa.
21 Nye eemhunda daGilboa,
Kunye inaku wila omumhe, ko inaku lokwa,
Nedu inali mena oikunomwa oyo tai dulu okuyambwa,
Molwaashi oshikelelifo shovanaenghono osha nyatekwa,
Oshikelelifo shaSaul inashi vaekwa vali nomaadi.
22 Outa waJonatan inau shekuna oshishonekwa shao,
Neongamukonda laSaul inali ponya.
Outa neongamukonda oya dipaa ovakwaita ovanaenghono, noya li iyadi ohonde yovatondi vavo.
23 Saul naJonatan ova li ve holike, va tumbalekwa monghalamwenyo yavo aishe,
Nova fila pamwe.
Ohava endelele ve dule eenhwa,
Novanaenghono ve dule eenghoshi.
24 Ovanakadona vaIsrael, lileni Saul,
Oo e mu dika oikutu itilyana ya wapekwa nawa,
Nokwa tula oiwapekifo yoshingoli koikutu yeni.
25 Ovakwaita ovanaenghono ova fila molwoodi!
Na Jonatan okwa fila koikulundudu yoye iyapuki!
26 Onda nyika oluhodi omolwoye, omumwameme Jonatan;
onda li ndi ku hole unene.
Owa ulikila nge ohole inene i dule oyo nda ulikilwa kovakainhu.
27 Ovanaenghono ova xula po
Noilwifo yoita oya hanaunwa po!”