Exodus

29 “Opo u va yapule va longele nge ve li ovapristeri, ou na okuninga ngaha: Kufa ondumetana, eedjona deendume mbali dihe na oshipo, 2 omungome inau ya efulika, oukuki vongonga va pilulilwa mumwe nomaadi inava ya efulika, noukuki va pepuka va xuwa omaadi inava ya efulika. Ou na oku va ninga noufila woilya yo-wheat wa nakwa nawa 3 noku i tula moshimbale, ndele to i twala i li moshimbale, pamwe nongobe yomhedi needi deendume mbali.

4 “Ou na okutwala Aron novanamati vaye poshivelo shetwali lokwoongalela noku va kosha nomeva. 5 Ou na okukufa oikutu, ndele to dike Aron oshikutu shokombada, okandjafa kehe na omaoko kokoshi yokatetahema, okatetahema nosho yo okapapa koponhulo, ndele to mu mange nawa moshiya nomwiya,* oo wa hondjwa wokatetahema. 6 Ou na oku mu dika embale komutwe waye, nokembale olo ou na okutula ko edidiliko liyapuki li na sha nokunangekwa po,* 7 ndele to kufa omaadi okuvaeka noku a tila momutwe waye, ndele to mu vaeke.

8 “Ou na okweeta ovanamati vaye koshipala shange, noku va dika oikutu. 9 Aron novanamati vaye ou na oku va tangela omalapi komitwe, noku va djaleka omambale avo; oupristeri otau ka ninga wavo u li onghedimhango yaalushe. Aron novanamati vaye osho u na oku va nangeka po ngaho va longe ve li ovapristeri.*

10 “Ou na okutwala ongobe yomhedi komesho yetwali lokwoongalela, na Aron novanamati vaye otava ka tenheka omake avo komutwe womhedi oyo. 11 Ou na okudipaela ongobe yomhedi poshivelo shetwali lokwoongalela, koshipala shaJehova. 12 Ou na okuyava omunwe woye mohonde yomhedi oyo noku i vaeka keembinga doaltari, nohonde aishe oyo ya xupa mo ou na oku i tila koshitako shoaltari. 13 Ou na okukufa oinghene aishe oyo i li komandjadja, oinghene oyo i li kexuli, neefiyo mbali noinghene yado, ndele to i xwike, opo i kale tai twimaana omwifi koaltari. 14 Ashike ombelela yongobe yomhedi, oshikafa shayo noshandja shayo, ou na oku i xwika po momundilo kondje yonhanda. Oi li etimbayambo.

15 “Ou na okukufa odi imwe yondume, na Aron novanamati vaye otava ka tenheka omake avo komutwe wayo. 16 Ou na yo okudipaa odi yondume, ndele to kufa ohonde yayo noku i shamina keembinga adishe doaltari. 17 Ou na oku i teta moinhimbu, ndele to kosho omandjadja ayo noitukulwa yayo aishe, ndele to ongele oitukulwa yayo pamwe nomutwe. 18 Ou na oku i xwika po aishe, ndele omwifi wayo tau twimaana koaltari. Oli li exwikiloyambo kuJehova, edimba liwa.* Oli li eyambo kuJehova, la yambwa okupitila momundilo.

19 “Natango, ou na okukufa odi ikwao yondume, na Aron novamati vaye otava ka tenheka omake avo komutwe wayo. 20 Dipaa odi yondume, ndele to kufa ohonde yayo imwe noku i vaeka kokutwi kwokolulyo kwaAron nosho yo komatwi okolulyo ovanamati vaye nokomunwe wavo wa kula weke lokolulyo nosho yo komunwe wavo wa kula wokomhadi yokolulyo, nokushamina ohonde keembinga adishe doaltari. 21 Opo nee kufa ohonde imwe oyo i li koaltari nosho yo omaadi amwe okuvaeka, ndele to i shamine kuAron nokoikutu yaye nosho yo kovanamati vaye nokoikutu yovanamati vaye, opo ye noikutu yaye nosho yo ovanamati vaye noikutu yovanamati i kale iyapuki.

22 “Onghee kodi yondume kufa ko oinghene, oinghene yokomushila, oinghene oyo i li komandjadja, oinghene oyo i li kexuli, neefiyo mbali noinghene yado, noshilama shokolulyo, osheshi oi li odi yenangekepo. 23 Moshimbale shomingome inadi ya efulika osho shi li koshipala shaJehova, kufa mo omungome wongonga u na ombululu pokati wa telekwa momaadi nosho yo omungome wa pepuka. 24 Aishe ou na oku i tula momake aAron nomomake ovanamati vaye, noku i dungadungifa i li edungadungifwayambo koshipala shaJehova. 25 Ou na yo oku i kufa mo momake avo noku i xwikila koaltari kombada yexwikiloyambo, i li edimba liwa* koshipala shaJehova. Oli li eyambo kuJehova, la yambwa okupitila momundilo.

