Levitikus
25 Jehova okwa popya vali naMoses komhunda yaSinai, ta ti: 2 “Popya nOvaisrael u va lombwele kutya, ‘Ngeenge mwe uya medu olo handi mu pe, edu inamu li longa, molwaashi eshabata kuJehova. 3 Omu na okukuna momapya eni eembuto oule weedula hamano, needula hamano omu na okukokola oikunino yeni yomandjebele, nomu na okwoongela oilikolomwa yomedu olo. 4 Ndele momudo omutiheyali, edu kali na okulongwa nandenande, molwaashi efimbo leshabata kuJehova. Kamu na okukuna eembuto momapya eni, ile mu kokole oikunino yeni yomandjebele. 5 Kamu na okuteya oilya oyo ya mena kuyo vene, oyo ya dja moilya oyo ya fyaala po,* eshi mwa li tamu teya. Nokamu na okwoongela omandjebele omoikunino yeni oyo inai kokolwa. Edu kali na okulongwa nandenande momudo oo. 6 Ashike otamu dulu okulya oikulya oyo ya mena medu olo pefimbo leshabata; ove novapiya voye ovalumenhu novakainhu, novanailonga voye, novanailongo ovo ve li mokati keni otava dulu oku i lya, 7 noinamwenyo yopovanhu nosho yo oifitukuti yomedu leni. Keshe osho sha mena medu olo otashi dulu okuliwa.
8 “‘Oto ka valula omido heyali domashabata, omido heyali luheyali, nomafiku omido heyali domashabata otaa ka kala e fike pomido 49. 9 Opo nee oto ka shika enghuma mokule momafiku omulongo omwedi omutiheyali, mEfiku lOkukosholwa Omatimba, otamu ka shika enghuma li udike medu leni alishe. 10 Omu na okuyapula omudo omuti-50, nokuhepaululila ovakalimo aveshe vomedu olo emanguluko. Otau ningi omudo wEkuwililo kunye, nakeshe umwe womunye oku na okushuna koshitukulwa shavo nokushuna keumbo lavo. 11 Omudo omuti-50 otau ka ninga omudo wEkuwililo kunye. Itamu ka kuna eembuto noitamu ka teya oilya oyo ya mena kuyo vene, oyo ya dja moilya oyo ya fyaala po, eshi mwa li tamu teya, nokamu na okwoongela omandjebele omoikunino yeni, oyo inai kokolwa. 12 Ou li omudo wEkuwililo. Ou na okukala uyapuki kunye. Otamu dulu ashike okulya osho sha mena medu olo kusho vene.
13 “‘Momudo ou wEkuwililo, keshe umwe oku na okushuna koshitukulwa shavo. 14 Ngeenge to landifa sha kumukweni, ile to lande sha kuye, inamu nyokomafana. 15 Ou na okulanda kumukweni, she likolelela komuvalu womido okudja komudo wEkuwililo. Oku na okulandifa sha kwoove, she likolelela komido deteyo odo da xupa ko. 16 Ngeenge okwa xupa omido dihapu, ota dulu okuweda ko kondado yaasho ta landifa, ashike ngeenge okwa xupa omido dinini, oku na okukufa ko kondado yaasho ta landifa, molwaashi ota landifa kwoove omuvalu woilikolomwa oyo tai ka teywa. 17 Hamunhu mokati keni ta nyokoma mukwao, nomu na okutila Kalunga keni, osheshi aame Jehova, Kalunga keni. 18 Ngeenge omwa dulika keenghedimhango dange nomwa diinine omatokolo ange, otamu ka kala mwa amenwa medu olo. 19 Edu otali ka yandja oiimati yalo, notamu ka lya tamu kuta, ndele tamu kala mo mwa amenwa.
20 “‘Ndele ngeenge otamu lipula kutya: “Ohatu ka lya shike momudo omutiheyali ngeenge inatu kuna eembuto, ile inatu ongela oilikolomwa?” 21 Ohandi ke mu tumina omanangeko noupuna ange momudo omutihamano, nedu otali ka menifa oilikolomwa ya wana eedula nhatu. 22 Opo nee otamu ka kuna eembuto momudo omutihetatu notamu ka lya oilikolomwa ikulu fiyo omomudo omutimuwoi. Otamu ka lya oiimati ikulu fiyo osheshi eteyo lomudo omutimuwoi la fika.
23 “‘Edu inamu li landifa po filufilu, molwaashi olange. Osheshi nye ovanailongo novaidililwa pataleko lange. 24 Edu alishe omo tamu ka kala, otamu dulu okuyandja oufemba li landululwe ko.
25 “‘Ngeenge omumwaxo okwa ningi ohepele, ndele ta landifa po onhele yaye imwe, omupambele waye wopopepi elela oku na okuuya, ndele ta lande ko onhele oyo ya landifwa po kumumwaina. 26 Ngeenge umwe ke na omupambele wopopepi elela nokwa ninga oshipuna, ndele ta mono oiniwe yoku i landa ko, 27 oku na okuvalula ongushu yayo moule womido odo e i landifa po. Opo nee ota ka shunifa oimaliwa, yomido odo da xupa ko, komulumenhu oo e i landele po, ndele ta shuna monhele yaye.
28 “‘Ndele ngeenge ina mona oiniwe yoku i landulula ko, onhele oyo a landifa otai kala yaao e i landa ko fiyo omomudo wEkuwililo, note ke i shunifilwa momudo wEkuwililo, ndele ta shuna konhele yaye.
