Daniel

3 Ohamba Nebukadnesar oya ninga oshihongwafano* shoshingoli osho sha li shi na oule wopombada womaludimbo 60* nounene womaludimbo 6.* Oye shi dika moluhaela laDura moshitukulwalongo* shaBabilon. 2 Opo nee ohamba Nebukadnesar oya tuma ondjovo ku ongelwe omalenga, ovakulunhu, oongoloneya, ovayandjimayele, ovatuvikili vemona, ovatokoli, ovapanguli novapangeli aveshe voitukulwalongo* ve uye keyapulo loshihongwafano, osho ohamba Nebukadnesar ya dika.

3 Onghee omalenga, ovakulunhu, oongoloneya, ovayandjimayele, ovatuvikili vemona, ovatokoli, ovapanguli novapangeli aveshe voitukulwalongo* ova ongala omolweyapulo loshihongwafano osho ohamba Nebukadnesar ya dika. Nova fikama komesho yoshihongwafano osho Nebukadnesar a dika. 4 Omushiivifi okwa shiivifa mokule ta ti: “Nye ovanhu, oiwana, neengudu domalaka omwa shiivifilwa 5 kutya ngeenge omwa udu ewi lenghuma, lonyalilo, lokayaayaa, lokaxumbafeta keehuke nhatu, loshishikomwa sheengodi, lonyalilo yeembululu mbali nosho yo loishikomwa yomusika ikwao aishe omu na okulinyongamena nokwiilikana oshihongwafano shoshingoli osho ohamba Nebukadnesar ya dika. 6 Keshe oo ine linyongamena nokwiilikana, ota ka umbilwa diva mediko lomundilo la hanya.” 7 Onghee eshi ovanhu aveshe va uda ewi lenghuma, lonyalilo, lokayaayaa, lokaxumbafeta keehuke nhatu, loshishikomwa sheengodi, nosho yo loishikomwa yomusika ikwao aishe, ovanhu aveshe, oiwana neengudu domalaka ode linyongamena nokwiilikana oshihongwafano shoshingoli osho ohamba Nebukadnesar ya dika.

8 Ashike pefimbo olo, Ovakaldea vamwe ove uya komesho nova lundila* Ovajuda. 9 Ova lombwela ohamba Nebukadnesar tava ti: “Omwene ohamba, kala nomwenyo fiyo alushe. 10 Ove, omwene ohamba, owa yandja oshipango kutya keshe omunhu, oo ta udu ewi lenghuma, lonyalilo, lokayaayaa, lokaxumbafeta keehuke nhatu, loshishikomwa sheengodi, lonyalilo yeembululu mbali nosho yo loishikomwa yomusika ikwao aishe, oku na okulinyongamena nokwiilikana oshihongwafano shoshingoli; 11 nonokutya keshe oo ine linyongamena nokwiilikana oku na okuumbilwa mediko lomundilo la hanya. 12 Ashike ope na Ovajuda vamwe, ovo wa nangeka po va pangele oshitukulwalongo* shaBabilon: Sadrak, Mesak naAbednego. Ovalumenhu ava inave ku fimaneka nandenande, omwene ohamba. Ihava longele ookalunga voye notava anye okwiilikana oshihongwafano shoshingoli osho wa dika po.”

13 Opo nee Nebukadnesar, a fula onya, okwa yandja elombwelo Sadrak, Mesak naAbednego va etwe mo. Onghee ovalumenhu ava ova li va etwa mo koshipala shohamba. 14 Nebukadnesar okwa tya kuvo: “Oshoshili tuu Sadrak, Mesak naAbednego kutya itamu longele ookalunga kange, nonokutya omwa anya okwiilikana oshihongwafano shoshingoli osho nda dika po? 15 Paife eshi, ngeenge omwa udu ewi lenghuma, lonyalilo, lokayaayaa, lokaxumbafeta keehuke nhatu, loshishikomwa sheengodi, lonyalilo yeembululu mbali nosho yo loishikomwa yomusika ikwao aishe, nomwe lilongekida okulinyongamena nokwiilikana oshihongwafano osho nda ninga, oshi li nawa. Ashike ngeenge omwa anye oku shi ilikana, otamu ka umbilwa diva mediko lomundilo la hanya; na Kalunga elipi, oo ta dulu oku mu xupifa momake ange?”

