Ovatokolipangeli

9 Lwanima, Abimelek, omonamati waJerubbaal, okwa ya kovalumenhu ovamwaina vaina muSekem, ndele ta ti kuvo nokoukwaneumbo aushe waxekulu:* 2 “Alikana, puleni ovawiliki aveshe* vomuSekem kutya, ‘Omwa hala ovanamati vaJerubbaal aveshe 70 ve mu pangele, ile omwa hala omulumenhu umwe oye e mu pangele? Dimbulukeni kutya ame omupambele weni wopopepi elela.’”*

3 Onghee ovalumenhu ovamwaina vaina ova lombwela ovawiliki aveshe vomuSekem ponhele yaAbimelek, nova li va halelela* okushikula Abimelek, ndele tava ti: “Ye omumwameme lelalela.” 4 Opo nee ove mu pa oisilveri 70, ya dja meumbo* laBaal-berit, na Abimelek okwe i longifa okukuta ovalumenhu ovo vehe na oilonga novakolokoshi, opo ve mu waimine. 5 Konima yaasho, okwa ya keumbo laxe kuOfra, ndele ta dipaele ovamwaina, ovanamati vaJerubbaal, ovalumenhu 70, kemanya limwe. Jotam, omonamati waJerubbaal oo munini, oye aeke a li a xupa po, molwaashi okwa li a hondama.

6 Opo nee ovawiliki vomuSekem novomuBet-millo aveshe ova ongala popepi nomuti wa kula, pongudimanya, oyo ya li muSekem, ndele tava ningi Abimelek ohamba.

7 Eshi ve shi lombwela Jotam, okwa ya diva nokwa fikama koxulo yomhunda yaGerisim, ndele ta ingida mokule, ta ti: “Pwilikineni kwaame, nye ovawiliki vomuSekem, na Kalunga ota ka pwilikina kunye.

8 “Opa li omiti odo da ya di ke lihoololele* ohamba. Oda lombwela omuti weemono, da ti: ‘Tu pangela.’ 9 Ashike omuti weemono owa tya kudo: ‘Mbela ondi na okuyandja po omaadi ange,* oo haa longifwa okufimanekifa Kalunga novanhu, opo ndi ye ndi ka pangele omiti dikwetu?’* 10 Omiti oda tya komukwiyu, ‘Ila u tu pangele.’ 11 Onghee omukwiyu owa tya kudo, ‘Mbela ondi na okuyandja po oiimati yange iwa noinyenye, opo ndi ye ndi ka pangele omiti dikwetu?’ 12 Natango omiti oda tya komuviinyu, ‘Ila u tu pangele.’ 13 Omuviinyu owe di nyamukula wa ti, ‘Mbela ondi na okuyandja po omaviinyu ange mape, oo haa hafifa Kalunga novanhu, opo ndi ye ndi ka pangele omiti dikwetu?’ 14 Xuuninwa, omiti adishe oda lombwela eno, da ti, ‘Ila u tu pangele.’ 15 Eno ola tya komiti, ‘Ngeenge otamu vaeke nge ndi ninge ohamba yeni, ileni mu konge eameno momudile wange. Meno otamu ka dja omundilo, ndele tau xwike po omisederi domuLibanon.’

16 “Mbela omwa katuka ngoo pandunge nonefimaneko, eshi mwa ninga Abimelek ohamba, nomwa ulikila ngoo Jerubbaal ouwa noukwaneumbo waye, nokuungaunga naye ngaashi a li e na okuungaungiwa naye? 17 Eshi tate a lwa ponhele yeni, okwa tula omwenyo waye moshiponga, opo e mu xupife momake Ovamidian. 18 Omwa ponokela oukwaneumbo watate nena eli, ndele tamu dipaele ovanamati vaye, ovalumenhu 70, kemanya. Opo nee omwa ninga Abimelek, omonamati womupiya waye okakadona, ohamba yovawiliki vomuSekem, molwaashi ye omumwanyoko. 19 Ngeenge omwa ungaunga nawa nonefimaneko naJerubbaal nosho yo oukwaneumbo waye nena, hafeleni pamwe naAbimelek, naye ota ka hafela yo pamwe nanye. 20 Ngeenge inamu shi ninga, muAbimelek otamu ka dja omundilo, ndele tau lungwinifa po ovawiliki vomuSekem novomuBet-millo, nomovawiliki vomuSekem novomuBet-millo otamu ka dja omundilo, ndele tau lungwinifa po Abimelek.”

