Hesekiel
31 Momudo omuti-11, momwedi omutitatu, mefiku lotete lomwedi, ondjovo yaJehova oye uya vali kwaame tai ti: 2 “Omona womunhu, tya kuFarao, ohamba yaEgipiti, nokeengudu daye to ti,
‘Olyelye omunaenghono e ku fa?
3 Opa li Omuassiria, omusederi muLibanon,
U na oitai iwa, ngaashi omuti wa fita, nowa li mule;
Noxulo yao oya li ya twa moilemo.
4 Omeva okwe u ningifa u kule unene, eefifiya domeva da ya moule ode u ningifa u kule wa yuka pombada.
Opo wa li wa twikwa, owa li wa dingililwa komakungulukilo;
Omikangha davo oda li hadi tekele omiti adishe domoixwa.
5 Nomolwaashi wa ninga mule u dule omiti adishe domoixwa.
Oitai yao oya hapupala, noitai yao oya ninga ile,
Omolwomeva mahapu omomakungulukilo ayo.
6 Eedila adishe dokeulu oda tungila oihadi yado moitai yao,
Oinamwenyo aishe yomoixwa oya dalela koshi yoitai yao,
Noiwana aishe inene oya li hai kala momudile wao.
7 Ewapalo nosho yo oule woitai yao oya ninga iwa,
Osheshi omidi dao oda li da ya moule momeva mahapu.
8 Kapa li nande omisederi domoshikunino shaKalunga tadi dulu okuyelekwa nao.
Kapa li omiti domidjenipa di na oitai ngaashi yao,
Nokapa li omiti domi-plane* da faafana noitai yao.
Kape na omuti umwe moshikunino shaKalunga tau dulu okuyelekanifwa nao mewapalo.
9 Onde u ninga muwa, u na omafo mahapu,
Nomiti adishe domuEden, oshikunino shaKalunga kashili, oda li de u twila ondubo.’
10 “Onghee hano, eshi osho Omwene Omunamapangelo aeshe, Jehova, ta ti: ‘Molwaashi owa* ninga mule neenghono, wa yelula oxulo yao ya twa moilemo, nomutima wao owe linenepeka omolwoule wao, 11 ohandi ke u yandja komupangeli omunaenghono woiwana. Ote ke u katukila onghatu filufilu, nohandi ke u anya omolwowii wao. 12 Novanailongo, ovakwanyanya neenghono vomoiwana, otave ke u teta po, noku u fiya keemhunda, nomafo ao otaa ka wila momafilu aeshe, noitai yao otai ka kala ya nangala ya tekaukila momakungulukilo aeshe omoshilongo. Ovanhu aveshe vomedu olo otava ka dja mo momudile wao, noku u fiya po. 13 Eedila adishe dokeulu otadi ka kala hadi di pefina lao, olo la wa po, noinamwenyo aishe yomoixwa okoitai yao. 14 Eshi osha ningwa, opo paha kale omuti u li popepi nomeva nouha kule wa ya moule, ile oxulo yao i twe moilemo, nopaha kale omuti, oo wa tekelwa nawa, u fike pudo moule. Osheshi adishe otadi ka yandjwa kefyo, kedu li li koshi, pamwe novanamati vovanhu, ovo tava i melambo.’*
15 “Eshi osho Omwene Omunamapangelo aeshe, Jehova, ta ti: ‘Mefiku olo tau i mOmbila,* ohandi ka ningifa ovanhu va nyike oluhodi. Onghee hano, ohandi ka uvika omeva omoule nokukangheka omakungulukilo ao, opo ku kelelwe omeva mahapu. Ohandi ka laulika Libanon omolwao, nomiti adishe domedu olo otadi ka lemba. 16 Ohandi ka ningifa oiwana i kakame komalinyengo okuteka po kwao, eshi handi u twala mOmbila* pamwe naaveshe ovo tava i melambo,* nomiti adishe domuEden, odo diwa elela, noda denga mbada, daLibanon, adishe odo da tekelwa nawa, otadi ka hekelekwa medu, olo li li koshi. 17 Oda ya pamwe naye mOmbila* kwaavo va dipawa keongamukonda pamwe novayambididi* vaye, ovo va li hava di momudidimbe waye mokati koiwana.’
18 “‘Omiti dilipi domuEden da li de ku fa moshinge nomounene? Ashike ove oto ka tulwa pamwe nomiti domuEden medu, olo li li koshi. Oto ka nangala mokati kaavo inava pita etanda, pamwe naavo va dipawa keongamukonda. Eshi otashi ka ningilwa Farao nosho yo eengudu daye adishe,’ Omwene Omunamapangelo aeshe, Jehova, osho ta ti.”