Eehamba eenhivali
9 Omuprofeti Elisa okwa ifana umwe womovanamati vovaprofeti, ndele te mu lombwele, ta ti: “Mangela oikutu yoye moshiya, ndele kufa diva oshanga yomaadi, ndele to i nayo kuRamot-gilead. 2 Ngeenge owa fiki oko, konga Jehu, omonamati waJosafat, omonamati waNimsi. Inda mo, ndele to mu kufa mo mokati kovamwaxe noku mu twala mouyapuki elela. 3 Kufa oshanga yomaadi noku a tila komutwe waye, ndele to ti, ‘Jehova okwa ti: “Ohandi ku vaeke u ninge ohamba yaIsrael.”’ Opo nee yeulula omuvelo, ndele to endelele u ye onhapo.”
4 Opo nee omupiya womuprofeti okwa ya kuRamot-gilead. 5 Eshi a fika, okwa hanga eendjai detangakwaita di li omutumba opo. Okwa ti: “Elenga, ondi ku na etumwalaka.” Jehu okwa pula a ti: “Olyelye womufye?” Omupiya okwa nyamukula a ti: “Oove, elenga.” 6 Jehu okwa fikama, ndele ta i meumbo. Omupiya okwa tila omaadi komutwe waye, ndele te mu lombwele, ta ti: “Jehova, Kalunga kaIsrael, ota ti ngaha, ‘Ohandi ku vaeke u ninge ohamba yoshiwana shaJehova, Israel. 7 Ou na okuhanauna po eumbo lomwene woye Ahab, nohandi ka pula ohonde yovapiya vange ovaprofeti noyovapiya aveshe vaJehova, ovo va fila meke laIsabel. 8 Eumbo alishe laAhab otali ka xulifwa po. Ohandi ka hanauna po ovalumenhu* aveshe vomepata laAhab, mwa kwatelwa ovo vehe na ekwafo lasha naavo inava fimana muIsrael. 9 Eumbo laAhab ohandi ke li ninga ngaashi eumbo laJerobeam, omonamati waNebat, nongaashi eumbo laBaasha, omonamati waAhia. 10 Shi na sha naIsabel, eembwa otadi ke mu lila moshitukulwa shaJisreel, nokape na oo te ke mu paka.’” Opo nee okwa yeulula omuvelo, ndele ta faduka po.
11 Eshi Jehu a alukila kovapiya vomwene waye, ove mu pula, va ti: “Oinima oi li tuu nawa? Omolwashike omulumenhu oo omuyananghwengu e uya kwoove?” Okwe va nyamukula, a ti: “Omu shii ovanhu ovo ve li ngaho nonghedi yavo yokupopya.” 12 Ashike ova tya: “Osho kashi fi shoshili, alikana, tu lombwela.” Okwe va nyamukula, a ti: “Eshi osho a lombwela nge. Opo nee okwa weda ko a ti: ‘Eshi osho Jehova a ti: “Onde ku vaeka u ninge ohamba yOvaisrael.”’” 13 Opo nee keshe umwe okwe lidula diva oshikutu shaye shokombada, ndele tave i yale, opo a dule okulyata ko, nova shika enghuma, ndele tava ti: “Jehu okwa ninga ohamba!” 14 Jehu, omonamati waJosafat, omonamati waNimsi, okwa pangela omhangela a ka lwife Jehoram.
Jehoram okwa hangwa e li komalwilo puRamot-gilead, pamwe nOvaisrael aveshe omolwaHasael, ohamba yaSiria. 15 Lwanima, ohamba Jehoram oya shuna kuJisreel, opo i ka veluke koipute, oyo ya yashwa kOvasiria, eshi ya li tai lwifa Hasael, ohamba yaSiria.
Opo nee Jehu okwa ti: “Ngeenge otamu tu kumwe,* inamu efa nande omunhu umwe a dje mo moshilando, opo a ka lopote oshinima osho muJisreel.” 16 Opo nee Jehu okwa londa metemba laye, ndele ta i kuJisreel, osheshi Jehoram oko a li oko a nangala ta vele, nohamba yaJuda, Ahasia, oya ya ko i ka talele po Jehoram. 17 Ofimbo omunangeli a li a fikama koshungongulu muJisreel, okwa mona ongudu yovalumenhu vaJehu tai ehene popepi. Okwa ti: “Ondi wete ongudu yovalumenhu.” Jehoram okwa tya: “Kufa omukwaita, ndele to mu tumu e ke va shakeneke, noku va pula, ta ti: ‘Omwe uya tuu nombili?’” 18 Opo nee omukwaita okwa ya e ke mu shakeneke, ndele te mu lombwele ta ti: “Ohamba otai pula, ‘Owe uya tuu nombili?’” Ashike Jehu okwa nyamukula a ti: “Ou na shike ‘nombili’? Shikule nge.”
