Omaimbilokemo
א [Alef]
4 Nghee oshingoli tashi vema sha kanifa ongushu, oshingoli elela.
Nghee omamanya mayapuki e lihanena pomashakeneno epandavanda keshe.*
ב [Bet]
2 Shi na sha novanamati vaSion, ovo va li ve na ondilo, ovo va li va yelekwa noshingoli elela,*
Ova li va talika ko ngaashi oitoo yedu,
Oilonga yomake omumi.
ג [Gimel]
3 Nokuli nookavandje ohava nyamifa ounimwena vavo,
Ashike omonakadona wovanhu vange okwa ninga omukwanyanya, ngaashi eemho di li mombuwa.
ד [Dalet]
4 Elaka lokaana, oko taka nyamu, ohali kanyatele moshihokohoko shako omolwenota.
Ounona ohava ehela omungome, ndele kape na nande oumwe he va pe.
ה [He]
5 Ovo va li hava li oikulya iwa ova nangala momapandavanda va fya ondjala.*
Ovo va li va etwa va djala oikutu itilyana, ova ukata onduba yomute.
ו [Waw]
6 Ehandukilo* lomonakadona woshiwana shange olinene neenghono li dule ehandukilo lenyono laSodom,
Osho sha li sha hanaunwa po mepakumo leisho, nopehe na eke loku shi kwafela.
ז [Zayin]
7 Ovanasiri vaye ova li va yela shekesheke ve dule olumi,* va toka tootoo ve dule omashini.
Ova li va tilyana pyuupyuu ve dule omamanya eekorali; ova li va fa omamanya osafir a pushwa.*
ח [Het]
8 Eholokepo lavo ola ninga li laula fokofoko li dule edilo;*
Ihava dimbulukiwa momapandavanda.
Oshipa shavo osha naatela komakipa avo; osha ninga ngaashi oshiti shikukutu.
ט [Tet]
9 Ovo va dipawa keongamukonda ove li xwepo ve dulife ovo va fya kondjala,
Ovo tava xulu po, ovovo va tyuulwa keongamukonda omolwokuhe na oikulya momapya.
י [Yod]
10 Omake ovakainhu ovanalukeno okwa fulukifa ovana vavo vene.
Ova ninga oikulya yavo yeefya pefimbo lokuteka po kwomonakadona wovanhu vange.
כ [Kaf]
11 Jehova okwa ulika ehandu laye;
Okwa tilashi ehandu laye la xwama.
Nokwa xwameka omundilo muSion, oo wa xwika po omakanghameno asho.
ל [Lamed]
12 Eehamba dokombada yedu novakalimo aveshe vomedu liwa inave shi itavela
Kutya omupataneki nomutondi ota ka pita moivelo yaJerusalem.
מ [Mem]
13 Osha li sha ningwa omolwomanyono ovaprofeti vaye, omapuko ovapristeri vaye,
Ovo va tilashi ohonde yovayuki mokati kaye.
נ [Nun]
14 Ova kala ovapofi tava elaela momapandavanda.
Ova nyatekwa nohonde,
Opo paha kale nande oumwe ta dulu okukuma oikutu yavo.
ס [Samek]
15 Ova ifana kuvo tava ti: “Djeni mo mondjila! Inamu koshoka! Djeni mo mondjila! Djeni mo mondjila! Inamu tu kuma!”
Osheshi ova ya vehe na apa tava di, notava elaela.
Ovanhu ova popya mokati koiwana tava ti: “Itava dulu okukala apa pamwe nafye.*
פ [Pe]
16 Oshipala shaJehova oshe va halakanifa;
Ite ke va tala vali nohokwe.
Ovanhu itava ka fimaneka ovapristeri, noitava ka fila onghenda ovakulunhu.”
ע [Ayin]
17 Nokuli paife, omesho etu okwa loloka kokutala epwanga omolwekwafo.
Otwa tala, notwa konga ekwafo koshiwana, osho itashi dulu oku tu xupifa.
צ [Tsade]
18 Onghatu keshe twa katuka, ove tu konga, opo tuha dule okweenda momahalandjadja etu.
Exulilo letu ola ehena popepi; omafiku etu okwa pwa ko, osheshi exulilo letu ole uya.
ק [Kof]
19 Ovataatai vetu ove na onhapo ve dule eenhwa domewangadjo.
Ohave tu taataa keemhunda; ove tu ponokela mombuwa.
ר [Res]
20 Omufudo womomayulu etu, omuvaekwa waJehova, okwa kwatelwa melambo lavo la kula,
Oo twa popya shi na sha naye twa ti: “Ohatu ka kala hatu di mokati koiwana momudile waye.”
ש [Sin]
21 Nyakukwa nokuhafa, ove omonakadona waEdom, ngaashi wa kala ho di moshilando shaUs.
Ashike eholo otali ka pita yo nopwoove, noto ka kolwa nokuholola epenge loye.
ת [Taw]
22 Akutu omonakadona waSion, ehandukilo omolwenyono loye ole uya pexulilo.
Ite ke ku twala vali moukwatwa.
Ndele ota ka yandja elitulemo laye kepuko loye, ove omonakadona waEdom.
Ota ka holola omanyono oye.