Hesekiel
39 “Ashike ove, omona womunhu, xunganeka u li omhinge naGog, noku mu lombwela to ti, ‘Eshi osho Omwene Omunamapangelo aeshe, Jehova, ta ti: “Ondi li omhinge naave, Gog, elenga ekulunhu* laMesek naTubal. 2 Ohandi ke ku alula nosho yo oku ku wilika noku ku kufa koitukulwa yokomikunda elela yokolundume noku ku twala keemhunda daIsrael. 3 Ohandi ka denga mo outa woye meke loye lokolumosho, nokuningifa oikuti yoye i we mo meke loye lokolulyo. 4 Oto ka wila keemhunda daIsrael, ove nomatangakwaita oye aeshe nosho yo ovanhu, ovo tava ka hangwa pamwe naave. Ohandi ke ku yandja u li oikulya keedila domaludi aeshe, odo hadi li ombelela nosho yo koifitukuti yomofuka.”’
5 “‘Oto ka wila mehalandjadja, osheshi ame mwene onde shi popya,’ Omwene Omunamapangelo aeshe, Jehova, osho ta ti.
6 “‘Nohandi ka tumina Magog omundilo nosho yo ovo hava di mounhunhu ve li meameno, notava ka shiiva kutya aame Jehova. 7 Ohandi ka shiivifa edina lange liyapuki mokati kovanhu vange Israel, noitandi ka efa vali edina lange liyapuki li nyatekwe; noiwana oi na oku ka shiiva kutya aame Jehova, Omuyapuki muIsrael.’
8 “‘Heeno, eshi otashi uya, notashi ka ningwa,’ Omwene Omunamapangelo aeshe, Jehova, osho ta ti. ‘Eli olo efiku nda popile. 9 Ovakalimo vomoilando yaIsrael otava ka dja mo, notava ka tema omindilo noilwifo, oikelelifo inini* noikelelifo ya kula, omauta nosho yo oikuti, eedibo domoita* nosho yo omaonga. Notave ke i longifa va teme omindilo oule weedula heyali. 10 Itava ka pumbwa okukufa oiti mepya, ile va ongele oikuni okudja moixwa, molwaashi otava ka longifa oilwifo va teme omindilo.’
“‘Otava ka kufa oixuulwa* kwaavo va li ve va kufa oixuulwa notava ka nyeka ovo va li ve va nyeka,’ Omwene Omunamapangelo aeshe, Jehova, osho ta ti.
11 “‘Mefiku olo, ohandi ka pa Gog onhele yokupaka ovafi oko muIsrael, mefilu laavo hava ende koushilo wefuta, notai ka fitika ondjila yaavo tava ende mo. Oko oko tava ka paka Gog nosho yo eengudu daye adishe, notave ke i ifana Efilu laHamon-Gog.* 12 Eumbo laIsrael otali ka kala tali va pake oule weemwedi heyali, opo va koshole edu. 13 Ovanhu aveshe vomedu olo otave ke va paka, naasho otashi ke va etela etumba mefiku olo handi ke litumbalekifa ame mwene,’ Omwene Omunamapangelo aeshe, Jehova, osho ta ti.
14 “‘Ovalumenhu otava ka pewa oshinakuwanifwa shokweendaenda medu efimbo alishe nokupaka oimhu, oyo ya xupa ko kombada yedu, opo va dule oku li koshola. Otava ka twikila okukonga oule weemwedi heyali. 15 Ngeenge ovo tava endaenda medu alishe ova mono ekipa lomunhu, otava ka tula po edidiliko popepi nalo. Opo nee ovo va pewa oshinakuwanifwa shokupaka otave ke li paka mEfilu laHamon-Gog. 16 Notaku ka kala yo oshilando shedina Hamona.* Notava ka koshola edu.’
17 “Ashike ove, omona womunhu, eshi osho Omwene Omunamapangelo aeshe, Jehova, ta ti: ‘Tya koludi alishe loudila nosho yo koifitukuti aishe yomoixwa, “Liongeleni, ndele tamu uya. Ongaleleni eyambo lange, olo handi mu longekidile, eyambo linene keemhunda daIsrael. Otamu ka lya ombelela nokunwa ohonde. 18 Otamu ka lya ombelela yovanaenghono nokunwa ohonde yomalenga okombada yedu . . . eedi deendume, eedjona, oikombo nosho yo eengobe deemhedi . . . oinamwenyo aishe ya ondoka yaBasan. 19 Otamu ke likutifa nye vene, nokulya oinghene nokunwa ohonde, fiyo osheshi mwa kolwa keyambo, olo nde mu longekidila.”’
20 “‘Otamu ka kutifwa poshitaafula shange neenghambe nosho yo novalondi vomatemba, ovanaenghono nosho yo ovakwaita vomaludi aeshe,’ Omwene Omunamapangelo aeshe, Jehova, osho ta ti.
21 “‘Ohandi ka ulika oshinge shange mokati koiwana, noiwana aishe otai ka mona etokolo olo nda ninga nosho yo eenghono* odo nda ulika mokati kayo. 22 Okudja mefiku olo, eumbo laIsrael oli na oku ka shiiva kutya aame Jehova, Kalunga kavo. 23 Noiwana otai ka shiiva kutya eumbo laIsrael ola ya moukwatwa omolwepuko lalo vene, molwaashi kala li lidiinini kwaame. Onghee onde li holeka oshipala shange, nonde li yandja kovatondi valo, naalishe ola fya keongamukonda. 24 Onda ungaunga nalo she likolelela kokuhenoukoshoki kwalo nosho yo komatauluko alo, nonde li holeka oshipala shange.’
25 “Onghee eshi osho Omwene Omunamapangelo aeshe, Jehova, ta ti: ‘Ohandi ka etulula eenghwate daJakob nokufila onghenda eumbo alishe laIsrael; nohandi ka amena nouladi* edina lange liyapuki. 26 Konima ngeenge ova fifwa ohoni omolwokuhenoudiinini akushe kwavo kwaame, otava ka kala meameno medu lavo, nopehe na oo te va tilifa. 27 Ngeenge onde va alula okudja movanhu, noku va ongela okudja moilongo yovatondi vavo, ohandi ke liyapula yo ame mwene mokati kavo moipafi yoiwana ihapu.’
28 “‘Ove na oku ka shiiva kutya aame Jehova, Kalunga kavo, eshi handi va tumu moukwatwa mokati koiwana, opo nee handi va alulile kedu lavo, itandi fiye ko nande oumwe womuvo. 29 Itandi ke va holeka vali oshipala shange, osheshi ohandi ka tilila eumbo laIsrael omhepo yange,’ Omwene Omunamapangelo aeshe, Jehova, osho ta ti.”