Opo nee omunangeli okwa ti: “Omutumwa okwa fika, ashike ina aluka.” 19 Onghee okwa tuma ko omukwaita omutivali, oo eshi a fika kuvo, a ti: “Ohamba otai pula tai ti: ‘Owe uya tuu nombili?’” Ashike Jehu okwa nyamukula a ti: “Ou nashike ‘nombili’? Shikule nge.”
20 Opo nee omunangeli okwa ti: “Okwe va hanga, ashike ina aluka, nokushingwa kwetemba okwa fa kwaJehu, omutekulu* waNimsi, molwaashi oha shingi a fa omupwidi.” 21 Jehoram okwa ti: “Longekida etemba.” Onghee etemba laye ola li la longekidwa. Opo nee Jehoram, ohamba yaIsrael, nosho yo Ahasia, ohamba yaJuda, keshe umwe okwa ya metemba laye va ka shakeneke Jehu. Ove mu hanga moshikunino shaNabot, Omujisreel.
22 Diva eshi Jehoram a mona Jehu, okwa tya: “Jehu, owe uya ngoo nombili?” Ashike okwe mu nyamukula, a ti: “Ongahelipi tapa dulu okukala ombili, ofimbo pe na oumbwada nosho yo oulodi wanyoko, Isabel?” 23 Opo nee Jehoram okwa tanauna etemba laye a ye onhapo, ndele ta ti kuAhasia: “Ahasia, otwa kengelelwa.” 24 Jehu okwa kufa outa, ndele ta yashe Jehoram pokati komapepe, noshikuti osha mbadukila pomutima, ndele ta wile metemba laye loita. 25 Opo nee okwa lombwela Bidkar, omuyakuli waye, a ti: “Mu kufa mo, ndele to mu ekele mepya laNabot, Omujisreel. Dimbuluka kutya fye naave otwa li twa londa momatemba* tu li konima yaxe, Ahab, eshi Jehova a popya shi na sha naye. 26 Jehova okwa ti: ‘“Ngaashi nda mona ohonde yaNabot noyovanamati vaye onghela, ohandi ke ku pula ohonde yavo mepya eli,” Jehova osho ta ti.’ Onghee mu kufa mo, ndele to mu ekele mepya olo, ngaashi Jehova a popya.”
27 Eshi Ahasia, ohamba yaJuda, a mona osho sha ningwa po, okwa ya onhapo nondjila oyo ya finda koshikunino sheumbo. (Lwanima, Jehu okwe ke mu taataa, ndele ta ti: “Naye mu ponokeleni.” Onghee ove mu ponokela, ofimbo a li metemba laye mondjila oyo ya finda kuGur, oyo i li puIbleam. Ashike okwa twikila nolweendo laye fiyo okuMegiddo, naako oko a fila. 28 Opo nee ovapiya vaye ove mu humbata metemba, ndele tave mu twala kuJerusalem. Ove mu paka mombila yaye pooxekulululwa, mOshilando shaDavid. 29 Ahasia okwa ninga ohamba yaJuda momudo omuti-11 wepangelo laJehoram, omonamati waAhab.)
30 Eshi Jehu e uya kuJisreel, Isabel okwe shi uda. Onghee okwa mbapeka omesho aye nombapeka ilaula.* Okwa ninga nawa omutwe waye, ndele ta tale pedu okupitila mekende. 31 Eshi Jehu e uya mo a pitila poshivelo, Isabel okwa ti: “Osha enda ngoo nawa naSimri, oo a dipaa omwene waye?” 32 Jehu okwa tala mekende, ndele ta ti: “Olyelye a ama kombinga yange? Olyelye?” Diva omalenga omombala avali, ile atatu okwe mu tala. 33 Okwa ti: “Mu undulileni pedu!” Onghee ova undulila Isabel pedu, nohonde yaye imwe oya li ya ningila kekuma nokeenghambe, ndele tave mu lyataula. 34 Konima eshi Jehu a ya mo, okwa lya nokwa nwa. Opo nee okwa ti: “Alikana, fileni oshisho omukainhu oo a fingwa, noku mu paka. Molwaashi ye omonakadona wohamba.” 35 Ashike eshi va ya ve ke mu pake, inava hanga po sha, ndele ova hanga po ashike ekolotwe, eemhadi neenyala daye. 36 Eshi va shuna ove mu lombwela, nokwa ti: “Osho otashi wanifa po eendjovo daJehova odo a popya okupitila momupiya waye Elia, Omutisbi, a ti, ‘Eembwa otadi ka lila ombelela yaIsabel moshitukulwa shaJisreel. 37 Oshimhu shaIsabel otashi ka ninga oushosho mepya lomoshitukulwa shaJisreel, opo vaha ka tye: “Ou oIsabel.”’”