Hesekiel
8 Nomomudo omutihamano, momwedi omutihamano, mefiku etitano lomwedi, ofimbo nda li omutumba meumbo lange, naashi ovakulunhu vaJuda va li omutumba komesho yange, eke lOmwene Omunamapangelo aeshe, Jehova, ola kwata nge, eshi nda li oko. 2 Eshi nda li handi tale, onda mona omunhu e na olupe la faafana naalo lomundilo; opa li omundilo pedu laasho tashi monika sha fa oshiya shaye, nokudja moshiya shaye okuyuka pombada, eholokepo laye ola li la twa, ngaashi oshinima tashi monika sha fa tashi taima.* 3 Opo nee okwa nana osho tashi monika sha fa eke, ndele ta kwata nge meexwiki dokomutwe wange, nomhepo oya tumba nge pokati kedu neulu,* nokutwala nge kuJerusalem okupitila momamoniko a dja kuKalunga, komuvelo womukala womeni oo wa taalela kolundume, oko ku na edidiliko* londubo loikalunga, oyo ya etifa ondubo. 4 Ndele tala! oshinge shaKalunga kaIsrael osha li oko, shi na eholokepo la fa olo nda monene mefilu.
5 Opo nee okwa tya kwaame: “Omona womunhu, alikana, yelula omesho oye u tale kolundume.” Onghee onda yelula omesho ange nda tala kolundume, ndele oko, kolundume loshivelo shoaltari, okwa li edidiliko* londubo li li moshivelo. 6 Nokwa tya kwaame: “Omona womunhu, mbela ou wete oinima oyo inyanyalifi, oinima itondifa, oyo eumbo laIsrael tali ningi apa, oinima oyo tai ningifa nge ndi ye kokule elela nonhele yange iyapuki? Ashike oto ka mona oinima itondifa unene i dulife nokuli pwaayo.”
7 Opo nee okwa eta nge koshivelo shomukala, ndele eshi nda tala, onda mona ombululu mekuma. 8 Okwa tya kwaame: “Omona womunhu, alikana, ombululu oyo i li mekuma i ninga ya kula.” Onghee ombululu oyo i li mekuma onde i ninga ya kula, nonda mona oshivelo. 9 Okwa tya kwaame: “Inda meni, ndele to tale owii, oinima itondifa, oyo tava ningi omo.” 10 Onghee onda ya mo, ndele handi tale, nonda mona oinamwenyo tai linyenge* yomaludi aeshe, noinamwenyo inai koshoka nosho yo oikalunga aishe itondifa* yeumbo laIsrael; oya li ya fanekwa kekuma alishe. 11 Novakulunhu 70 vomeumbo laIsrael ova li ofika komesho yayo, pamwe naJaasania, omonamati waSafan, a fikama mokati kavo. Keshe umwe womuvo okwa li e na oshikwatelwa shomundilo meke laye, nomwifi woitwimifo yedimba liwa owa li tau lundumuka. 12 Okwa tya kwaame: “Omona womunhu, mbela ou wete osho ovakulunhu vomeumbo laIsrael tava ningi momilaulu, keshe umwe meenduda domeni omo oihongwafano yaye ya ulikwa?* Osheshi otava ti, ‘Jehova ke tu wete. Jehova okwa fiya po oshilando.’”
13 Nokwa twikila okulombwela nge ta ti: “Oto ka mona oinima itondifa, oyo nokuli inyanyalifa neenghono i dulife oyo tava ningi.” 14 Onghee okwa eta nge komuvelo wokolundume weumbo laJehova, naako onda mona ko ovakainhu ve li omutumba, notava lili omolwoshikalunga Tammus.
15 Nokwa twikila okulombwela nge ta ti: “Omona womunhu ove, ou shi wete tuu eshi? Oto ka mona oinima itondifa oyo nokuli inyanyalifi neenghono i dulife oyo.” 16 Onghee okwa eta nge momukala womeni womeumbo laJehova. Opo poshivelo shotembeli yaJehova, pokati kokanduda kokufikila nosho yo koaltari, opa li ovalumenhu 25 lwaapo, ovo eembuda davo da pilamena otembeli yaJehova, noipala yavo ya taalela koushilo; ova li tave linyongamene ketango olo li li koushilo.
17 Okwa tya kwaame: “Omona womunhu, ou shi wete tuu eshi? Mbela inashi kwata moiti, eshi eumbo laJuda tali ningi oinima ei itondifa, li yadife edu nelongifo leenghono nokutwikila okuudifa nge nai? Paife otava xwange meyulu lange noshitai.* 18 Onghee ohandi ka katuka nehandu linene. Eisho lange itali ka fila onghenda; ile ndi ulike olukeno. Nokuli nonande ova lile mokule momatwi ange, itandi ke va uda.”