Hesekiel
21 Ondjovo yaJehova oye uya vali kwaame tai ti: 2 “Omona womunhu, taalelifa oshipala shoye kuJerusalem, nokuxunganeka kombinga yelondwelo li na sha naasho tashi ka ningilwa eenhele diyapuki nosho yo edu laIsrael. 3 Tya kedu laIsrael, ‘Eshi osho Jehova ta ti: “Ame ondi li omhinge naave, nohandi ka pweya mo eongamukonda lange moshilaleko shalo, ndele mwoove handi lefeke mo omuyuki nomukolokoshi. 4 Molwaashi mwoove ohandi ka lefeka mo omuyuki nomukolokoshi, eongamukonda lange otali ka pweywa mo moshilaleko shalo li ponokele ombelela* aishe, okudja kolukadi fiyo okolundume. 5 Ovanhu aveshe ove na oku ka shiiva kutya ame mwene, Jehova, onda pweya mo eongamukonda lange moshilaleko shalo. Itali ka shuna mo nandenande.”’
6 “Ashike ove, omona womunhu, twa omadima, ofimbo to* kakama, heeno, twa omadima wa nyika oluhodi moipafi yavo. 7 Nongeenge ova ti kwoove, ‘Omolwashike to tu omadima?’ oto ka tya, ‘Omolwonghundana.’ Osheshi otai uya shili, nomutima keshe otau ka hengumuka koumbada, neke keshe otali ka endjelela la tyololoka, nomhepo keshe otai ka nyika oluhodi, nongolo keshe otai ka shisha omeva.* ‘Tala! Otai uya shili; otashi ka ningwa,’ Omwene Omunamapangelo aeshe, Jehova, osho ta ti.”
8 Ondjovo yaJehova oye uya vali kwaame tai ti: 9 “Omona womunhu, xunganeka, ndele to ti, ‘Eshi osho Jehova ta ti: “Tya, ‘Eongamukonda ololo! Eongamukonda ola upikwa, nola kweywa tali vema. 10 Ola upikwa li etife edipao linene; ola kweywa li kale tali vema, ngaashi okashelu.’”’”
“Mbela katu na okunyakukwa?”
“‘Mbela otali* ka kandula po odibopangelo yomonamati wange mwene, ngaashi la ningila omuti keshe?
11 “‘Ola yandjwa li kweywe noli ka longifwe neke. Eongamukonda olo ola upikwa nola kweywa li tulwe meke lomudipai.
12 “‘Omona womunhu, lila mokule nokulilaana, osheshi ole uya okulwifa ovanhu vange; oli li omhinge nomalenga aeshe Ovaisrael. Ovo otava ka ninga oihakanwa yeongamukonda pamwe novanhu vange. Onghee denga etundji loye wa nyika oluhodi. 13 Osheshi opa ningwa ekonakono, ndele mbela oshike tashi ka ningwa po, ngeenge eongamukonda ola kandula po odibopangelo? Itai* ka kala po vali,’ Omwene Omunamapangelo aeshe, Jehova, osho ta ti.
14 “Ashike ove, omona womunhu, xunganeka nokupandula omake oye, ndele to ingida lutatu to ti, ‘Eongamukonda ololo!’ Oli li eongamukonda laavo va dipawa, eongamukonda olo la dipaa vahapu, olo le va dingilila. 15 Omitima davo otadi ka tyololoka koumbada, navahapu otava ka fila poivelo yoilando yavo; ohandi ke va dipaa neongamukonda. Heeno, otali vema ngaashi okashelu nola kweywa, opo li dipaifwe! 16 Teta wa yukifa kolulyo! Ngebula wa yukifa kolumosho! Inda keshe apa eememo doye da yukifwa! 17 Ohandi ka pandula yo omake ange, nonya yange otai ka lota. Ame mwene, Jehova, onde shi popya.”
18 Nondjovo yaJehova oye uya vali kwaame tai ti: 19 “Ashike ove, omona womunhu, didilika eendjila mbali deongamukonda lohamba yaBabilon oyo tai uya. Adishe mbali otadi ka dja medu limwe, nedidiliko* oli na okudikwa opo eendjila da tukaukila da yuka moilando ivali. 20 Ninga edidiliko londjila imwe, omo eongamukonda li na okweenda li ka lwife Rabba shOvaammoni, nondjila ikwao oli ka lwife omakuma a pama aJerusalem muJuda. 21 Osheshi ohamba yaBabilon ohai kanghama i nyanekele pomatukaukilo ondjila opo eendjila mbali da tukaukila. Ohai tukumuna oikuti. Ohai kongo ekwafo koikalunga* yayo; ohai konakona exuli. 22 Otai nyanekele nokwooko kwayo kwokolulyo ya taalela kuJerusalem, i tule peenhele oilongifo yokungumauna po, i yandje elombwelo lokudipaa, i popye eingido lokuya molwoodi, i tule peenhele oilongifo yokungumauna po omivelo, i tule po ekondeka le shi dingilila, i tunge ekuma le shi dingilila. 23 Ashike otali ka kala la fa enyanekelo loipupulu momesho aavo* va ana kuvo. Ashike otai ka dimbuluka omatimba avo, notai ke va kwata po.
24 “Onghee hano, eshi osho Omwene Omunamapangelo aeshe, Jehova, ta ti: ‘Omwa ningifa omatimba eni vene a dimbulukiwe mokuholola omatauluko eni, nokuningifa omanyono eni a monike meenghatu deni adishe. Paife eshi mwa dimbulukiwa, otamu ka kwatwa po keenghono.’*
25 “Ashike efiku loye ole uya, ove ou wa ehamekwa neenghono, elenga laIsrael likolokoshi, efimbo lehandukilo loye laxuuninwa. 26 Eshi osho Omwene Omunamapangelo aeshe, Jehova, ta ti: ‘Dula ko elapi lokulimanga komutwe, nokukufa ko oshikoroni. Oinima itai ka kala ngaashi ya kala. Yambula po omudinwa, nokuninipika oo a tumbala. 27 Oikulukuma, oikulukuma, ohandi ke shi ninga oikulukuma. Noitashi ka kala shomunhu, fiyo osheshi oo e na oufemba wopaveta e uya, nohandi ke shi mu pa.’
28 “Ashike ove, omona womunhu, xunganeka, ndele to ti, ‘Eshi osho Omwene Omunamapangelo aeshe, Jehova, ta ti kombinga yOvaammoni nosho yo kombinga yomasheko avo.’ Tya, ‘Eongamukonda ololo! Eongamukonda ola pweywa mo li dipae; ola upikwa li xwake po, nokushela ngaashi okashelu. 29 Kakele komamoniko oipupulu nosho yo enyanekelo loipupulu kombinga yoye, oto ka ndubilwa kwaavo va dipawa;* efiku lovalumenhu ovakolokoshi ole uya, efimbo lehandukilo lavo laxuuninwa. 30 Li shunifa moshilaleko shalo. Ohandi ke ku tokolela monhele omo wa shitilwa, medu omo wa dalelwa. 31 Ohandi ke ku tilila ehandu lange. Ohandi ke ku fudila omundilo wonya yange, nohandi ke ku yandja kovahanauni ovakwanyanya. 32 Oto ka ninga oshixwamekifo shomundilo; ohonde yoye mwene otai ka tilwashi medu, noito ka dimbulukiwa vali, osheshi ame mwene, Jehova, onde shi popya.’”