Omafimbo otete
23 Eshi David a kulupa nokwa li pokufya,* okwa ninga omonamati waye, Salomo, ohamba yaIsrael. 2 Opo nee okwa ongela omalenga aeshe aIsrael, ovapristeri nOvalevi. 3 Ovalevi aveshe, ovo va li ve na eedula 30 okuyuka pombada, ova li va valulwa; omuvalu wavo owa li 38 000. 4 Ovalevi 24 000 vomuvo ova li ovapashukili voilonga yeumbo laJehova, nopa li ovawiliki novatokoli 6 000, 5 ovapashukili vopoivelo 4 000 nosho yo 4 000 ovo va li tava tange Jehova noishikomwa, oyo David a popya, a ti, “Onde i ninga, opo i longifwe mokutanga Kalunga.”
6 Opo nee David okwe va unganeka* meengudu. Ovanamati vaLevi ovo: Gerson, Kohat naMerari. 7 MOvagerson oLadan naSimei. 8 Ovanamati vaLadan ovo: Jehiel, omuwiliki, Setam naJoel, aveshe kumwe vatatu. 9 Ovanamati vaSimei ovo: Selomot, Hasiel naHaran, aveshe kumwe vatatu. Ovo ova li omitwe domaukwaneumbo epata laLadan. 10 Ovanamati vaSimei ovo: Jahat, Sina, Jehus naBeria, ovo vane ovanamati vaSimei. 11 Jahat okwa li omutwe, na Sisa omutivali. Ndele molwaashi Jehus naBeria kava li ve na ovanamati vahapu, ova li hava valulilwa moukwaneumbo wepata limwe, ve na oshinakuwanifwa shimwe.
12 Ovanamati vaKohat ovo: Amram, Ishar, Hebron naUsiel, aveshe kumwe vane. 13 Ovanamati vaAmram ovo: Aron naMoses. Ashike Aron okwa li e likalekelwa fiyo alushe, a yapule Ouyapuki elela, ye novanamati vaye, va yandje omayambo koshipala shaJehova, ve mu yakule nokunangeka noupuna ovanhu alushe medina laye. 14 Ovanamati vaMoses, omupiya waKalunga kashili, ova li va valulilwa mepata lOvalevi. 15 Ovanamati vaMoses ovo: Gersom naElieser. 16 Movanamati vaGersom, Sebuel oye a li omutwe. 17 Moludalo* laElieser, Rehabia oye a li omutwe; Elieser ka li e na vali ovanamati vamwe, ashike Rehabia okwa li e na ovanamati vahapu unene. 18 Movanamati vaIshar, Selomit oye a li omuwiliki. 19 Ovanamati vaHebron ovo: Jeria, omutwe, omutivali oAmaria, omutitatu oJahasiel nomutine oJekameam. 20 Ovanamati vaUsiel ovo: Mika, omutwe, nomutivali oIsshia.
21 Ovanamati vaMerari ovo: Mahli naMushi. Ovanamati vaMahli ovo: Eliaser naKish. 22 Eliaser okwa fya, ndele ka li e na ovanamati, okwa li ashike e na ovanakadona. Onghee ovanamati vaKish, ovapambele* vavo, ove va kufa po, va ninge ovakulukadi vavo. 23 Ovanamati vaMushi ovo: Mahli, Eder naJeremot, aveshe kumwe vatatu.
24 Ovo ovanamati vaLevi, she likolelela komaukwaneumbo omapata avo, omitwe domaukwaneumbo omapata, mwaavo va shangwa, ovo va valulwa nova tumbulwa pamadina avo, naavo hava wanifa po oilonga yomeumbo laJehova, okudja peedula 20 okuyuka pombada. 25 David okwa ti: “Jehova, Kalunga kaIsrael, okwa pa oshiwana shaye etulumuko, nota ka kala muJerusalem fiyo alushe. 26 Natango, Ovalevi kave na okuhumbata etwalihangano, ile shimwe shomoilongifo yalo, oyo hai longifwa omo.” 27 Ovalevi, ovo ve na eedula okudja 20 okuyuka pombada, ova li va valulwa she likolelela komalombwelo axuuninwa aDavid. 28 Oilonga yavo oya li okukwafela ovanamati vaAron moilonga yeumbo laJehova, okupashukila oihale, eenduda dokulila, okukosholwa kwoinima iyapuki nosho yo okulonga oilonga aishe oyo ya pumbiwa okulongwa meumbo laKalunga kashili. 29 Ova kwafela mokulongekida omungome wokutalika, oufila wa nakwa nawa weendjayambo, omingome da pepuka inadi ya efulika, oikuki ya ningilwa moshipana shedu, olumbololo la pilulilwa omaadi nosho yo moilonga aishe yokuyeleka ouhapu nounene. 30 Ova li ve na okufikama ongula keshe, va pandule nokutanga Jehova nokuninga sha faafana konguloshi. 31 Ova li hava kwafele efimbo keshe taku yambelwa Jehova omaxwikiloyambo mOmashabata, eemwedi dipe nopomafimbo oivilo, she likolelela komuvalu oo wa teelelwa pamhango i na sha navo, tave shi ningi pandjikilile koshipala shaJehova. 32 Ova li yo hava wanifa po oinakuwanifwa yavo i na sha netwali lokwoongalela, onhele iyapuki nosho yo ovamwaina, ovanamati vaAron, omolwoilonga yomeumbo laJehova.