Levitikus
22 Jehova okwa popya vali naMoses, a ti: 2 “Lombwela Aron novanamati vaye kutya nava pashukile onghedi omo tava ungaunga* noinima iyapuki yOvaisrael, noinava nyateka edina lange liyapuki shi na sha noinima oyo tava yapulile nge. Aame Jehova. 3 Va lombwela kutya, ‘Momapupi eni aeshe, keshe umwe womoludalo leni oo ina koshoka, te uya popepi noinima iyapuki, oyo Ovaisrael tava yapulile Jehova, omunhu* oo ota ka dimwa* ko koshipala shange. Aame Jehova. 4 Kape na omunhu womoludalo laAron oo e na oshilundu, ile ta di omahiyoyo, ta dulu okulya oinima iyapuki, fimbo ina koshoka, kutya nee omunhu oo a nyatekwa komunhu* oo a fya, ile omulumenhu oo ta di omaxu oludalo, 5 ile omunhu oo a kuma ounamwenyo inava koshoka, ile oo a kuma omunhu ina koshoka omolwoinima yonhumba nosho yo oo ta dulu oku mu ningifa a kale ina koshoka. 6 Omunhu* oo ta kumu oinima oyo ota kala ina koshoka fiyo okonguloshi, noke na okulya shimwe shomoinima iyapuki, ndele oku na okulikosha nomeva. 7 Ngeenge etango la ningine, ota ka kala a koshoka, nokonima yaasho ota dulu okulya imwe yomoinima iyapuki, molwaashi oyo oikulya yaye. 8 Natango, ke na okulya oshinamwenyo osho a hanga she lifila, ile keshe osho sha lika koifitukuti, osho tashi mu ningifa a kale ina koshoka. Aame Jehova.
9 “‘Ove na okudulika koipango yange, opo vaha nyone omolwayo novaha fye omolwayo, molwaashi ova li tava nyateke oinima iyapuki. Aame Jehova, oo handi va yapula.
10 “‘Omunhu oo ina pitikwa* ita dulu okulya oshinima keshe shiyapuki. Hamweenda omunailongo oo ha di pamwe nomupristeri, ile omunailonga ta li oshinima keshe shiyapuki. 11 Ashike ngeenge omupristeri okwa lande umwe* noimaliwa yaye mwene, omunhu oo ota dulu oku i lya. Ovapiya ovo va dalelwa meumbo laye, navo otava dulu okulya oikulya yaye. 12 Ngeenge omonakadona womupristeri okwa hombolwa kuumwe ehe fi womepata lovapristeri, ita dulu okulya oinima iyapuki oyo ya yambwa. 13 Ashike omonakadona womupristeri ngeenge okwa ningi omufiyekadi, ile a hengwa, ashike ke na ounona, ndele ta shuna keumbo laxe e li mepupi lounyasha, ota dulu okulya oikulya yaxe; ashike omunhu oo ina pitikwa* ita dulu oku i lya.
14 “‘Ndele ngeenge omunhu a li oshinima shiyapuki papuko, oku na okuweda ko oshititano kongushu yasho nokuyandja omayambo mayapuki komupristeri. 15 Onghee kave na okunyateka oinima iyapuki oyo Ovaisrael tava yandje kuJehova 16 otave ke lietela ehandukilo omolwenyono lavo eshi va lya oinima yavo iyapuki; osheshi Aame Jehova, oo handi va yapula.’”
17 Jehova okwa twikila okupopya naMoses, ta ti: 18 “Popya naAron novanamati vaye nosho yo Ovaisrael aveshe, u tye kuvo, ‘Ngeenge Omuisrael, ile omunailongo, oo ha di muIsrael, ta yandje exwikiloyambo kuJehova a wanife po eano laye, ile ta yandje eyambo lehalo liwa, 19 oku na okuyandja oshindume sha koshoka, ongobe, eedjona deendume, ile oshikombo, opo a kale a hokiwa kuKalunga. 20 Inamu yandja sha shi na oupyakadi washa, molwaashi otashi ke mu ningifa mu kale inamu hokiwa.
21 “‘Ngeenge omunhu ta yandje eyambo loukumwe kuJehova, opo a fute eano, ile eyambo lehalo liwa, oku na okuyandja oshinamwenyo sha koshoka, ongobe, ile oshikombo, ile odi, opo a kale a hokiwa. Kashi na okukala shi na oupyakadi washa nandenande. 22 Oinamwenyo oyo tai yambwa kai na okukala ya twika, ya teka, ya tetwa, ina oipapata, ina oipute, ile omavangwa taa nyuwa. Inamu etela Jehova oinamwenyo ya tya ngaho, ile mu i yambele koaltari yaJehova. 23 Oto dulu okuyandja omhedi, ile odi i na okaulu kokomesho, ile kokonima kale, ile kaxupi, i li eyambo lehalo liwa, ashike itai ka tambulwa ko i li eyambo leano. 24 Kamu na okuyandja kuJehova oshinamwenyo shi na omatondo a lemana, ile a tyanghaulwa, ile a dudwa mo, ile a tetwa mo, nokamu na okuyandja oshinamwenyo sha tya ngaho medu leni. 25 Kamu na okuyandja shimwe shomoinamwenyo oyo ya dja kovanailongo i li omungome waKalunga keni, osheshi inai koshoka, noi na oupyakadi. Itai ka tambulwa ko nandenande.’”
26 Jehova okwa popya vali naMoses, ta ti: 27 “Ongobe yomhedi, ile odjona yondume, ile oshikombo opo sha dalwa, oshi na okukala naina oule womafiku aheyali, ndele okudja mefiku etihetatu okuyuka komesho, otashi tambulwa ko shi li eyambo, eyambo la yambelwa Jehova okupitila momundilo. 28 Ashike ongobe yomhedi nodi ku na oku i dipaa pamwe nokatana, ile nokadjona kayo mefiku limwe alike.
29 “Ngeenge otamu yambe epanduloyambo kuJehova, omu na okuliyamba, opo mu kale mwa hokiwa. 30 Oli na okuliwa po mefiku olo. Kamu na okuxupifa po sha fiyo efiku lomongula. Aame Jehova.
31 “Omu na okudiinina oipango yange noku i wanifa po. Aame Jehova. 32 Kamu na okunyateka edina lange liyapuki, nondi na okuyapulwa mokati kOvaisrael. Aame Jehova, ou handi mu yapula. 33 Onde mu kufa medu laEgipiti, opo ndi ulike kutya aame Kalunga keni. Aame Jehova.”