21 Opo nee Jotam okwa faduka po, ndele ta i kuBeer, nokwa kala ha di oko, molwaashi okwa li a tila omumwaina Abimelek.

22 Abimelek okwa pangela* Ovaisrael eedula nhatu. 23 Kalunga okwa efa outondwe u holoke* pokati kaAbimelek novawiliki vomuSekem, ndele tava ungaunga nonyanya naAbimelek. 24 Osho osha ningwa, opo ovo va ningila oukolokoshi ovanamati vaJerubbaal 70 va handukilwe. Abimelek novawiliki vomuSekem ova li ve na okufutila po ohonde oyo ya tika yovamwainamati vaAbimelek. Abimelek oye e va dipaa a kwafelwa kovawiliki vomuSekem. 25 Onghee ovawiliki vomuSekem ova tula po ovalumenhu va nangele Abimelek keexulo deemhunda, nova li tava nyeke keshe oo ta ende pondjila. Lwanima, Abimelek okwe ke shi lombwelwa.

26 Gaal, omonamati waEbed, novamwaina ova tauluka, ndele tava i muSekem, novawiliki vomuSekem ova ka kala ve mu lineekela. 27 Ovalumenhu vomuSekem ova dja mo moshilando, ndele tava ka likola omandjebele koikunino yavo, tave a tyanghaula, ndele tava ningi oshivilo. Opo nee ova ya meumbo lakalunga kavo, nova lya nokunwa, ndele tava fingi Abimelek. 28 Gaal, omonamati waEbed, okwa tya: “Abimelek naSebul ovo oolyelye, opo tu va longele? Abimelek ke fi hano omonamati waJerubbaal, na Sebul ke fi ondjai yaye yomuSekem? Ohatu dulu okulongela ovanamati vaHamor, xe yaSekem, ndele omolwashike tu na okulongela Abimelek? 29 Ngeno aame nda li handi wilike ovanhu ovo, ngeno ohandi kufa ko Abimelek koshipundi.” Opo nee okwa tya kuAbimelek: “Hapupalifa etangakwaita loye, ndele to di mo u uye u lwife nge.”

30 Eshi Sebul, omuleli woshilando, a uda eendjovo daGaal, omonamati waEbed, okwa li a handuka neenghono. 31 Onghee okwa tuma ovatumwa meholeko* kuAbimelek, ta ti: “Tala, Gaal, omonamati waEbed, novamwaina paife ove li muSekem, notava nwefa mo ovanhu vomoshilando ve ku tukululile oshibofa. 32 Omu na okuuya konguloshi, ove novakwaita voye, ndele tamu nangele kondje yoshilando. 33 Diva eshi etango tali piti, omu na okupenduka, ndele tamu ponokele oshilando, nongeenge ye novakwaita vaye ove mu ponokele, ningeni ngaashi tamu dulu, opo mu mu finde.”*

34 Onghee Abimelek novanhu aveshe ovo a li pamwe navo ova penduka oufiku, nova li ve li meengudu dopane va nangela Sekem. 35 Eshi Gaal, omonamati waEbed, a ya pondje, ndele ta fikama poshivelo shoshilando, Abimelek novanhu ovo va li pamwe naye ova dja po opo va li va nangela. 36 Ashike eshi Gaal a mona ovanhu, okwa lombwela Sebul, a ti: “Tala, ope na ovanhu tave uya tava di keexulo deemhunda.” Ashike Sebul okwa tya kuye: “Ou wete omididimbe deemhunda da fa ovanhu.”

