Levitikus
16 Jehova okwa popya naMoses konima yefyo lovanamati vavali vaAron ovo va fya, eshi va ya koshipala shaJehova monghedi inai yuka. 2 Jehova okwa tya kuMoses: “Lombwela omumwaxo Aron kutya ine uya efimbo keshe konhele iyapuki meni letukulifolapi, komesho yoshituviko osho shi li kOshikefa, opo aha fye, osheshi ohandi holoka moshilemo kombada yoshituviko.
3 “Aron oku na okweetelela oinima ei konhele iyapuki: ondumetana yetimbayambo nodi yondume yexwikiloyambo. 4 Oku na okudjala oshikutu sholiina shiyapuki, nokudjala oumbulukweva vaxupi* voliina vokuuvika olutu* laye, noku na okulidingila elapi loliina moshiya nosho yo elapi loliina komutwe waye. Oikutu oyo oiyapuki. Oku na okulikosha nomeva, ndele te i djala.
5 “Ongudu yOvaisrael oi na oku mu pa oukombo vavali voupedi vetimbayambo nodi yondume yexwikiloyambo.
6 “Opo nee Aron oku na okuyandja omhedi yetimbayambo yaye mwene, noku na okupula ediminepo omolwomatimba aye noovaneumbo laye.
7 “Oku na okukufa oikombo ivali, ndele te i fikameke koshipala shaJehova poshivelo shetwali lokwoongalela. 8 Aron ota ka ningila oikombo oyo ivali oihoololifo, oshihoololifo shimwe oshaJehova, noshihoololifo shikwao oshaAsaseli.* 9 Aron ota ka yandja oshikombo osho sha hoololwa shi ninge shaJehova noku shi yamba shi li etimbayambo. 10 Ndele oshikombo osho sha hoololwa shi ninge shaAsaseli oshi na okweetwa shi na omwenyo shi fikame koshipala shaJehova, opo ovanhu va diminwe po omatimba, ndele tashi undwilwa shi ye mombuwa kuAsaseli.
11 “Aron ota ka yandja ongobe yomhedi yetimbayambo yaye mwene, noku na okupula ediminepo omolwomatimba aye noovaneumbo laye. Konima yaasho, ota ka dipaa ongobe yomhedi yetimbayambo yaye mwene.
12 “Opo nee ota ka kufa oshikwatelwa shomundilo shiyadi omakala omundilo a tema a dja koaltari koshipala shaJehova, nomake avali e yadi oitwimifo iwa yedimba liwa, ndele te i eta meni letukulifolapi. 13 Ota ka tula yo oitwimifo momundilo koshipala shaJehova, nomwifi woitwimifo oyo otau ka uvika oshituviko shOshikefa, osho shi li kombada yoshikefa shOipelende yOumbangi, opo aha fye.
14 “Ota ka kufa ohonde imwe yomhedi, ndele te i shamine nomunwe waye popepi noshituviko kombinga yokoushilo, nota ka shamina ohonde imwe nomunwe waye luheyali popepi noshituviko.
15 “Ota ka dipaa oshikombo shetimbayambo, shovanhu, nota ka eta ohonde yasho meni letukulifolapi, ndele ohonde yasho te i ningi sha faafana naasho a ninga nohonde yomhedi; ote ke i shamina komesho yoshituviko.
16 “Oku na okukoshola onhele iyapuki omolwoilonga inai koshoka yOvaisrael nomolwomatauluko avo nomatimba avo, naasho osho e na okuninga shi na sha netwali lokwoongalela, olo li li mokati kavo, eshi tava longo oilonga inai koshoka.
17 “Metwali lokwoongalela kamu na okukala vali omunhu umwe efimbo olo Aron ta ka koshola onhele iyapuki, fiyo osheshi a dja mo. Ota ka pula ediminepo omolwomatimba aye mwene, ovaneumbo laye noeongalo alishe lOvaisrael.
18 “Opo nee ota ka dja mo, ndele ta i koaltari, oyo i li koshipala shaJehova, ndele te i koshola, nota ka kufa ohonde imwe yomhedi nohonde imwe yoshikombo, note i tula keembinga doaltari, keembinga adishe. 19 Ota ka shamina ko yo ohonde imwe nomunwe waye luheyali, ndele te i koshola noku i yapula koilonga inai koshoka yOvaisrael.
20 “Ngeenge okwa mane okukoshola onhele iyapuki, etwali lokwoongalela noaltari, ota ka yandja yo oshikombo shi na omwenyo. 21 Aron ota ka tenheka omake aye aeshe komutwe woshikombo osho shi na omwenyo, ndele ta hepaululile ko omanyono aeshe Ovaisrael, omatauluko avo aeshe nomatimba avo aeshe, ndele te a tula komutwe woshikombo note ke shi yandja komulumenhu oo a hoololwa,* nomulumenhu oo ote ke shi undwila mombuwa. 22 Ota ka undwila oshikombo shi ye mombuwa, noshikombo otashi ka twala omanyono avo aeshe mombuwa.
23 “Opo nee Aron ota ka ya metwali lokwoongalela, noku dula mo oikutu yoliina oyo a djala, eshi a li ta i monhele iyapuki, ndele te i fiye mo. 24 Oku na okulikosha* nomeva monhele iyapuki, ndele ta djala oikutu yaye, opo nee ota di mo, ndele ta yambe exwikiloyambo laye nexwikiloyambo lovanhu, nota ka pula ediminepo omolwomatimba aye nomolwomatimba ovanhu. 25 Ota ka xwikila oinghene yetimbayambo koaltari.
26 “Omulumenhu oo a undwila oshikombo shaAsaseli oku na okukosha oikutu yaye nokulikosha nomeva, nokonima yaasho, ote ke uya monhanda.
27 “Omhedi yetimbayambo noshikombo shetimbayambo, oyo ohonde yayo ya etwa monhele iyapuki, opo i kosholifwe, otai ka twalwa kondje yonhanda, noikafa yayo nombelela yayo nosho yo oshandja shayo otai ka xwikwa po momundilo. 28 Oo te i xwike po oku na okukosha oikutu yaye nokulikosha nomeva, nokonima yaasho, ota dulu okuuya monhanda.
29 “Oyo otai kala onghedimhango yeni yaalushe: Momafiku e li omulongo, omwedi omutiheyali, omu na okunyika oluhodi,* nokamu na okulonga sha, kutya nee ovakalimo, ile ovanailongo ovo ve li mokati keni. 30 Mefiku olo otamu ka kosholwa, opo mu kale mwa koshoka. Otamu ka kala mwa koshoka ko komatimba eni aeshe koshipala shaJehova. 31 Oli li eshabata kunye lokufuwa po filufilu nomu* na okunyika oluhodi. Oyo onghedimhango yaalushe.
32 “Omupristeri, oo a vaekwa nokwa nangekwa po* a longe e li omupristeri ponhele yaxe, ota ka yandja omayambo omolwomatimba, nota ka djala oikutu yoliina, sha hala okutya oikutu iyapuki. 33 Ota ka koshola onhele iyapuki, etwali lokwoongalela noaltari; ota ka koshola ovapristeri nOvaisrael aveshe. 34 Oyo otai kala onghedimhango yeni yaalushe, okukoshola Ovaisrael omolwomatimba avo aeshe lumwe omudo keshe.”
Onghee okwa ninga naanaa ngaashi Jehova a lombwela Moses.