Hesekiel
44 Okwa eta nge vali kombinga yoshivelo shokondje shonhele iyapuki, osho sha taalela koushilo, nosha li sha idila. 2 Opo nee Jehova okwa tya kwaame: “Oshivelo osho otashi ka kala sha idila. Itashi ka yeululwa, nokape na omunhu ta ka pita mo; osheshi Jehova, Kalunga kaIsrael, okwa pita musho, onghee oshi na okukala sha idila. 3 Ashike elenga otali ka kala mo omutumba, li lye omungome moipafi yaJehova, osheshi lo elenga. Otali ke uya mo tali pitile pokanduda kokufikila koposhivelo, notali ka dja mo tali pitile opo.”
4 Opo nee okwa eta nge a pitifa nge moshivelo shokolundume nda finda komesho yotembeli. Eshi nda tala, onda mona kutya oshinge shaJehova osha yadifa otembeli yaJehova. Onghee onde linyongamena oshipala sha twa pedu. 5 Opo nee Jehova okwa tya kwaame: “Omona womunhu, yandja elitulemo,* tala nokupwilikina nawa kwaashishe osho handi ku lombwele shi na sha neenghedimhango nosho yo neemhango dotembeli yaJehova. Yandja elitulemo filufilu kondjila yokuya motembeli nosho yo keendjila adishe, odo da dja mo donhele iyapuki. 6 Ou na okulombwela eumbo laIsrael linashibofa kutya, ‘Eshi osho Omwene Omunamapangelo aeshe, Jehova, ta ti: “Oilonga yeni itondifa oyo mwa longa oya wana, nye eumbo laIsrael. 7 Eshi mwa eta monhele yange iyapuki ovanailongo, ovo inava pita etanda momutima nosho yo mombelela, ova nyateka otembeli yange. Omwa eta omungome wange, oinghene nosho yo ohonde, ofimbo ehangano lange la teywa omolwoilonga yeni aishe itondifa. 8 Inamu fila oshisho oinima yange iyapuki. Ponhele yaasho, omwa tula po vamwe va wanife po oinakuwanifwa monhele yange iyapuki.”’
9 “‘Eshi osho Omwene Omunamapangelo aeshe, Jehova, ta ti: “Kape na omunailongo ha di muIsrael, oo ina pita etanda momutima nosho yo mombelela, ta ka ya monhele yange iyapuki.’”
10 “‘Ashike Ovalevi, ovo va ya kokule neenghono naame, eshi Israel a ya kokule naame, opo a shikule oikalunga yaye itondifa,* otava ka humbata oilanduliko yenyono lavo. 11 Notava ka ninga ovayakuli monhele yange iyapuki, opo va pashukile omivelo dotembeli nokuyakula motembeli. Otava ka dipaa exwikiloyambo alishe nosho yo eyambo ponhele yovanhu, notava ka kala ofika moipafi yovanhu, ve va yakule. 12 Molwaashi ove va yakula moipafi yoikalunga yavo itondifa, nova ninga emanya lepundukifo, olo la ningifa eumbo laIsrael li nyone, osho osho sha ningifa nge ndi ane nda yelula eke lange ndi li omhinge navo,’ Omwene Omunamapangelo aeshe, Jehova, osho ta ti, ‘notava ka humbata oilanduliko yenyono lavo. 13 Itave ke uya kwaame va longe ve li ovapristeri vange, ile ve uye moinima aishe iyapuki yange, ile moinima iyapuki elela, notava ka humbata ohoni yavo omolwoinima itondifa oyo va ninga. 14 Ashike ohandi ke va ninga ovafilishisho voinakuwanifwa yomotembeli, va file oshisho oilonga yamo nosho yo oinima aishe, oyo i na okulongwa mo.’
15 “‘Shi na sha novapristeri Ovalevi, ovanamati vaSadok, ovo va li hava wanifa po oinakuwanifwa yonhele yange iyapuki, eshi Ovaisrael va li va ya kokule naame, otave ke uya kwaame, va yakule nge, notava ka kala ofika moipafi yange va yambele nge oinghene nosho yo ohonde,’ Omwene Omunamapangelo aeshe, Jehova, osho ta ti. 16 ‘Ovo ovo tave ke uya monhele yange iyapuki, notave ke uya poshitaafula shange, va yakule nge, notava ka wanifa po oinakuwanifwa yavo omolwange.
17 “‘Ngeenge tave uya moivelo yomukala womeni, ove na okudjala oikutu yoliina. Kave na okudjala sha sha longwa molududi leedi, ngeenge tava yakula moivelo yomukala womeni, ile meni lao. 18 Ove na okulimanga omalapi oliina komitwe davo, nove na okutuvikila eenho davo noumbulukweva vaxupi voliina. Kave na okudjala osho tashi va ningifa va honoke. 19 Fimbo inava ya komukala wokondje, omukala wokondje oko ku na ovanhu, ove na okudula mo oikutu, oyo va li tava yakula nayo, noku i tula meenhele diyapuki* dokulila. Opo nee otava ka djala oikutu ikwao, opo vaha tandavelife* ouyapuki kovanhu noikutu yavo. 20 Kave na okukulula omitwe davo, ile va efe eexwiki davo dokomutwe di kale dile. Ove na okuteta eexwiki dokomitwe davo. 21 Ovapristeri kave na okunwa omaviinyu, ngeenge tava i momukala womeni. 22 Kave na okukufa omufiyekadi, ile omukulukadi a hengwa a ninge omukulukadi wavo; ashike otava dulu okuhombola okakadona elela komoludalo laIsrael, ile omufiyekadi womupristeri.’
23 “‘Ove na okuhonga ovanhu vange kombinga yeyooloko olo li li pokati kaasho shiyapuki naasho shakwalukeshe; notave ke va honga eyooloko olo li li pokati kaasho inashi koshoka naasho sha koshoka. 24 Ove na okukwatela komesho moihokolola ve li ovatokoli; ove na okutokola metwokumwe nomatokolo ange. Ove na okudiinina eemhango dange nomaufomhango ange e na sha noivilo yange aishe, nokuyapula omashabata ange. 25 Kave na okweehena popepi noshimhu shomunhu keshe, molwaashi otava ka kala inava koshoka. Ashike otava dulu okulinyateka omolwaxe, ina, omonamati, omonakadona, omumwainamati, ile omumwainakadona ina hombolwa. 26 Ndele konima eshi omupristeri a kosholwa, oku na okuteelela omafiku aheyali. 27 Mefiku olo ta i monhele iyapuki, meni lomukala womeni, a yakule monhele iyapuki, oku na okuyandja etimbayambo laye,’ Omwene Omunamapangelo aeshe, Jehova, osho ta ti.
28 “‘Naasho otashi ka kala efyuululo lavo: Aame efyuululo lavo. Kamu na oku va pa nande emona limwe muIsrael, osheshi ame emona lavo. 29 Ovo ovo tava ka lya eendjayambo, etimbayambo nosho yo elivelombediyambo, noshinima keshe sha yapulwa muIsrael otashi ka ninga shavo. 30 Oiimati aishe ya pya tete, oyo ya denga mbada, nosho yo omayambidido aeshe a dja kunye otaa ka ninga ovapristeri. Nomu na okuyandja komupristeri oufila, inau nakwa nawa woilya oyo ya pya tete. Osho otashi ka ningifa omaumbo eni a kale a nangekwa noupuna. 31 Ovapristeri kave na okulya okadila keshe, ile oshinamwenyo, osho sha hangwa she lifila, ile sha nyanyaulwa moinhimbu.’