Eehamba dotete
14 Pefimbo opo, Abia, omonamati waJerobeam, okwa li ta vele. 2 Onghee Jerobeam okwa tya komukulukadi waye: “Alikana, fikama, ndele to liningifa wa fa haave, opo ovanhu vaha shiive kutya ove omukulukadi wange, nokuya kuSilo. Tala, omuprofeti Ahia oko e li oko. Oye a li a popya kutya ohandi ningi ohamba yovanhu ava. 3 Kufa omingome omulongo, oikuki nosho yo ekende lomaadi eenyiki, ndele to i kuye. Ote ke ku lombwela osho tashi ka ningilwa omumati.”
4 Omukulukadi waJerobeam okwa ninga ngaashi a lombwelwa. Okwa fikama, nokwa ya kuSilo, keumbo laAhia. Ahia okwa li a yelula omesho aye, ndele ka li e wete ko omolwoukulupe.
5 Ashike Jehova okwa lombwela Ahia, a ti: “Omukulukadi waJerobeam oye oo te uya e ku pule sha kombinga yomonamati waye, oo ta vele. Ohandi ke ku shiivifila osho u na oku mu lombwela.* Ngeenge a fiki, ote ke liningifa a fa haye.”
6 Diva eshi Ahia a uda eenghatu domukulukadi oo te uya poshivelo, okwa ti: “Ila mo, omukulukadi waJerobeam. Omolwashike to liningifa wa fa haave? Onda tumwa ndi ku lombwele etumwalaka lidjuu. 7 Inda u ka lombwele Jerobeam to ti: ‘Jehova, Kalunga kaIsrael, okwa ti: “Onde ku hoolola mokati kovanhu ndi ku ninge omuleli woshiwana shange Israel. 8 Ouhamba onde u kufa mo mepata laDavid, ndele handi u ku pe. Ashike ove ino kala ngaashi omupiya wange David, oo a diinina oipango yange, a dulika kwaame nomutima aushe nokwa ninga osho sha yuka momesho ange. 9 Ndele ove owa ninga owii muhapu u dulife aveshe ovo ve ku tetekela, nowe liningila kalunga umwe nosho yo oihongwafano yoivela,* opo u handukife nge, nowa pilamena nge. 10 Omolwoshinima osho, oukwaneumbo waJerobeam ohandi u etele oupyakadi, nohandi ka hanauna po* ovalumenhu aveshe* vomeumbo laJerobeam, mwa kwatelwa ovo vehe na ekwafo lasha naavo inava fimana muIsrael, nohandi ka komba po filufilu eumbo laJerobeam, ngaashi ashike omunhu ta yuku oushosho fiyo aushe wa pwa po filufilu. 11 Keshe umwe womeumbo laJerobeam, oo ta ka fila moshilando, ota ka lika po keembwa; nakeshe oo ta ka fila mofuka, ota ka lika po keedila dokeulu, osheshi Jehova osho a popya.”’
12 “Fikama paife, ndele to i keumbo loye. Shimha ashike wa lyata omhadi moshilando, okaana otaka fi. 13 Israel ashishe otashi ke ka lila noku ka paka, osheshi oko akeke komepata laJerobeam taka ka pakwa mombila, molwaashi oko akeke komeumbo laJerobeam oko Jehova, Kalunga kaIsrael, a mona sha shiwa muko. 14 Jehova ote ke lihoololela ohamba yaIsrael, oyo tai ka hanauna po eumbo laJerobeam, okudja mefiku olo okuyuka komesho, nokuli nande opaife. 15 Jehova ota ka denga Israel notashi ka kala ngaashi olumbungu tali telaana kombada yomeva, note ke shi kufa mo medu liwa olo a li a pa ooxekulululwa, ndele te shi lihanifile kombada yOmulonga,* molwaashi oshe liningila eepala diyapuki,* nosha handukifa Jehova. 16 Ota ka efa po Israel omolwenyono laJerobeam, molwaashi okwa ningifa Israel shi nyone.”
17 Opo nee omukulukadi waJerobeam okwa fikama nokwa ya nondjila yaye kuTirsa. Eshi a fika poshivelo sheumbo, okamati oka fya. 18 Onghee ove ka paka, naIsrael ashishe oshe ka lila, ngaashi Jehova a popya okupitila momupiya waye, omuprofeti Ahia.
19 Ondjokonona aishe yaJerobeam, nghee a lwa oita nanghee a pangela, oya shangwa membo londjokonona yopefimbo leehamba daIsrael. 20 Efimbo* olo Jerobeam a pangela, ola li eedula 22, nokonima yaasho, okwa nangekwa pooxekulululwa; omonamati waye, Nadab, okwa ninga ohamba ponhele yaye.
21 Mokweendela ko kwefimbo, Rehabeam, omonamati waSalomo, okwa ka ninga ohamba yaJuda. Rehabeam okwa li e na eedula 41, eshi a ninga ohamba, nokwa pangela oule weedula 17 muJerusalem, oshilando osho Jehova a hoolola momapata aeshe aIsrael shi li onhele yokukala edina laye. Edina laina yaRehabeam oNaama, Omuammoni. 22 Juda osha li hashi longo osho inashi yuka momesho aJehova, nosha nyona omanyono oo e mu nyematifa, shi dule ooxekulululwa. 23 Navo ova kala tave liningile eenhele dokoikulundudu, eengudimanya diyapuki neepala diyapuki* koikulundudu ile nomomuti keshe wa kula. 24 Medu olo, omwa li yo omashenge* omotembeli. Ova li have lihumbata monghedi ya nyata neenghono, ngaashi ashike oiwana oyo Jehova a taataa moipafi yOvaisrael.
25 Momudo omutitano wepangelo lohamba Rehabeam, Sisak, ohamba yaEgipiti, okwa li e uya okulwifa Jerusalem. 26 Okwa kufa omamona meumbo laJehova, nomamona omeumbo* lohamba. Okwa kufa mo oinima aishe, mwa kwatelwa oikelelifo yoshingoli, oyo ya longwa kuSalomo. 27 Onghee ohamba Rehabeam oya ninga oikelelifo yongopolo, opo i i pingene po, noye i yandja i pashukilwe kovakulunhu vovanangeli,* ovo hava pashukile poshivelo sheumbo lohamba. 28 Ngeenge ohamba tai i keumbo laJehova, ovanangeli ohava humbata po oikelelifo oyo, nokonima yaasho, ohave i shunifa konhele yovanangeli.
29 Ondjokonona aishe yaRehabeam, ashishe osho a ninga, mbela inai shangwa membo londjokonona yopefimbo leehamba daJuda? 30 Pokati kaRehabeam naJerobeam opa kala alushe oita. 31 Opo nee Rehabeam okwa nangekwa pooxekulululwa, nokwa pakwa pooxekulululwa mOshilando shaDavid. Edina laina oNaama, Omuammoni. Omonamati waye, Abiam,* okwa ninga ohamba ponhele yaye.