Hesekiel
2 Opo nee okwa tya kwaame: “Omona womunhu,* fikama,* opo ndi dule okupopya naave.” 2 Eshi a popya naame, omhepo oye uya mwaame, noya ningifa nge ndi fikame, opo ndi dule okuuda ou ta popi naame.
3 Okwa twikila okupopya naame ta ti: “Omona womunhu, ohandi ku tumu kOvaisrael, oshiwana oshinashibofa, osho sha tukulila nge oshibofa. Vo nooxekulululwa ova nyona kwaame fiyo omefiku tuu eli. 4 Ohandi ku tumu kovana ovo ovatangalali* nove na omitima dikukutu, nou na oku va lombwela to ti, ‘Eshi osho Omwene Omunamapangelo aeshe, Jehova, ta ti.’ 5 Ashike vo, kutya nee ova pwilikine, ile ova anye okupwilikina, osheshi ove li eumbo linashibofa, otava ka shiiva filufilu kutya omuprofeti okwa li mokati kavo.
6 “Ashike ove, omona womunhu, ino va tila noino tila eendjovo davo, nonande owa dingililwa keeshosholo nokomakiya,* nou li mokati keendje. Ino tila eendjovo davo noino mbadapala omolwoipala yavo, osheshi ove li eumbo linashibofa. 7 Ou na oku va lombwela eendjovo dange, kutya nee ova pwilikine, ile hasho, osheshi ove li oshiwana oshinashibofa.
8 “Ashike ove, omona womunhu, pwilikina kwaasho handi ku lombwele. Ino ninga omunashibofa ngaashi eumbo eli linashibofa. Ekameka okanya koye, ndele to li osho handi ku pe.”
9 Eshi nda tala, onda mona eke la yuka kwaame, nomulo onda mona mo omushangwatonywa wa shangwa.* 10 Eshi e u tonyununa mo moipafi yange, owa shangwa kombada nokonima. Muo omwa shangwa omaimbilokemo* nokukwena nokulilaana.