Josua
14 Ovaisrael ova li va kufa efyuululo medu laKaanan, olo va li va pewa komupristeri Eliaser, kuJosua, omonamati waNun, nokomitwe domaukwaneumbo omapata Ovaisrael. 2 Efyuululo lavo ola li la ningwa pashihoololifo, ngaashi ashike Jehova a li a popya okupitila muMoses shi na sha nomapata omuwoi netata. 3 Moses okwa yandja efyuululo komapata makwao avali netata kombinga ikwao* yomulonga waJordan, ashike Ovalevi ka li e va pa efyuululo mokati komapata makwao. 4 Oludalo laJosef ola li la talwa ko li li pamapata avali, laManasse nolaEfraim, noka la li la yandja oshitukulwa shedu kOvalevi, kakele koilando va kale mo noinima yavo nosho yo oulifilo woimuna yavo. 5 Onghee Ovaisrael ova tukula edu, ngaashi ashike Jehova a li a lombwela Moses.
6 Opo nee ovalumenhu vomuJuda ova ya kuJosua muGilgal, na Kaleb, omonamati waJefunne, Omukenas, okwe mu lombwela, ta ti: “Ove ou shi shii filufilu osho Jehova a lombwela Moses, omupiya waKalunga kashili, kombinga yoye noyange muKades-barnea. 7 Onda li ndi na eedula 40, eshi Moses, omupiya waJehova, a tuma nge okudja muKades-barnea ndi ka ndaade edu, nonda aluka ndi na ehokololo li li paushili.* 8 Nonande Ovaisrael vakwetu ovo nda ile navo ova ningifa ovanhu va mbadapale,* onda dulika kuJehova, Kalunga kange, nomutima aushe.* 9 Mefiku olo, Moses okwa ana ta ti: ‘Edu olo wa enda otali ningi efyuululo loye laalushe nolovanamati voye, molwaashi owa dulika kuJehova, Kalunga kange, nomutima aushe.’ 10 Jehova okwa xupifa nge omido odo 45 ngaashi ashike a udaneka, okudja eshi Jehova a udanekela Moses eudaneko olo, eshi Ovaisrael va enda mombuwa. Fiyo opaife ondi na omwenyo, ndi na eedula 85. 11 Nokunena ondi na eenghono ngaashi ashike mefiku olo Moses a li a tuma nge. Eenghono dange dopaife oda fa ashike dinya nda li ndi na nale, handi dulu okulwa oita nokulonga oilonga ikwao. 12 Onghee pe nge oshitukulwa osho shokeemhunda, osho Jehova a udaneka mefiku olo. Nonande mefiku olo owa uda kutya omu na Ovaanak noilando ya dingililwa komakuma a pama, Jehova ota ka kala shili pamwe naame, nohandi ke va taataa mo,* ngaashi ashike Jehova a udaneka.”
13 Onghee Josua okwa nangeka noupuna Kaleb, omonamati waJefunne, ndele te mu pe oshitukulwa shaHebron shi li efyuululo. 14 Osho osho sha ningifa Hebron shi ninge shaKaleb, omonamati waJefunne, Omukenas, shi li efyuululo fiyo okunena, molwaashi okwa dulika kuJehova, Kalunga kaIsrael, nomutima aushe. 15 Edina Hebron ola li nale Kiriat-arba (Arba okwa li omulumenhu a tumbala mokati kOvaanak). Medu olo kamwa li vali oita.