37 Lwanima, Gaal okwa tya: “Tala, ovanhu otave uya tava di mokati koshitukulwa, ongudu imwe otai dilile kombinga oko ku na omuti wa kula womuMeonenim.” 38 Sebul okwe mu nyamukula, a ti: “Oto litangele shike, ‘Abimelek oye lyelye, opo tu mu longele?’ Ovanhu ovo havo wa li wa dina? Inda paife u ke va lwife.”

39 Opo nee Gaal okwa kwatela komesho ovawiliki vomuSekem, ndele tava ka lwifa Abimelek. 40 Abimelek okwe mu taataa, na Gaal okwa faduka po, novanhu vahapu ova dipaelwa mondjila fiyo oposhivelo shoshilando.

41 Abimelek okwa kala ha di muAruma, na Sebul okwa taataa mo Gaal novamwaina muSekem. 42 Efiku la shikula ko, ovanhu ova li va dja mo moshilando, na Abimelek okwa li a lombwelwa oshinima osho. 43 Onghee okwa kufa ovanhu nokwe va tukula meengudu nhatu, ndele tava nangele kondje yoshilando. Eshi a mona ovanhu tava di moshilando, okwe va ponokela, ndele te va dipaa. 44 Abimelek neengudu odo a li pamwe nado ova ya, ndele tava ka kala poshivelo shoshilando, ofimbo eengudu dopavali da ponokela aveshe, ovo va li kondje yoshilando, ndele tadi va dipaa. 45 Abimelek okwa lwifa oshilando efiku alishe, ndele te shi kwata ko. Okwa dipaa ovanhu ovo va li mo, ndele ta hanauna po oshilando nokwe shi unda omongwa.

46 Eshi ovawiliki aveshe voshungongulu yomuSekem ve shi uda, ova ya diva monduda* yokoshi yedu yomeumbo* laEl-berit. 47 Diva eshi Abimelek a uda kutya ovawiliki aveshe voshungongulu yomuSekem ova li va ongala, 48 Abimelek nosho yo ovalumenhu aveshe ovo a li pamwe navo ova ya komhunda yaSalmon. Opo nee okwa kufa ekuva, ndele ta tete oshitai shomuti nokwe shi tula kepepe laye, ndele ta lombwele ovanhu ovo a li pamwe navo, ta ti: “Endeleleni mu ninge ashishe osho mwa mona handi ningi.” 49 Onghee ovanhu aveshe navo ova teta oitai, ndele tava shikula Abimelek. Opo nee ova yeeka oitai ponduda oyo yokoshi yedu, ndele tave i tomeke omundilo. Ovanhu aveshe ovo va li moshungongulu yomuSekem navo ova fya, ovalumenhu novakainhu 1 000 lwaapo.

50 Abimelek okwa ya kuTebes, nokwa onga onhanda a lwife Tebes, ndele te shi kwata ko. 51 Mokati koshilando omwa li oshungongulu ya pama, novalumenhu novakainhu aveshe novawiliki aveshe voshilando oko va tondokela. Ove liidilila mo, ndele tava londo moshookooko shoshungongulu. 52 Abimelek okwa ya koshungongulu, ndele te i ponokele. Okwa ya poshivelo shoshungongulu, ndele te i tomeke omundilo. 53 Omukainhu umwe okwa wilifa emanya la kula* komutwe waAbimelek, ndele tali nyanyaula ekolotwe laye. 54 Abimelek okwa ifana diva omupiya waye, oo a humbata oilwifo yaye, ndele ta ti kuye: “Kufa mo eongamukonda loye, ndele to dipaa nge, opo ovanhu vaha ka popye nge, tava ti, ‘Okwa dipawa komukainhu.’” Onghee omupiya oo okwe mu twa, ndele ta fi.

55 Eshi ovalumenhu vomuIsrael va mona kutya Abimelek okwa fya, aveshe ova shuna komaumbo. 56 Kalunga okwa efa owii oo Abimelek a ningila xe, eshi a dipaa ovamwaina 70, u mu tanaukile po. 57 Kalunga okwa efa yo owii aushe wovalumenhu vomuSekem u va tanaukile po. Onghee efingo laJotam, omonamati waJerubbaal, ole va hanga.