29 “‘Ngeenge umwe ta landifa po eumbo moshilando sha dingililwa kekuma, oufemba waye woku li landulula po otau twikile fiyo opexulilo lomudo, okudja pefimbo olo a mana oku li landifa po. Ota kala e na oufemba woku li landulula po omudo aushe. 30 Ndele ngeenge inali landululwa po fiyo opexulilo lomudo, eumbo olo li li moshilando sha dingililwa kekuma otali ningi po filufilu laao e li landa po fiyo okomapupi aye aeshe. Ke na oku li kufwa momudo wEkuwililo. 31 Ashike omaumbo oo e li meenhele inadi dingililwa kekuma, oku na okutalwa ko e li oshitukulwa shokomikunda. Oufemba woku a landulula po ou na okutwikila, noku na okushunifwa momudo wEkuwililo.
32 “‘Oufemba wOvalevi wokulandulula po omaumbo avo, oo e li moilando yavo, otau kalelele. 33 Ngeenge oshitukulwa shedu shOvalevi inashi landululwa ko, eumbo olo la landifwa po moshilando shavo otali shunifwa kumwene walo momudo wEkuwililo, molwaashi omaumbo, oo e li moilando yOvalevi, oku li oitukulwa yavo yedu mokati kOvaisrael. 34 Ashike oshitukulwa shoulifilo osho sha dingilila oilando yavo, itashi dulu okulandifwa po, molwaashi oshi li emona lavo laalushe.
35 “‘Ngeenge omumwaxo oo ha di popepi naave okwa ningi ohepele, ndele ta kala ita dulu okuliyambidida, ou na oku mu kwafela ngaashi ashike to kwafele omunailongo nomwiidililwa, opo a kale nomwenyo pamwe naave. 36 Ino mu pula oishoshela. Ou na okutila Kalunga koye, nomumwaxo ota kala nomwenyo pamwe naave. 37 Ino mu pa oimaliwa nelalakano opo e ke ku pe oishoshela, ile u mu pe oikulya, opo e ku alulile shihapu. 38 Aame Jehova, Kalunga keni, ou e mu pitifa mo medu laEgipiti, ndi mu pe edu laKaanan, opo ndi ulike kutya aame Kalunga keni.
39 “‘Ngeenge omumwaxo oo ha di popepi naave okwa ningi ohepele, ndele te lilandifa po kwoove, ku na oku mu fininika a longe oilonga youpika. 40 Oku na okuungaungiwa naye ngaashi omunailonga, ile omwiidililwa. Oku na okulonga pamwe naave fiyo omomudo wEkuwililo. 41 Opo nee oku na okudja po pwoove, ye novana* vaye, noku na okushuna keumbo lavo. Oku na okushuna kedu looxekulululwa. 42 Ovana vaIsrael ove li ovapiya vange ovo nda kufa medu laEgipiti. Kave na okulilandifa po ngaashi omupika ha landifwa. 43 Ku na okuungaunga naye nonyanya, nou na okutila Kalunga koye. 44 Ovapiya voye ovalumenhu novakainhu ove na okudja moiwana oyo ye mu dingilila, omo tamu dulu okulanda ovapiya ovalumenhu, ile ovakainhu. 45 Natango, movana vovanailongo, ovo hava di punye, ovo va dja muvo naavo va dja momaukwaneumbo avo, ovo va dalelwa medu leni, omo tamu dulu okulanda ovapiya, notava ningi emona leni. 46 Ngeenge omwa fi, ovana veni otava dulu oku va fyuulula po notava twikile okukala ovapiya vovana veni. Otamu dulu oku va longifa ve li ovanailonga, ashike ovamwaxo Ovaisrael kamu na okuungaunga navo nonyanya.
47 “‘Ngeenge omunailongo, ile omwiidililwa oo ha di pwoove okwa ningi oshipuna, nomumwaxo oo ha di puye okwa ningi ohepele, ndele te lilandifa po komunailongo, ile komwiidililwa oo ha di pwoove, ile koshilyo shoukwaneumbo womunailongo, 48 ota twikile okukala e na oufemba wokulilandulula ko konima eshi e lilandifa po. Omumwaxe umwe ota dulu oku mu landulula ko, 49 ile xekulu, ile omonamati waxekulu, ota dulu oku mu landulula ko, ile omupambele keshe wopopepi elela, umwe womoukwaneumbo wavo, ota dulu oku mu landulula ko.
“‘Ile ngeenge okwa ningi oshipuna, ota dulu okulilandulula ko ye mwene. 50 Oku na okuvalula pamwe naao e mu landa po, okudja momudo oo e lilandifa po kuye fiyo omomudo wEkuwililo, noimaliwa yokulilanda ko oi na okukala tai tu kumwe nomido odo. Omafiku aye oilonga oo a longa momukokomoko wefimbo olo otaa ka futwa she likolelela kondjabi yomunailonga. 51 Ngeenge okwa xupa omido dihapu, oku na okufuta oimaliwa yokulilanda ko ya yeleka omido odo da xupa ko. 52 Ndele ngeenge okwa xupa ashike omido dinini fiyo omomudo wEkuwililo, oku na okuvalula ye mwene, ndele ta yandje oimaliwa yokulifutila ko, yondado ya yeleka omido odo da xupa ko. 53 Oku na okutwikila oku mu longela omudo nomudo e li ngaashi omunailonga, nou na okushilipaleka kutya ita ungaunga naye nonyanya. 54 Ndele ngeenge ita dulu okulilandulula ko monghedi oyo, ota ka mangululwa momudo wEkuwililo, ye pamwe novana vaye.*
55 “‘Ovaisrael ovapiya vange mwene. Vo ovapiya vange nde va kufa medu laEgipiti. Aame Jehova, Kalunga keni.