Deuteronomion

5 Moses okwa ongaleka Ovaisrael aveshe, ndele ta ti kuvo: “Israel, pwilikineni komaufomhango nokomatokolo oo handi mu lombwele nena, nomu na oku a koneka noku a diinina filufilu. 2 Jehova, Kalunga ketu, okwa ninga ehangano nafye muHoreb. 3 Jehova ina ninga ehangano eli nootatekulululwa, ndele okwe li ninga nafye, atusheni ava tu li apa nena eli. 4 Jehova okwa popya nanye oshipala noshipala komhunda, okudja momundilo. 5 Pefimbo opo, onda li nda fikama pokati keni naJehova, opo ndi mu lombwele eendjovo daJehova, molwaashi omwa li mwa tila omundilo noinamu ya komhunda. Opo nee Kalunga okwa ti:

6 “‘Aame Jehova, Kalunga koye, ou nde ku kufa medu laEgipiti, meumbo loupika. 7 Aame ashike u na okulongela, ndele ku na okulongela nandenande ookalunga vamwe.*

8 “‘Ino liningila oshihongwafano, ile efano loshinima keshe shi li pombada meulu, ile shi li kombada yedu, ile momeva kombada yedu. 9 Inamu i twila eengolo noinamu efa mu pukifwe mu i longele, osheshi ame, Jehova, Kalunga keni, aame Kalunga ou a teelela okulongelwa oye aeke, ou ta handukile ovana omolwomanyono ooxe, epupi etitatu nepupi etine laavo ve tonde nge, 10 ashike omapupi omayovi aavo ve hole nge nohava diinine oipango yange, ohandi a ulikile ohole i na oudiinini.

11 “‘Edina laKalunga koye, Jehova, ino li longifa moinima yongaho, osheshi Jehova ita kala ina handukila keshe ou ha longifa edina laye moinima yongaho.

12 “‘Dimbuluka efiku leshabata, opo u li kaleke liyapuki, ngaashi Jehova, Kalunga koye, e ku lombwela. 13 Ou na okulonga oilonga idjuu, noilonga ikwao aishe momafiku ahamano, 14 ashike efiku etiheyali eshabata laJehova, Kalunga keni. Onghee ino longa sha nande, kutya nee oove, omonamati woye, omonakadona woye, omupiya woye omulumenhu, omupiya woye okakadona, ongobe yoye yomhedi, ondongi yoye, oshimuna shoye keshe, omunailongo, oo ha di moilando* yeni, opo omupiya woye omulumenhu nomupiya woye okakadona va fude po ngaashi ove. 15 Dimbuluka kutya owa li omupika medu laEgipiti nonokutya Jehova, Kalunga koye, okwe ku kufa mo neke li na eenghono nosho yo nokwooko kwa yeluka. Nomolwaasho Jehova, Kalunga koye, e ku lombwela u diinine efiku lEshabata.

16 “‘Fimaneka xo nanyoko, ngaashi Jehova, Kalunga koye, e ku lombwela, opo u kale nomwenyo efimbo lile nou pondole* medu olo Jehova, Kalunga koye, te ku pe.

17 “‘Ino dipaa.

18 “‘Ino nyona ohombo.

19 “‘Ino vaka.

20 “‘Ino koleka oumbangi woipupulu u na sha namukweni.

21 “‘Ino haluka omukulukadi wamukweni. Ino haluka nandenande eumbo lamukweni, epya laye, omupiya waye omulumenhu, omupiya waye okakadona, ongobe yaye yomhedi, ondongi yaye, ile oinima yamukweni aishe.’

22 “Ei oipango* oyo Jehova a lombwela eongalo leni alishe komhunda, okupitila momundilo, moshilemo nomomilaulu fokofoko, newi li li pombada, noina weda ko sha vali nandenande. Opo nee okwe i shanga koipelende ivali yomamanya, ndele te i pe nge.

23 “Diva ashike eshi mwa uda ondaka tai di momilaulu, nomhunda tai lundumuka omundilo, omitwe domapata eni adishe novakulunhu ove uya kwaame. 24 Onghee omwa tya: ‘Paife Jehova, Kalunga ketu, okwe tu ulikila oshinge shaye nounene waye, notwa uda ondaka yaye okudja momundilo. Nena otwa mona kutya Kalunga ota dulu okupopya nomunhu, ndele omunhu ta kala nomwenyo. 25 Ashike fye inatu hala okufya. Molwaashi omundilo oo munene otau dulu oku tu lungwinifa po. Ngeenge otwa kala nokuuda ondaka yaJehova Kalunga, ohatu ka fya filufilu. 26 Olyelye movanhu aveshe a uda ondaka yaKalunga omunamwenyo ta popi okupitila momundilo, ngaashi twe i uda, ndele ta kala nomwenyo? 27 Ou na okweehena popepi, opo u ude ashishe osho Jehova, Kalunga ketu, ta ka popya, nou tu lombwele ashishe osho Jehova, Kalunga ketu, te ku lombwele, nohatu ka pwilikina noku shi wanifa po.’

28 “Onghee Jehova okwa uda eendjovo odo mwa lombwela nge, na Jehova okwa lombwela nge, a ti: ‘Onda uda eendjovo odo ovanhu ve ku lombwela. Ashishe osho va popya oshiwa. 29 Ngeno ova li hava tila nge alushe nomutima wavo aushe, nokudiinina oipango yange aishe, ngeno otashi va endele nawa nosho yo ovana vavo fiyo alushe. 30 Inda u ke va lombwele kutya: “Shuneni komatwali eni.” 31 Ove ou na okufyaala naame apa, opo ndi dule oku ku lombwela oipango aishe, omaufomhango nomatokolo oo u na oku va lombwela nove na oku ke a diinina medu olo handi va pe va kale mo.’ 32 Omu na okukala mwa lungama, opo mu ninge naanaa ngaashi Jehova, Kalunga keni, e mu lombwela. Kamu na okukandukila kolulyo, ile kolumosho. 33 Omu na okushikula filufilu ondjila oyo Jehova, Kalunga keni, e mu lombwela mu ende, opo mu dule okukala nomwenyo, mu pondole nomu hapupalife omafiku eni medu omo tamu ka kala.