Job
21 Job okwa nyamukula, a ti:
2 “Pwilikineni nawanawa osho handi popi;
Eshi nashi kale ehekeleko olo tamu pe nge.
3 Lididimikilei nge, eshi handi popi;
Ngeenge onda mane okupopya, opo nee tamu sheke nge.
4 Mbela okupopyaana kwange okwa yukifwa komunhu?
Ngeno osho sha li ngaho, mbela ngeno osho inandi* kanifa elididimiko?
5 Talei nge, nokumanena nge mo omesho mwa kumwa;
Likwateni komilungu.
6 Ngeenge handi diladila kombinga yasho, ohashi piyaaneke nge,
Nolutu lange alishe ohali kakama.
7 Omolwashike ovakolokoshi hava kala nomwenyo,
Hava kulupa nohava punapala?*
8 Ovana vavo ohava kala alushe puvo,
Nohava mono oludalo lavo.
9 Omaumbo avo okwa amenwa, kave na oumbada washa,
Na Kalunga ihe va handukile nodibo yaye.
10 Eengobe davo deemhedi ihadi londo epwanga;
Eengobe davo deenghadi ohadi dala noihadi wifa.
11 Ovamati vavo ohava tondoka pondje ngaashi eedi noikombo,
Novana vavo ohava danauka va hafa.
12 Ohava imbi ve na oungoma nouxumbafeta,
Nohava hafele omawi eenyalilo.
14 Ashike ohava ti kuKalunga kashili, ‘Tu efa!
Inatu hala okushiiva eendjila doye.
15 Omunaenghono adishe oye lyelye, opo tu mu longele?
Ouwa washike hatu ka mona, ngeenge otwe mu shiiva?’
16 Ndele ondi shi shii kutya itava dulu okupangela oupuna wavo vene.
Omadiladilo* ovakolokoshi oku li kokule naame.
17 Olungapi olamba yovakolokoshi hai dimwa?
Olungapi hava hangwa koshiponga?
Olungapi Kalunga he va hanauna po, ngeenge a handuka?
18 Mbela ova kalele ngoo nale va fa omwiidi tau pepwa komhepo,
Nongaashi olungu tali i noshikungulu shomhepo?
19 Ehandukilo lomunhu, Kalunga ote li tuvikilile ovana vaye.
Ndele Kalunga ne mu shunifile, opo e shi shiive.
20 Omesho aye mwene naa mone enyonauko laye,
Ye na nwe yo mehandu lOmunaenghono adishe.
21 Mbela oku na ngoo onghwa naasho tashi ka ningilwa eumbo laye konima yaye,
Ngeenge eemwedi daye oda ninipikwa?
22 Mbela ope na ngoo oo ta dulu okuhonga Kalunga a kale e na eshiivo,*
Ngeenge oye ha tokola nokuli naavo ve li pombada elela?
23 Omunhu umwe oha fi e na eenghono dihapu,
Ofimbo ehe na oshisho shasha, noku na ombili,
24 Eshi omatundji aye e yadi oinghene,
Nomakipa aye a kola.*
25 Ofimbo omunhu umwe ha fi a wililwa po neenghono,*
Ina mona nandenande oinima iwa.
26 Aveshe ohava nangala mondwi,
Nomainyo ohae va uvike aveshe.
27 Taleni, ondi shi shii filufilu osho tamu diladila,
Neemhangela odo mwa pangela mu ningile nge owii.*
28 Osheshi ohamu ti, ‘Eumbo lomulumenhu, oo a tumbala, oli li peni,
Nomatwali, omo mwa li hamu di ovakolokoshi, oku li peni?’
29 Mbela inamu pula ovaendi?
Inamu konakona noukeka osho va mona,*
30 Kutya omukolokoshi okwa amenwa mefiku loudjuu,
Nokwa xupifwa mefiku lehandu?
31 Olyelye te ke mu lombwela shi na sha nondjila yaye,
Nolyelye te mu shunifile omolwoshinima osho a ninga?
32 Ngeenge okwa twalwa momaendo,
Pombila yaye otapa ka kala omunangeli.
33 Ondwi yedu lomefilu otai ka kala inyenye kuye,
Novanhu aveshe otave ke mu shikula,*
Ngaashi omuvalu muhapu waavo ve mu tetekela.
34 Omolwashike hano tamu hekeleke nge ongaho?
Omanyamukulo eni itaa ti sha, ndele okwa nyika oukengeleledi.”