Exodus
24 Opo nee Kalunga okwa tya kuMoses: “Inda kuJehova, ove naAron, Nadab, Abihu novakulunhu vaIsrael 70, ndele tamu tu eengolo ofimbo mu li kokule kanini. 2 Moses oye aeke e na oku ka popya naJehova, ashike vakwao kave na okupopya naye. Ovaisrael kave na okuya pamwe naye.”
3 Onghee Moses okwe uya nokwa hepaululila ovanhu eendjovo adishe daJehova nomatokolo aeshe, novanhu aveshe ova nyamukulila oshita va ti: “Eendjovo adishe odo Jehova a popya, otwa hala oku di wanifa.” 4 Opo nee Moses okwa shanga eendjovo daJehova adishe. Okwa penduka ongula inene, ndele ta tungu oaltari pefina lomhunda neengudimanya 12 di lile po omapata 12 aIsrael. 5 Konima yaasho, okwa tuma ovalumenhu ovanyasha Ovaisrael, ndele tava yambe omaxwikiloyambo nova yambela Jehova eemhedi di li omayambo oukumwe. 6 Moses okwa kufa etata lohonde, ndele te li tula mouyaxa, netata lohonde okwe li shamina koaltari. 7 Opo nee okwa kufa embo li na sha nehangano nokwe li leshela ovanhu mokule. Ndele tava ti: “Ashishe osho Jehova a popya otwa hala oku shi ninga, nohatu ka dulika.” 8 Onghee Moses okwa kufa ohonde nokwe i shamina kovanhu, ndele ta ti: “Ei ohonde yehangano olo Jehova a ninga nanye metwokumwe neendjovo edi adishe.”
9 Moses, Aron, Nadab, Abihu novakulunhu vaIsrael 70 ova ya komhunda, 10 nova mona Kalunga kaIsrael. Koshi yeemhadi daye okwa li oshinima tashi monika sha fa olupanda la longwa nomamanya asafir, nosha li shi yela ngaashi eulu lovenevene. 11 Ina ehameka ovanhu ovo va tumbala vomuIsrael, nova mona emoniko laKalunga kashili, ndele tava li nokunwa.
12 Opo nee Jehova okwa tya kuMoses: “Londa u uye kwaame komhunda, ndele to kala oko. Ohandi ke ku pa oipelende yomamanya i na omhango noshipango osho handi va shangele shi va wilike.” 13 Opo nee Moses okwa ya pamwe nomuyakuli waye Josua, na Moses okwa londa komhunda yaKalunga kashili. 14 Okwa tya kovakulunhu: “Tu teeleleni apa, fiyo osheshi hatu mu alukile. Aron naHur ove li pamwe nanye. Keshe ou e na oshibofa, ota dulu oku shi twala kuvo.” 15 Opo nee Moses okwa londa komhunda ofimbo ya li ya uvikwa koshilemo.
16 Oshinge shaJehova osha kala komhunda yaSinai, noshilemo osha kala she i uvika oule womafiku ahamano. Mefiku etiheyali, okwa ifana Moses okudja mokati koshilemo. 17 KOvaisrael ovo va li tava tale, eholokepo loshinge shaJehova ola li la fa omundilo tau xwike u li koxulo yomhunda. 18 Opo nee Moses okwa ya moshilemo nokwa londa komhunda. Nokwa kala komhunda oule womafiku 40, omutenya noufiku.