Genesis

13 Abram, omukulukadi waye nosho yo Lot ova dja mo muEgipiti noinima yavo aishe, va finda kuNegeb. 2 Abram okwa li e na oimuna ihapu, oisilveri noingoli. 3 Eshi a li ta di muNegeb a finda kuBetel, okwa enda ta tula moitukulwa i lili noku lili, fiyo osheshi a fika konhele oko a li a dika etwali laye, pokati kaBetel naAi, 4 oko a li a tungila oaltari. Konhele oko Abram oko a li a ifanena edina laKalunga, Jehova.

5 Lot, oo a li ta ende naAbram, naye okwa li e na eedi, eengobe nomatwali. 6 Kava li vali tava dulu okukala ponhele imwe, molwaashi ova li ve na oimuna ihapu. 7 Onghee pokati kovafita voimuna yaAbram novafita voimuna yaLot opa li pa holoka eenhamanana. Pefimbo olo, Ovakaanan nOvaperesi ova li hava di moshitukulwa osho. 8 Abram okwa lombwela Lot, a ti: “Inapa kala eenhangu pokati ketu naave nopokati kovafita voimuna yetu, molwaashi fye ovamwainafana. 9 Oto dulu okuhoolola keshe apa wa hala okukala medu eli. Natu tukauke. Ngeenge oto i kolumosho, ame ohandi i kolulyo, ashike ngeenge oto i kolulyo, ame ohandi i kolumosho.” 10 Lot okwa talaatala, nokwa mona kutya oshitukulwa shaJordan, osho sha ya fiyo okuSoar, oshi na omeva mahapu ngaashi oshikunino shaJehova* nongaashi edu laEgipiti (pefimbo opo Jehova ka li a hanauna po Sodom naGomorra). 11 Lot okwa hoolola oshitukulwa ashishe shaJordan, ndele ta tembulile onhanda yaye koushilo. Osho sha enda ngaho eshi va tukauka. 12 Abram okwa kala ha di muKaanan, ofimbo Lot a kala moilando yomoshitukulwa shaJordan. Lwanima, Lot okwa ka dika etwali laye popepi naSodom. 13 Ovanhu vomuSodom ova li ovakolokoshi, nohava nyono kuJehova sha kwata moiti.

14 Eshi Lot va tukauka naAbram, Jehova okwa lombwela Abram, a ti: “Kanghama opo u li, ndele to tale kolundume, kolukadi, koushilo nokouninginino, 15 molwaashi edu alishe olo u wete ohandi li ku pe noludalo loye li ninge emona laalushe. 16 Ohandi ka hapupalifa oludalo loye li kale ngaashi ondwi yedu. Ngaashi ashike ondwi yedu itai dulu okuvalulwa, noludalo loye itali ka dula okuvalulwa. 17 Fikama, ndele to ende noshitukulwa ashishe u shiive nawa oule nounene washo, osheshi ame ohandi ke shi ku pa.” 18 Abram okwa twikila okukala ha di momatwali. Lwanima, okwa ya, ndele ta ka kala ha di popepi nomiti dinene daMamre, odo di li muHebron, nokwa tungila ko Jehova oaltari.