Job
17 “Omhepo yange oya kala ya nyanyauka, omafiku ange okwa xulifwa po;
Omaendo okwa teelela nge.
2 Ovasheki ova dingilila nge,
Nomesho ange okwa tala* kelihumbato lovanashibofa.
3 Alikana, tambula ko eshilipaleko lange, nokukala u li na.
Olyelye vali ta minike nge meke nokuninga eudafanotwokumwe lokufuta ponhele yange?
4 Osheshi omitima davo owe di holeka eendunge dokuyoolola;
Nomolwaasho ino va tumbaleka.
5 Otashi dulika a kale a hala okutukulilafana nookaume kaye,
Ofimbo omesho ovana vaye ehe wete ko.
6 Okwa ninga nge omuyolwa* mokati kovanhu,
Opo ndi ninge umwe oo tava fiile omate moshipala.
7 Omesho ange otaa ende taa twika omolwouyehame,
Noilyo yange aishe yolutu oya fa ashike omudidimbe.
8 Ovayuki otave shi tale va kumwa,
Naavo vehe na etimba ova piyaanekwa komuhenakalunga.*
9 Omuyuki ota twikile okudiinina ondjila yaye,
Naao e na omake a yela ota nghonopala.
10 Ashike amushe otamu dulu okuuya nokutwikila nomatomhafano eni,
Osheshi mokati keni inandi mona mo nande oumwe omunaendunge.
11 Omafiku ange okwa pwa ko;
Eemhangela dange, omahalo omutima wange, oda xulifwa po.
12 Oufiku ova kala tave u ningi omutenya,
Tava ti, ‘Ouyelele ou na okukala popepi, molwaashi okwa laula.’
13 Ngeenge onda teelele, Ombila* otai ka ninga eumbo lange;
Ohandi ka yala ombete yange momilaulu.
14 Ohandi ka ifana elambo,* ‘Oove tate.’
Nomainyo, ‘Meme nomumwamemekadona.’
15 Mbela eteelelo lange oli li peni?
Olyelye ta dulu okumonena nge eteelelo?