26 “Opo nee kufa ombadja yodi yondume yenangekepo, oyo ya yambwa omolwaAron noku i dungadungifa i li edungadungifwayambo koshipala shaJehova, notai ka ninga oshitukulwa shoye. 27 Ou na okuyapula ombadja yedungadungifwayambo noshilama shoshitukulwa shiyapuki, oyo ya li ya dungadungifwa, ya kufwa kodi yondume yenangekepo, oyo ya li ya yambwa omolwaAron novanamati vaye. 28 Oitukulwa oyo oi na okukala onghedimhango yaalushe kuAron nokovanamati vaye, oyo i na okushikulwa kOvaisrael, osheshi oi li oshitukulwa shiyapuki, notai ka ninga oshitukulwa shiyapuki osho shi na okuyandjwa kOvaisrael. Oi li oshitukulwa shavo shiyapuki kuJehova sheyambo loukumwe.

29 “Oikutu iyapuki yaAron otai ka longifwa kovanamati vaye ovo tave ke mu shikula, ngeenge ova vaekwa nova nangekwa po ve li ovapristeri. 30 Omupristeri oo a dja movanamati vaye, oo te mu pingene po, note uya ketwali lokwoongalela a yakule monhele iyapuki ota ka djala oikutu oyo oule womafiku aheyali.

31 “Ou na okukufa odi yondume yenangekepo, ndele ombelela yayo to i fulukifa monhele iyapuki. 32 Aron novanamati vaye otava ka lya ombelela yodi yondume nomungome oo u li moshimbale osho shi li poshivelo shetwali lokwoongalela. 33 Ove na okulya oinima oyo ya yambwa omolwofuto oyo ya yandjwa, opo va nangekwe po ve li ovapristeri* nova yapulwe. Ashike omunhu oo i na pitikwa* ke na oku i lya, molwaashi oiyapuki. 34 Ngeenge ombelela yeyambo lenangekepo nosho yo omungome oya xupu po fiyo ongula, ou na oku i xwika po momundilo. Kai na okuliwa, molwaashi oiyapuki.

35 “Aron novanamati vaye ou na oku va ninga ngaha, she likolelela kwaashishe osho nde ku lombwela. Ou na oku va nangeka po moule womafiku aheyali ve li ovapristeri.* 36 Efiku keshe ou na okuyamba ongobe yomhedi i li ofuto, nou na okukoshola oaltari koulunde moku i yandjela ofuto, noku i vaeka, opo i kale iyapuki. 37 Ou na okulongekidila oaltari ofuto oule womafiku aheyali, nou na oku i yapula, opo i ninge oaltari iyapuki elela. Keshe oo ta kumu oaltari oku na okukala a koshoka.

38 “Oinima ei oyo u na okuyamba koaltari: eedjona deendume mbali domudo umwe efiku keshe pandjikilile. 39 Ou na okuyamba odjona yondume imwe ongula, nodjona ikwao yondume eshi taku wiwile.* 40 Oshitimulongo shoshiyelekifo shoefa* shoufila wa nakwa nawa wa lumbakanifwa mumwe noshitine sho-hin* shomaadi, noshikunwayambo shoshitine sho-hin shomaviinyu, oi na okuyandjwa pamwe nodjona yondume yotete. 41 Ou na okuyamba odjona ikwao yondume eshi taku wiwile,* pamwe noufila woilya ya faafana nosho yo oikunwayambo ngaashi ongula. Ou na oku i yandja i li edimba liwa,* eyambo la yambelwa Jehova okupitila momundilo. 42 Oli na okukala exwikiloyambo laalushe komapupi eni aeshe poshivelo shetwali lokwoongalela koshipala shaJehova, opo handi ke ku lihololela, opo ndi popye naave.

43 “Ohandi ke lihololela Ovaisrael oko, netwali otali ka yapulwa omolwoshinge shange. 44 Ohandi ka yapulifa etwali lokwoongalela noaltari, nohandi ka yapulifa Aron novanamati vaye, opo va longele nge ve li ovapristeri. 45 Ohandi* ka kala mokati kOvaisrael, nohandi ka kala Kalunga kavo. 46 Otava ka shiiva filufilu kutya aame Jehova, Kalunga kavo, ou e va pitifa mo medu laEgipiti, opo ndi dule okukala mokati kavo. Aame Jehova, Kalunga kavo.