Ovatokolipangeli
19 Pefimbo opo, eshi muIsrael mwaha li ohamba, Omulevi, oo a li ha di koshitukulwa shokeemhunda shaEfraim she likalela, okwa kufa omukainhu muBetlehem shomuJuda a ninge omukulukadi waye wopomunghulo. 2 Ashike omukulukadi waye wopomunghulo ka li omudiinini kuye. Okwe mu fiya po, ndele ta i keumbo laxe kuBetlehem shomuJuda. Oko a kala oko oule weemwedi nhee. 3 Opo nee omushamane waye okwe mu shikula e ke mu heke, opo a aluke. Okwa ya pamwe nomupiya waye omulumenhu nosho yo eendongi mbali. Onghee eshi va fika muBetlehem, omukainhu oo okwa li e va efa va ye meumbo laxe. Xe yomukainhu oo okwa li a hafa okushakena noshitenya shaye. 4 Xemweno okwa udafana naye va kale po oule womafiku atatu. Ova li tava li nokunwa, naamo omo a nangala.
5 Mefiku etine, eshi va penduka ongula inene va ye, xe yomukainhu oo omunyasha okwa tya koshitenya shaye: “Lya sha shi ku pe eenghono, opo mu ye.” 6 Onghee ova kala omutumba, ndele aveshe tava li nokunwa pamwe. Konima yaasho, xe yomukainhu oo omunyasha okwa tya koshitenya shaye: “Alikana, kala po oufiku aushe u tyapule.”* 7 Eshi oshitenya sha fikama shi ye, xemweno okwa kala te shi indile shi kale po, onghee osha nangala.
8 Eshi omulumenhu oo a fikama ongula inene a ye mefiku etitano, xe yomukainhu oo omunyasha okwa tya: “Alikana, lya sha shi ku pe eenghono.” Ova kala tava ongaonga fiyo okomatango, nova twikila okulya. 9 Eshi omulumenhu oo a fikama a ye pamwe nomukulukadi waye wopomunghulo nosho yo omupiya waye, xemweno okwa tya kuye: “Tala, otaku toko paife. Alikana, nangaleni. Okwa toka paife, nangala ashike u tyapule. Mongula otamu pendukile ondjila yeni ongula mu ye keumbo leni.”* 10 Ashike omulumenhu oo ka li vali a hala okunangala, onghee okwa fikama, ndele ta i fiyo okuJebus, sha hala okutya, Jerusalem. Okwa ya neendongi daye mbali, omukulukadi waye wopomunghulo nomupiya waye.
11 Eshi va li pokufika muJebus, okwa li taku ende taku toko. Onghee omupiya okwa pula omwene waye, a ti: “Itatu kanghameni moshilando shOvajebusi, omo tu nangale?” 12 Ashike omwene waye okwa tya kuye: “Itatu kanghama moshilando shovanailongo ovo vehe fi Ovaisrael. Ohatu i fiyo okuGibea.” 13 Opo nee okwa tya komupiya waye: “Itu yeni tu tale ngeenge hatu fiki kuimwe yomeenhele odo. Ohatu ka nangala muGibea, ile muRama.” 14 Opo nee ova ya nondjila yavo, netango ola li tali ningine, eshi va li popepi naGibea shaBenjamin.
15 Onghee ova kanghama, ndele tava i va ka nangale muGibea. Eshi va li meni loshilando, ova kala omutumba mepandavanda loshilando, ashike kape na umwe oo e va ifana meumbo laye va nangale mo. 16 Oufiku oo opa li pe uya omulumenhu omunamido ta di koilonga kepya laye. Omulumenhu oo okwa dile koshitukulwa shokeemhunda shaEfraim, ashike pefimbo olo okwa li ha di muGibea, nokwa li omukalimo womoshilando shOvabenjamin. 17 Eshi a talaatala, okwa mona omweendanandjila mepandavanda loshilando, nokwa tya kuye: “Oto i peni, noto di peni?” 18 Omulumenhu oo okwa nyamukula, a ti: “Ohatu di kuBetlehem shomuJuda, twa yuka koshitukulwa shokeemhunda shaEfraim she likalela, oko nda dja. Onda ile kuBetlehem shomuJuda, nohandi i keumbo laJehova,* ndele kape na oo ta ifana nge meumbo laye. 19 Otu na omwiidi noikulya imwe vali yeendongi detu, nomungome nomaviinyu ange, omukainhu nosho yo omupiya wetu. Inatu pumbwa sha.” 20 Ashike omulumenhu oo omunamido okwa ti: “Ombili nai kale naave! Ohandi ke ku pa keshe osho wa pumbwa. Ino nangala mepandavanda.” 21 Onghee okwe mu twala meumbo laye, ndele ta yandje oikulya* keendongi. Opo nee ova kosha eemhadi davo nova lya nokunwa.
22 Ofimbo va li tava tyapula, ovalumenhu vamwe ovakolokoshi vomoshilando ova dingilila eumbo nova li tava konghola unene pomuvelo. Ova kala tava lombwele omulumenhu oo omunamido, mwene weumbo, tava ti: “Pitifa mo omulumenhu oo e uya meumbo loye, opo tu mu nangale.” 23 Mwene weumbo okwa ya pondje, ndele ta ti kuvo: “Ahawe, ovamwatate, alikana, inamu longa oukolokoshi. Omulumenhu ou omweenda meumbo lange. Inamu longa oilonga oyo ififa ohoni. 24 Meumbo omu na omonakadona wange* nomukulukadi wopomunghulo womulumenhu oo. Nandi va pitife mo mu va fife ohoni ngeenge omwa hala.* Ndele inamu longela omulumenhu ou oilonga oyo ififa ohoni.”
25 Ashike ovalumenhu ovo kava li va pwilikina kuye, onghee omulumenhu oo okwa kwata omukulukadi waye wopomunghulo, ndele te mu twala kuvo pondje. Ove mu kwata onghonga nove mu hepeka oufiku aushe fiyo okeengula. Opo nee ove mu efa, eshi eluwa tali tende. 26 Ongula inene, omukainhu oo okwe uya, ndele ta wile poshivelo sheumbo lomulumenhu oo omunamido, omo mwa li omushamane* waye, ndele ta kala a nangala opo fiyo osheshi kwa yela filufilu. 27 Eshi omushamane* waye a penduka ongula, ndele ta yeulula omivelo deumbo a twikile nondjila yaye, okwa mona omukainhu, omukulukadi waye wopomunghulo, a nangala poshivelo sheumbo, omake aye e li pomuvelo. 28 Onghee okwa tya komukainhu oo: “Fikama, tu ye.” Ndele ina nyamukula. Opo nee omulumenhu okwe mu londeka kondongi, ndele ta i keumbo laye.
29 Eshi a fika keumbo laye, okwa kufa ombele,* ndele ta kwata omukulukadi waye wopomunghulo noku mu teta moinhimbu 12, nokwa tumina koshitukulwa keshe shaIsrael oshinhimbu shimwe. 30 Aveshe ovo ve shi mona ova tya: “Oshinima sha tya ngaho inashi ningwa nale, ile inashi monika nale, okudja kefiku olo Ovaisrael va dja medu laEgipiti fiyo okunena eli. Konakoneni oshinima osho noukeka, kongeni omayele noku tu lombwela osho tu na okuninga.”