Hesekiel

45 “‘Ngeenge tamu yandje edu li li efyuululo, omu na okuyandja mo oshitukulwa shedu shiyapuki, shi li omayambidido kuJehova. Oule washo ou na okukala omaludimbo* 25 000, nomutamo washo omaludimbo 10 000. Oshitukulwa shasho ashishe* otashi ka kala oshitukulwa shiyapuki. 2 Musho otamu ka kala onhele iyapuki, i na eembinga nhee di fike pamwe, di na omaludimbo 500 lwomaludimbo 500,* notashi ka kala shi na onhele yomaulifilo kombinga keshe i na omaludimbo 50. 3 Okudja mwaasho sha yelekwa, ou na okuyeleka mo oule 25 000, nomutamo 10 000, nomeni lasho otamu ka kala onhele iyapuki, oshinima shiyapuki elela. 4 Otai ka kala oshitukulwa shiyapuki shedu lovapristeri, ovayakuli vomonhele iyapuki, ovo hava yakula Jehova. Otai ka kala onhele yomaumbo avo nosho yo yonhele iyapuki yotembeli.

5 “‘Shi na sha nOvalevi, ovayakuli vomotembeli, otapa ka kala oshitukulwa shi na oule womukokomoko womaludimbo 25 000, nounene womaludimbo 10 000, notava ka kala ve na eenduda dokulila 20* di li emona.

6 “‘Omu na okuyandja oshitukulwa shi li emona loshilando, shi na oule womukokomoko womaludimbo 25 000 (shi fike pamwe nomayambidido mayapuki) nosho yo omutamo womaludimbo 5 000. Otashi ka kala sheumbo alishe laIsrael.

7 “‘Ndele shi na sha nelenga, otapa ka kala edu keembinga adishe doshitukulwa, osho sha yandjwa shi li omayambidido mayapuki nosho yo oshitukulwa osho sha pewa oshilando. Edu olo otali ka kala popepi nomayambidido mayapuki nosho yo nemona loshilando. Otali ka kala kombinga yokouninginino nokombinga yokoushilo. Okudja kongaba yokouninginino fiyo okongaba yokoushilo, oule wayo ou na okukala u fike pamwe noshitukulwa shomoitukulwa imwe yomapata. 8 Edu olo otali ka ninga emona laye muIsrael. Omalenga ange itaa ka ungaunga vali nai novanhu vange, notaa ka yandja edu keumbo laIsrael she likolelela komapata avo.’

9 “Eshi osho Omwene Omunamapangelo aeshe, Jehova, ta ti: ‘Omalenga aIsrael, osha wana eshi mwa ya kokule!’

“‘Xulifeni po elongifo leenghono nosho yo omafininiko, ndele tamu ningi eshi shi li mondjila nosha yuka. Xulifeni po okukwata ko edu lovanhu vange,’ Omwene Omunamapangelo aeshe, Jehova, osho ta ti. 10 ‘Omu na okulongifa oiyelekifo i li paushili, oshiyelekifo shoefa* shi li paushili nosho yo oshiyelekifo shobata shi li paushili.* 11 Ope na okukala oshiyelekifo sha tulwa po shoefa nosho yo shobata. Oshiyelekifo shobata oshi na okukala shi fike poshitimulongo shohomer,* noshiyelekifo shoefa oshi na okukala shi fike poshitimulongo shohomer. Ohomer otai ka kala oshiyelekifo osho sha tulwa po shokuyeleka. 12 Osekeli* oi na okukala i fike peegera* 20. Neesekeli 20 mwa wedwa eesekeli 25 mwa wedwa eesekeli 15 otadi ningi omane* imwe kunye.’

13 “‘Aa omayambidido oo mu na okuyandja: oshitihamano shimwe shoefa okudja mohomer keshe yoilya yo-wheat nosho yo oshitihamano shimwe shoefa okudja mohomer keshe yoilya yo-barley. 14 Ouhapu womaadi, oo wa tulwa po, ou na okukala we likolelela koshiyelekifo shobata. Obata oi li oshitimulongo shokori,* neebata omulongo ohomer, osheshi eebata omulongo odi fike pohomer. 15 Nokudja moufita woimuna yOvaisrael, odi imwe yomeedi keshe 200 oi na okuyandjwa. Oyo otai ka ninga yeendjayambo, yexwikiloyambo alishe nosho yo yomayambo oukumwe, opo ovanhu va dule okukwatakanifwa,’ Omwene Omunamapangelo aeshe, Jehova, osho ta ti.

16 “‘Ovanhu aveshe vomedu olo otava ka yandja omayambidido aa kelenga lomuIsrael. 17 Ashike elenga otali ka kala li na oshinakuwanifwa shomaxwikiloyambo aeshe, sheendjayambo nosho yo shoikunwayambo pefimbo loivilo, leemwedi dipe, lOmashabata nosho yo loivilo aishe oyo ya tulwa po yeumbo laIsrael. Elenga olo otali ka yandja etimbayambo, eendjayambo, exwikiloyambo alishe nosho yo omayambo oukumwe, opo li ninge ekwatakanifo ponhele yeumbo laIsrael.’

18 “Eshi osho Omwene Omunamapangelo aeshe, Jehova, ta ti: ‘Momwedi wotete, mefiku lotete lomwedi, ou na okukufa ondumetana ya koshoka yomoufita, nou na okukoshola onhele iyapuki komatimba. 19 Omupristeri ota ka kufa ohonde imwe yetimbayambo noku i tula koshikulo shomuvelo wotembeli, keembinga nhee odo da dingilila oaltari nosho yo koshikulo shoposhivelo shomukala womeni. 20 Osho osho u na okuninga mefiku etiheyali lomwedi omolwakeshe oo ta nyono papuko, ile omolwokulipwililika; nomu na okukwatakanifa otembeli.

21 “‘Momwedi wotete, mefiku 14 lomwedi, omu na okudana oshivilo shOpaasa. Omungome inau ya efulika ou na okuliwa oule womafiku aheyali. 22 Mefiku olo, elenga otali ka yandja ondumetana i li etimbayambo ponhele yalo vene nosho yo ponhele yovanhu aveshe vomedu olo. 23 Oule womafiku aheyali oshivilo, otali ka yandja kuJehova eendumetana heyali da koshoka nosho yo eedi deendume heyali da koshoka efiku keshe, oule womafiku aheyali, i li exwikiloyambo alishe nosho yo oshikombo shoshindume efiku keshe, shi li etimbayambo. 24 Oli na yo okuyandja eendjayambo doefa mondumetana keshe nosho yo oefa imwe modi keshe yondume nosho yo ohin* yomaadi moefa keshe.

25 “‘Momwedi omutiheyali, mefiku eti-15 lomwedi, oule womafiku aheyali pefimbo loshivilo, oli na okuyandja etimbayambo la faafana, exwikiloyambo alishe, eendjayambo nosho yo omaadi.’”