16 Sadrak, Mesak naAbednego ova nyamukula ohamba tava ti: “Ohamba Nebukadnesar, inatu pumbwa oku ku nyamukula moshinima eshi. 17 Ngeenge oshi na okuningwa, Kalunga ketu, oo hatu longele, ota dulu oku tu xupifa mo mediko lomundilo la hanya, omwene ohamba, noku tu xupifa mo meke loye. 18 Ashike nokuli nongeenge ite shi ningi, omwene ohamba, shiiva kutya itatu ka longela ookalunga voye, ile tu ilikane oshihongwafano shoshingoli osho wa dika po.”

19 Opo nee Nebukadnesar okwa handukila unene Sadrak, Mesak naAbednego, nomalinyengo aye okoshipala okwa lunduluka,* eshi ta ungaunga navo, nokwa yandja omalombwelo, opo ediko li hanyekwe lwoikando iheyali, li pupyale neenghono shi dulife shito. 20 Okwa lombwela ovalumenhu vamwe ovanaenghono vometangakwaita laye va mange Sadrak, Mesak naAbednego noku va umbila mediko lomundilo la hanya.

21 Onghee ovalumenhu ovo ova li va mangwa, ofimbo natango va li va djala eendjafa davo, oikutu, omambale noikutu yavo aishe ikwao, nova li va umbilwa mediko lomundilo la hanya. 22 Molwaashi oshipango shohamba osha li sha kwata moiti neenghono, nediko lomundilo ola li la pupyala unene, ovalumenhu ava va twala Sadrak, Mesak naAbednego ovo va li va dipawa komalaka omundilo. 23 Ashike ovalumenhu ava vatatu, Sadrak, Mesak naAbednego ova wila mediko lomundilo la hanya va mangwa.

24 Opo nee ohamba Nebukadnesar oya li ya tila unene, noya fikama diva, ndele tai ti komalenga ayo omakulunhu: “Hano inatu manga ovalumenhu vatatu, ndele hatu va umbile momundilo?” Ova nyamukula ohamba tava ti: “Heeno, omwene ohamba.” 25 Oya tya: “Taleni! Ondi wete ovalumenhu vane tava endaenda va manguluka mokati komundilo noinava ehamekwa, nomutine ota monika a fa omonamati wookalunga.”

26 Nebukadnesar okwa ya pomuvelo wediko lomundilo la hanya, ndele ta ti: “Sadrak, Mesak naAbednego, nye ovapiya vaKalunga Omukombadambada, djeni mo, ndele tamu uya oku!” Sadrak, Mesak naAbednego ova dja mo mokati komundilo. 27 Nomalenga, ovakulunhu, oongoloneya nomalenga omakulunhu ohamba, ovo va li va ongala oko, ova mona kutya omundilo inau ninga sha* omalutu ovalumenhu ava; eexwiki dokomitwe davo inadi pya, eendjafa davo inadi ninga sha, nokava li nokuli tava nyika omwifi.

28 Opo nee Nebukadnesar okwa ti: “Kalunga kaSadrak, kaMesak nokaAbednego na tangwe, oo a tuma omweengeli waye, ndele ta xupifa ovapiya vaye. Ove lineekela muye, noinava dulika koshipango shohamba, nova li va hoolola okufya,* ponhele yokulongela, ile yokwiilikana kalunga umwe e lili kakele kuKalunga kavo. 29 Onghee hano, ohandi yandje oshipango kutya keshe omunhu, oshiwana, ile elaka olo tali popi sha shi li omhinge naKalunga kaSadrak, kaMesak nokaAbednego, oku na okutetaulwa po moinhimbu, nomaumbo avo oku na okulundululilwa moundjuwo vovakwashiwana;* osheshi kape na vali kalunga umwe, oo ta dulu okuxupifa ngaashi ou.”

30 Opo nee ohamba oya yelaayela* Sadrak, Mesak naAbednego moshitukulwalongo* shaBabilon.